发扬创制壮文的精神,为做好壮文工作继续努力

发表时间:2017-11-21 18:09  责任编辑:广西民语委  点击:次  来源:广西民语委

Fatyiengz Aen Cingsaenz Dajcauh Sawcuengh, Laebdaeb

Vih Guh Ndei Hong Sawcuengh Lai Roengzrengz

发扬创制壮文的精神,为做好壮文工作继续努力

              Vangz Dazvuj

It. Bouxcuengh Caeuq Vahcuengh

Gyoengqvunz Bouxcuengh seizneix, Cangh Swnghcin sienseng youq ndaw dauq sawDunghsij Bouxcuenghde cawjbien haenx sij naeuz, dwg minzcuz youqgaenj ndeu youq ndaw ranz hung guekcoj hungmbwkdoengjitmiz lai cungj minzcuz raeuz, caiq gangj lai di,  de lij dwg aen minzcuz vunz ceiq lai ndeu youq ndaw 55 aen siujsoq minzcuz guek raeuz. Daj gij faenbouh diegyouq de daeuj yawj, vunz Bouxcuengh cujyau faenbouh youq vengq dieg baihnamz guekcoj raeuz, youz baihdoeng daengz baihsae, de daj Gvangjdungh Swngj Lenzsanh Bouxcuengh Bouxyiuz Swciyen vang bae Yinznanz Swngj Vwnzsanh Bouxcuengh Bouxmiuz Swcicouh, namz nemdaengz Bwzbuvanh, baek gapdaengz gij dieggaiq Gveicouh Swngj Cungzgyah Yen, mbiengj saenamz de caeuq aen guek Yeznanz doxswnj. Gij vunz Bouxcuengh 99.73% guek raeuz cungj dwg comzyouq benq dieg gvangqmyangmyang neix. Daj gij swhliu yinzgouj bujcaz youq ndaw bi 2000 haenx yawj ndaej ok, aen soq yinzgouj daengxcungq Bouxcuengh miz 1617.88 fanh vunz, caemh miz conhgyah doenqdingh, daengz seizneix gij yinzgouj Bouxcuengh youq ndaw guek raeuz gaenq mauh gvaq 1800 fanh vunz lo.

Daj gozci daeuj yawj, gij vunz Bouxcuengh seizneix gvihaeuj nga faencei gyoengqvunz Daizcuz (Tai peoples), youq ndaw gyoengqvunz Daiz-Gajdai ( Tai-Kadai) yijhi faenbouh youq baihnamz guek raeuz caeuq lai aen guekgya Doengnamzya haenx. Fan Hungzgvei sienseng youq bonj sawGyoengq Minzcuz Caemh Lauxcoj:Gangjgangj Gij Goekgaen Caeuq Vwnzva Gak Minzcuz Bouxcuengh Bouxdaide sij haenx naeuz, gij minzcuz BouxcuenghBouxyaejDaijcuzDungcuzLizcuzSuijcuzMulaujcuzMauznanzcuz youq ndaw guek raeuz, caeuq cib geij aen minzcuz itheij daih’iek 9000 fanh vunz youq YeznanzLaujvohDaigozMenjdenYindu haenx, dwg gyoengq minzcuz caemh cojcoeng, lumj go faex hung ndeu, ginggvaq haijlai bi sengmaj, daengzlaeng dauq ndaej seng ok haujlai ngafaex hung; Gij minzcuz baihgwnz gangj haenx, gij rag gij goek gyoengqde doxdoengz, ngafaex mbouj doxdoengz couh dwg lo. 

Gij gyaugohsuh yijyenzyoz conzdungj guek raeuz nyinhnaeuz, Vahcuengh gvihaeuj Cang-Dai yijcih Cang-Dung yijcuz Han-Cang yijhi. Lij Fanghgvei sienseng vih YinghvwnzCunghgoz Nenzgenbanj daih ngeih youq bi 1937 nienz sij aen swzdiuz “Yijyenz Caeuq Fanghyenz”, youq ndaw swzdiuz neix, de dawz Han-Cang yijhi faen baenz seiq aen yijcuz, couh dwg HanyijDung-Daiz (Kam-Tai) yijcuzMiuz-Yauz (Miao-Yao) yijcuz caeuq Cang-Menj (Tibeto-Burman) yijcuz. Youq bi 1942 nienz, boux yijyenzyozgyah Meijgoz ndeu, coh de heuh BwxbaujlozPaul K. Benedict, gaenq fatbiuj bien lunvwnz DaizyijGyadaiyij Caeuq Yindunizsihyayij— Aen Lenzmungz Yijyenz Moq Youq Doengnamzya, de nyinhnaeuz gij yijyenz Dung-Daiz caeuq gij yijyenz Miuz-Yauz mbouj wngdang gvihaeuj Han-Cang yijhi, baihlaeng de lij daezok gij cujcangh aeu laeb aen Au-Dai yijhi (Austro-Thai Language. Hoeng gij gvanhdenj Lij Fanghgvei dwg gij yawjfap vunz banghaeuj engq lai, baihlaeng geij cib bi, de caemh bienq baenz gij cujyau fuengsik yijyenzyozcej bae fwnhlei gij yijyenz Han-Cang. Hoeng daj Bwzbaujloz youq gij nienzdaih 1970 ok song bonj sawHan-Cang Yij Gaiyau(Sino-Tibetan: A Conspectus)caeuqAu-Dai YijYijyenz Caeuq Vwnzva (Austro-Thai Language and Culture)le, gij yawjfap de dauq menhmenh ndaej gij yijyenzyozgya bandaeuz daeuj ciepsouh lo, gij yozcej saefueng caemh doxdoeng bae sukiq gij fanveiz Han-Cang yijhi, hix mbouj caiq dawz gij yijyenz Cang-Dung caeuq gij yijyenz Miuz-Yauz gvihaeuj ndaw fanveiz Han-Cang yijhi bae.  

NgeihGij Laizyouz Bae Dajcauh Sawcuengh

Youq aen ngoenz 1949 nienz 10 nyied 1 hauh, Cunghvaz Yinzminz Gunghozgoz laebbaenz lo. Cungguek Gungcanjdangj swng baenz aen dangj cizcwng le, de youq minzcuz digih saedhengz aen cidu mincuz gihyiz swci, youq ngoenz 1952 nienz 12 nyied 10 hauh, youq 3 aen congih YunghningzYizsanh caeuq Baksaek gij dieg Bouxcuengh comzyouq haenx laebbaenz Gveiqsae Bouxcuengh Swcigih (dwg aen minzcuz digih youq baihlaj Gvangjsih Swngj).

Youq mwh codaeuz ngamq laeb guek moq, gij cingzgvang sawjyungh vwnzsw youq ndaw gak siujsoq minzcuz Cungguek raeuz haemq fukcab. Mwh haenx, gij minzcuz gaenq miz vwnzsw minzcuz baugvat MungzgujcuzVeizvuzwjcuzCauzsenhcuz dwngj; gij minzcuz doengyungh hanyij baugvat VeizcuzManjcuzSehcuz; gij minzcuz mbouj miz vwnzsw cungjgung miz 34 aen, ndawde caemh baugvat Bouxcuengh. Seizhaenx, gak siujsoq minzcuz youq  fuengmienh sawjyungh roxnaeuz dajcauh vwnzsw bonjfaenh neix nyiedcingz haemq sang, vunz Bouxcuengh hix mbouj laehvaih, mwh de gak gaep lingjdauj Bouxcuengh caeux couh roxnyinh daengz, dajcauh vwnzsw bonjfaenh dwg aen gunghcwngz gihbwnj haemq youqgaenq ndeu, danghnaeuz miz dauq vwnzsw ndaej sij roengz sij ok gij yijyenz minzcuz bonjfaenh, minzcuz digih Bouxcuengh hix gojnaengz mbouj geij nanz couh gvet seuq gij yienhsieng mbouj rox cihsaw, yienghneix couh ndaej sawjyungh gij vwnzsw minzcuz bonjfaenh daeuj laebbaenz caeuq fazcanj gij vwnzva gyauyuz saehnieb minzcuz digih, hawj sevei ndaej daengz cinbu youq sojmiz fuengmienh. Cimdoiq gij gidij cingzgvang sawjyungh vwnzsw siujsoq minzcuz caeuq gij yijyenz daidu siujsoq minzcuz seizhaenx,  Cwngfuj Cunghgoz okdaiz cwngcwz bangfuz, roengzrengz bae guh gij hong minzcuz yijvwnz. Caeux youq ngoenz 1951 nienz 2 nyied 5 hauh, dangseiz Cungyangh Yinzminz Cwngfuj fucwz gidij lozsiz aen cidu minzcuz gihyi swci dwg heuh Cwng’vuyen, de fatbouh Geij Aen Gietdingh Mizgven Gij Swvu Siujsoq Minzcuz, gij neiyungz daih 5 hangh youq ndaw gietdingh neix mingzbeg gvidingh, “Youq Cwng’vuyen Vwnzva Gyauyuz Veijyenzvei ndaw de ndalaeb Siujsoq Minzcuz Yijyenz Vwnzsw Yenzgiu Cijdauj Veijyenzvei, cijdauj caeuq cujciz bae guh gij hong yenzgiu mizgven yijyenz vwnzsw siujsoq minzcuz, bangcoh gij siujsoq minzcuz lij caengz miz vwnzsw bonjfaenh haenx dajcauh vwnzsw de, bangcoh gij siujsoq minzcuz vwnzsw lij caengz caezcienz haenx cugciemh cungsaed gij vwnzsw de. ”

Baengh gij dunghfungh minzcuz cwngcwz aen Dangj raeuz, Sawcuengh lahdingh cihmeh ndaej daeuj seng ok caeuq hungmaj youq gwnz biengz cih dwg gij vwndiz caeux roxnaeuz ceiz bah lo.

SamGij Hong Diucaz Vahcuengh

    Ndaej gij veijdoz Siujsoq Minzcuz Yijyenz Vwnzsw Yenzgiu Cijdauj Veijyenzvei ndayouq ndaw Cwng’vuyen Vwnzva Gyauyuz Veijyenzvei, boux gyausou Baekging Dayoz ndeu, de youq bi 1937 nienz bae gvaq Yinghgoz Niuzcinh Dayoz Mozwjdunh Yozyen (Yinghyij: Merton College) haenqrengz doeg gij goqcwngz Yin’ouhyij lizsij beijgyauq yijfaz, heuh guh Yenz Gyahvaz, couh daiq Veiz Ging’vwnjCangh Ginhyuz dwngj hagseng, youq mwh 1952 nienz 2 nyied daeuj daengz Guengjsae. Aen moegdik Yenz gyausou baezneix daeuj daengz Guengjsae, swhyienz ronghsagsag, couh dwg guh sat gij hong diucaz Vahcuengh le bangcoh Bouxcuengh dajcauh vwnzsw. Youq gij cihciz Guengjsae Swngj Yinzminz Veijyenzvei baihlaj, Yenz gyausou guh liux gij hong lied youq baihlaj neix:(1)Daj aen seiz 1952 nienz 3 nyied hwnj youq Guengjsae Minzcuz Yozyen banh aen beizyinban goetganq vih hong yijvwnz Bouxcuengh; (2)Laebdaeb cujcizdaiq hagseng caeuq minzyijvwnz gunghcozcej bae daengz LungzcouhLaizbinhLiujgyanghYizcouhVujmingz caeuq mbangj yienh youq dieg Yougyangh guh hong diucaz gij coenz Bouxcuengh; (3) Sawj gij swmuj lahdingh cobouh sezgi ok aen Sawcuengh bingqyaem fueng’anq; (4) Doengzseiz, heuh Veiz Ging’vwnjCangh Ginhyuz daiq mbangj yozyenz bae 2 aen yangh CigyozVuhman youq ndaw Bet Gih Laizbinh Yen caeuq bae Lozdungh Gih Yizsanh Yen aeu Sawcuengh bingqyaem fueng’anq ngamq sezgi sat haenx banh le geij aen nungzminz yeyozbanh, aeu ndaej yaugoj haemq ndei.

Youq gaxgonq Yenz gyausou hwnjdin daeuj daengz Guengjsae , Cunghyangh Minzcuz Yozyen (seizneix heuh guh Cunghyangh Minzcuz Dayoz) youq ngoenz 1951 nienz 6 nyied 11 hauh ndaej laebbaenz, hainduj bae beizyin gij gaugaep ciennieb yinzcaiz Vahcuengh caeuq Sawcuengh. Gaengawq bien faenzcieng ngeixdauq Gangjgangj Gij Saeh Diucaz Vahcuengh SeizhaenxCangh Wnhyangj boux lauxsae Guengjsae Sawcuengh Hagdangz sij haenx, youq mwh 1952 nienz 8 nyied, 8 boux hagseng Vahcuengh ciennieb Cunghyangh Minzcuz Yozyen couh daeuj daengz Vujmingz, youq Bauhgyauz ndaw yienh neix lienhgangj lienhguh, gvaq buenq bi sat youh bae Laizbinh Cigyoz sizsiz ndwen ndeu, baihlaeng gyoengqde cungj rox gangj gij coenz Bouxcuengh youq song aen yienh Vujmingz caeuq Laizbinh lo.

Youq ngoenz 1954 nienz 7 nyied 23 hauh, aen Veijyenzvei Yenzgiu Cijdauj Cihsaw Bouxcuengh gvi Guengjsae Gveisae Bouxcuengh Swcigih (Couh) guenj haenx ndaej laebbaenz lo. Seizhaenx, youz boux couhcangj Gveiqsae Bouxcuengh Swcicouh Cinz Yinggih (vunz Bouxcuengh) dang cujyin veijyenz. Aen veijyenzvei ndaw de sez bangunghsiz caeuq gunghcozdui Sawcuengh, miz gunghcoz yinzyenz 26 vunz. Aen Veijyenzvei Yenzgiu Cijdauj Cihsaw Bouxcuengh laeb baenz le, baengh gij hezcu caeuq cijdauj conhyez duivuj youz Cunghyangh baiqdaeuj, doiq gij hong diucaz Vahcuengh caeuq dajcauhdoihengzsawqniemh Sawcuengh, de haenqrengz bae gyagiengz lingjdauj.

Baihlaj gangjgangj gij gidij cingzhingz bae diucaz Vahcuengh.

Youq ngoenz 1954 nienz 8 nyied 24 hauh, Yenz Gyahvaz gyausou caeuq Daih’it Yijyenz Gunghcozdui youz song boux sienseng Loz Gi’gvanghVangz Gin youq ndaw Cunghgoz Gohyozyen Yijyenz Yenzgiusoj daiqlingj haenx daeuj daengz Guengjsae, youq gij dungjyiz lingjdauj Cunghgung Guengjsae Sengjvei caeuq Gveisih Bouxcuengh Swcigih Dangjveij baihlaj, gapdoih gij gihgou saujsu minzcuz yijvwnz Guengjsae, itheij bae guh hong diucaz Vahcuengh. Baengh gij gezgoj diucaz gaxgonq, Gunghcozdui sien dawz gij coenz Bouxcuengh daihgaiq faenbaenz song aen fanghyenz baihbaek caeuq baihnamz hung, satle couh mbek vunz bae guh hong gidij lo. Song boux sienseng Loz Gi’gvanghVangz Gin daiq Cangh WnhyangjLiengz Gvanghcungh bae mbiengj baihbaek, fucwz gij hong diucaz fanghyenz baihbaek youq 38 aen diemj. Yenz Gyahvaz sienseng daiq Yenz Swjyi bae mbiengj baihnamz, fucwz diucaz gij fanghyenz youq 13 aen diemj. Baihlaeng mbiengj baihnamz lai dem liux song boux vunz, mingz de heuh Ouhyangz Gyozya caeuq Cangh Ginhyuz, cungj dwg sizsizswngh daj Baekging Dayoz daeuj.

Aenvih yenzlaiz miz giva, couh dwg yaek youq mwh 12 nyied cizcungh daujlun gij swhliu youq diucaz seiz aeu ndaej haenx, seizgan gaenj lo, song aen gunghcozcuj daengz gij dieg guh hong haenx mboujduenh gya vunz, cujyau dwg gaepsou gij gunghcoz ganbu dangdieg daeuj bangfwngz. Gij diucaz fuengfap seizhaenx dwg yienghneix:(1) Moix aen yijyenz diemj diucaz swzvei 2500 aen; (2) Ra ndaej bouxfatyaem habsik. Bouxfatyaem dwg doiqsiengq guh hong diucaz, daegbied youqgaenj, de wngdang dwg vunz Bouxcuengh caencaencingqcingq, aeu miz di vwnzva, doegsat siujyoz couh ndaej lo, mbouj rox cih mbouj ndaej, doeg saw daiq lai, lumj doeg daengz gauhcungh dayoz caemh mbouj hab, yienzaen dwg souh Hanyij yingjyangj lai, gij yijyinh de mbouj dan dwg coenz Bouxcuengh lo. Gangjdaengz gij nienzgeij bouxfatyaem, bouxvunz miz 30 daengz 40 bi ceiq habsik; de gangjcoenz aeu gangj ndaej cingcingcujcuj, mbouj ndaej miz gezhan lumj faenz veuj bak hup mbouj ndaej yiemz, gij vanzgingj de youq haenx, vunz youq seiqhenzdieg cungj sawj dwg vunz Bouxcuengh, boux youq mbanj lablabcabcab haenx mbouj ndaej genj daeuj guh bouxfatyaem. (3) Geiq yaem itlwd sawj gozci yinhbyauh; (4) Gvinab ok yijyinh hidungj. Neix dwg hong gatsat, swhyienz dwg youz boux gyausou daiqdoih haenx bae gag guh sat.

SeiqGij Saeh DajcauhSawqniemh Caeuq Baecinj Sawcuengh Lahdingh Cihmeh

I. Dajcauh Sawcuengh Lahdingh Cihmeh

Ginggvaq guh gij hong Vahcuengh bujcaz youq lajbyonghbi 1954 nienz caeuq baihlaeng doiq gij swhliu Vahcuengh guh  cingjleixfaensikyenzgiu, caiq gyahwnj gaepsou gij cihsiz Vahcuengh youz yozsuz senhcih Liuz CwzgizDingh VwnzgyanghVwnz YoujLij Fanghgvei dwngj cwkrom, youq codaeuz 1955 nienz, Daih’it Yijyenz Gunghcozdui (bouxdaeuz de dwg Yenz Gyahvaz gyausou) youz Cunghyangh baiqdaeuj neix caeuq Gveisae Bouxcuengh Swcicouh Bouxcuengh Vwnzsw Yenzgiu Cijdauj Veijyenzvei hix gihbwnj aeundaej rox gij gaimau Vahcuengh, de couh dwg: (1) Vahcuengh faenbaenz baihnamz caeuq baihbaek song aen fanghyenz hung; (2) Youq song aen fanghyenz hung baihbaek caeuq baihnamz ndaw de youh faen ok lai aen dujyijgih gij vunz sawj coenz Vahcuengh mbouj doxlumj; (3) Gij mbouj doxdoeng ceiq yienhda youq cungqgyang song aen fanghyenz hung baihnamz caeuq baihbaek, dwg de miz mbouj miz soengqheiq saekyaemsoengqheiq saekcatyaem singmeh caeuq miz mbouj miz aen singmehrdoglaeb. Aeu sojmiz gij cihsiz mizgven Vahcuengh guh giekdaej, youq ngoenz 1955 nienz 4 nyied 27 hauh, aen hoih Guengjsae Bouxcuengh Cihsaw Vwndiz Codanzvei youq Namzningz gawjhengz, youq ndaw hoih neix, gyoengq vwndiz, lumj gihcuj fanghyenz Vahcuenghbiucinjyinh caeuq fueng’an cihsaw cungj ndaej dawz daeuj daujlun. Daj gij lizsij dajcauh Sawcuengh daeuj yawj, aen codanzvei neix dwg aen hoih youqgaenj dangqmaz. Gij dizdiemj hai aen hoih neix, dwg youq aen veiyisiz hung sam laeuz youq meh bangunghlaeuz ndaw couhfuj Gveisae Bouxcuengh Swcicouh (neix dwg Namzningz Si Mingzsiudunghlu 238 hauh, gaxgonq dwg gij diegyouq bangungh Namzningz Digih Hingzcwng Gunghsuj. Gij vunz daeuj camgya hai hoih baugvat:(1)Lingjdauj Bouxcuengh; (2)SewjgiujginzgohNgozvwnz: Г.П.Сердюченко, boux yijyenz con’gya Suhlenz;(3)Fu Mauciz, boux fusojcangj Cunghyangh Yijyenz Yenzgiusoj(4) Gyoengq gunghcoz yinzyenz boux bae camgya diucaz (bujcaz) Vahcuengh; (5) Gij vunz daj Yijveijvei (Gveisae Bouxcuengh Swcicouh Bouxcuengh Cihsaw Yenzgiu Cijdauj Veijyenzvei) daeuj haenx. Vunz daeuj hai hoih haemq lai, sam laeuz veiyisiz hung haenx dauq naengh rim lo. Gak boux sienseng Yenz GyahvazLiengz MinjCangh GinhyuzVeiz Gingvwnj dwngj cungj mizfaenh camgya aen codanzvei neix.

Gij cujyau neiyungz aen codanzvei neix dwg: (1) Yenz Gyahvaz veibau gij cingzgvang diucaz Vahcuengh, daezok gij naemjfap baenzlawz sezgi Sawcuengh fueng’an caeuq baenzlawz dingh aen diemj biucinjyinh Vahcuengh, ndawde Sawcuengh fueng’an caeuq aen diemj biucinjyinh Vahcuengh vunz cenglwnh ceiq lai. Hoeng mbat codanzvei neix daihgya fatyiengz minzcuj cukgaeuq, gaengawq gij cingzgvang faenbouh Vahcuengh, dingh aeu fanghyenz Vahcuengh baihbaek guh aen fanghyenz giekdaej, aeu gij yaem coenz Bouxcuengh Vujmingz (ranghdieg Singzsieng caeuq Suenggyauz) youq ndaw fanghyenz Vahcuengh baihbaek haenx guh biucinjyinh, aeu gij swmuj lahdingh guh cujyau fuzhauh bingqsij, sezgi ok dauq Sawcuengh Fueng’an (caujanq), cingzbauq Guengjsae Swngj Yinzminz Veijyenzvei. Vih sawj aen diemj biucinjyinh ndaej lai sikwng fanghyenzdenj gizwnq engq lai di, aen fangh’an neix dawz gij fufujyinh pl”、“mlcaeuqklyouq ndaw yinhhi coenz Bouxcuengh Vujmingz hoeng gij coenz Bouxcuengh gizwnq mbouj ciengz raen haenx vuenh baenz gij ngozvaqyinhpj”、“mjcaeuqkjgizwnq dieg Bouxcuengh ciengz raen haenx bae, caemh lai gya aen singmehácaeuq song aen yinhmeheicaeuqoudem.

Gij hong yenzgiu caeu dajcauh cihsaw Bouxcuengh dwg aen gocwngz dwgrengz fanfoek siugaijmboujduenh bienq ndeicaez ndeu. Seizhaenx, Cinz Yinggih, boux cujsiz Gveisae Bouxcuengh Swcigih giem cujyin aen Veijyenzvei Yenzgiu Cijdauj Bouxcuengh Cihsaw youq baihlaj Gveisae Bouxcuengh Swcigihginggvaq lai baez cizcungh vunz daeuj hai gakcungj veiyi, fanfuk daujlun dauq Sawcuengh Fueng’an (caujan)neix. Aen Sawcuengh Fueng’anq (caujanq) Cingqsik sezgi okdaeuj haenx, ginggvaq daih 17 baez hingzcwng veiyi Gveisae Bouxcuengh Swcigih Yinzminz Cwngfuj doenggvaq, dawz liux cingzbau Guengjsae Sengj Yinzminz Veijyenzvei hawj de cienj Gozvuyen cingjgouz baecinj vaih, lij daegdaengj youq Gvangjsih Yizbau ngoenz 1955 nienz 12 nyied 11 hauh gunghbu, vih ndaej engqlai cwnggouz yigen.

II. Gij Saeh Sawqniemh Caeuq Baecinj Sawcuengh Lahdingh Cihmeh

 Aen hoih Guengjsae Bouxcuengh Cihsaw Vwndiz Codanzvei bi 1955 ndaej gijhengz gvaq le, gij neiyungz Sawcuengh Fueng’an (caujan) couh gihbwnj dingh roengzdaeuj lo. Gaenlaeng, Gij vunz Daih’it Yijyenz Gunghcozdui youz Cunghyangh baiq daeuj haenx caeuq gyoengqvunz guh hong youq Veijyenzvei Yenzgiu Cijdauj Cihsaw Bouxcuengh youq ndaw Gveisae Bouxcuengh Swcicouh cienzbouh daj diegyouq Namzningz buen bae daengz Mingzsiuyenz, aen ranzgaeuq Luz Yungzdingz youq Yienh Vujmingz. Ciepdwk couh dwg guh gij hong biensij gyaucaizswzdenj, biensij sat le couh dawz aeu bae okbanj, lij banh hagdangz beizyin ganbu. Caemh youq lajmbanj Bouxcuengh sawqdiemj doihengz Sawcuengh, sien youq song aen dieg VujmingzLaizbinh sawq aeu Sawcuengh youq ndaw fueng’an haenx bae son hag, aeu ndaej haujlai gingniemh dijbauj okdaeuj. Siusik ndei aen ciep aen, daih’it aen hagdangz Sawcuengh youq Guengjsae youq ngoenz 1956 nienz 3 nyied 19 hauh ndaej laebbaenz, neix dwg seizgonq gyaegyae lij caengz raen gvaq. Aen hagdangz neix sikhaek gijhingz geiz daih’it Sawcuengh yozsizbanh, cingqsik beizyin gyoengq ganbu doihengz Sawcuengh.

Youq ngoenz 1956 nienz 4 nyied 17 hauh, aenSawcuengh Fueng’an (caujan) neiyungz youh gaij bae di neix daih ngeih baez dawz bae soengq hawj Guengjsae Sengj Yinzminz Veijyenzvei, boux swngjcangj Guengjsae Veiz Gozcingh ciuhai conmwnz veiyi Swngj Yinzminz Veijyenzvei, dingqaeu gij veibau mizgven neiyungz lumj gocwngz dajcauh Sawcuenghgij cingzgvang fanjyingj youq baihlaeng gunghbu Sawcuengh Fueng’an (caujan) caeuq gij yaugoj son caeuq hag Sawcuengh youq gak dieg sawqniemh, daengz gij seizgan daujlun youq gwnz hoih, boux camgya haihoih caezcaez haengjdingh gij saeh dajcauh Sawcuengh miz gij bizyausing youqgaenj de, cungj doengzeiq dawz Sawcuengh Fueng’an (caujan) bae soengq hawj Gozvuyen saemjbae. Youq mboengq ndwen 10 nyied 1957 nienz, ndaej Gozvuyen veijdoz, Cunghgoz Vwnzsw Gaijgwz Veijyenzvei lienzdaeb song baez iucingj yijyenzyozgya Baekging Vangz LizLij SuzsienghCiz SiyungzMaj Yozliengz, gyoengq cien’gya Guengjsae guh hong diucaz yenzgiu Vahcuengh caeuq Huz Gyauzmuz dwngj gij vunz youq ndaw sevei gohyozgai, daujlun dauq Sawcuengh Fueng’an (caujan) youz Guengjsae Sengj Yinzminz Cwngfuj sangbau iugouz Gozvuyen saemjbae haenx. Youq ngoenz 1957 nienz 11 nyied 29 hauh, daih 63 baez veiyi aen cenzdij veiyi Gozvuyen youz Couh Wnhlaiz cungjlij cujciz haenx daujlun doenggvaq leAen Baugau Mizgven Geij Hangh Yenzcwz Sezgi Cihmeh Youq Ndaw Daujlun Sawcuengh Fueng’an Caeuq Gizyawz Siujsoq Minzcuz Cihsaw Fueng’anyouz Cunghgoz Vwnzsw Gaijgwz Veijyenzvei cwngzbae haenx.Sawcuengh Fueng’an (caujan) ndaej baecinj le, Gozvuyen cijsi Guengjsae youq ndaw gocwngz doihengz fueng’an, aeu louzsim seizseiz cungjgez gij gingniemh de, sawj aen fueng’an neix engqgya ndeicaez, caemh mingzgoz naeuz danghnaeuz baihlaeng siugaij Sawcuengh Fueng’an (caujan) , youz Guengjsae dawz de sangbau Gozgyah Minzcuz Swvu Veijyenzvei saemjbae couh ndaej lo. Youq ngoenz 1958 nienz 1 nyied 22 hauh, Guengjsae Sengj Yinzminz Veijyenzvei youq gwnz Gvangjsih Yizbaugunghbu aen Sawcuengh Fueng’an (caujan) youz Gozvuyen baecinj neix, Gvangjsih Yizbaulij doengzseiz fatbiuj ok bien selunAngqhoh Sawcuengh Fueng’anq Ndaej Gunghbundeu. Daj ngoenz haenx suenq hwnj, Bouxcuengh daj seizgonq gyaegyae byaij daengz seizneix youq gwnz lizsij daih’it baez miz gij cihsaw youh habfap youh doengjit bonjfaenh lo.

HajCauhnieb Seiz Mbouj Lau Haemzhoj, Gamj Ngeix Gamj Guh Caemh Siengj Caenh Banhfap Bae Guhbaenz

Dajcauh Sawcuengh lahdingh cihmeh, neix dwg aen saehnieb vunz ciuhlaux lij caengz ngeix gvaq guh gvaq, youq gij nienzdaih 1950, gyoengq banlaux cauhnieb seiz mbouj lau haemzhoj, gamj ngeix gamj guh caemh siengj caenh banhfap bae guh baenz, dawz gij saeh ndei Dangj caeuq Guekgya gyau hawj haenx saedsaedcaihcaih guh ndaej lo. Youq aen gocwngz neix, gij vunz baenz cien hwnj fanh vih aen saehnieb moq neix bae ok hanh youh ok rengz. Baihlaj gangjgangj geij aen laeh de.

   Yenz Gyahvaz, dwg boux gyausou ndaej youq ranzbezsu ndaw gek bet fungh ranz youq Baekging Dayoz, hoeng de vutvak gij swnghhoz ndangsoeng youh ndaej cit sezgyah youh ndaej doeg saw youq henz daiz haenx, byaj haeuj minzcuz digih bae guh hong diucaz, bungz daengz haemzhoj hix sim gam cingznyienh.  

Cangh Ginhyuz, boux lwgsau lij oiq doeg saw youq Baekging Dayoz, youq cungqgyang diucaz mizseiz deng laemx roengz dieg, daengx ndang cungj dwg uq boengz uq raemx, de hix mbouj swenj dai, raen nanz bungz nanz lai dauq mbouj lau nanz maz lo, daengz diucaz gatsat de dauq youh ndaej saehnieb cinbu youh ndaej aicingz habhoz, lienz mbwn cungj bang de.

Caemh miz gij gojgaeq lici daj bouxdajcawj bienqbaenz conhgyah.Youq seiz diucaz coenz Bouxcuengh, boux dungzci Bouxcuengh daeuj guh couh engqgya raen yungzheih, danghnaeuz de miz di vwnzva, mbouj sawj song diemjcung couh ndaej hag rox lo.” Cangh Wnhyangj sienseng youq bien faenzcieng ngeixdauq de daez daengz aen laeh boux ganbu minzyijvwnz ndaej bienq lauxhangz vaiqvatvat ndeu, de yienghneix sij:Veiz Yijgyiengz cungqgyang cij daeuj bang guh hong, ngamq daeuj seiz cij bang bae cauj byaek cawj haeux, byawz rox mbouj geij nanz couh rox baenzlawz diucaz, gag rox guh hong lo, gyoengqraeuz (daihhagseng) bungz daengz gijmaz mbouj rox lij sawj bae cam de.

Caemh mbouj ndaej lumz gyoengqvunz Bouxcuengh bae nyiedcingz hag Sawcuengh haenx. Siengj daeuj gyoengqvunz neix cungj dwg gij inghyungz mbouj rox mingz. Sawcuengh lij caengz ndaej cingqsik doihengz gaxgonq, caemh aeu de bae mbangj dieg lumj Cizgyoz ndaw Laizbinh Yen sien sawqniemh, miz meh mehmbwk ndeu umj boux lwgnyez lij gwn raemxcij he caemh daeuj  dingq gangjgo, hawj vunz youh gamjdoengh youh gamjdan. 

Gij laeh baihgwnz gangj haenx, caiq gya haujlai aenlaeh raeuz lij caengz rox haenx, gyonj hwnjdaeuj gangj couh dwg: Dajcauh saehnieb moq seiz cungj bungz daengz haujlai haemzhoj, hoeng mbouj ndaej lau, gamj ngeix gamj guh caemh siengj caenh banhfap bae guh gatsat cungj ndaej guh baenz.

RoekYouq Hingzseiq Moq Baihlaj Laebdaeb Vih Guh Ndei Hong Sawcuengh Lai Roengzrengz

Gij saeh dajcauhdoicaenh gij fanveiz sawjyungh Sawcuengh lahdingh cihmeh, dwg aen sizcenj hungmbwk Dangj raeuz youq ndaw saedhengz aen cidu minzcuz gihyiz swci youq Guengjsae gaenlaeng Cungguek moq ndaej laebbaenz.

Aen 60 bi de ndaej dajcauh okdaeujndaej dawz bae doigvangq youq dieg Bouxcuengh neix, dwg aen 60 bi gij saehnieb siujsoq minzcuz yijvwnz Guengjsae, caiq gangj hung di, dwg gij saehnieb siujsoq minzcuz yijvwnz Cungguek mboujduenh ndaej dansozfazcanj caeuq cauhmoq de. Gij sizcenj doihengz Sawcuengh youq ndaw 60 bi neix, cungqgyang ginggvaq fwnfwnrumzrumz, boux guhhong minzcuz yijvwnz daj ndaw de doiq gij fanveiz sawjyungh Sawcuengh youq gak lingjyiz gwnzbiengz caemh miz engqlai yinsiz ganjsing caeuq bajbingq lijsing lo. Saedceij ngoenz bae youh ngoenz dauq, aen lunzconz hung lizsij gaenq biuhaeuj daengz 21 sigij, youq gij ndawbiengz gougen vwnzva dohyenz Guengjsaecoicaenh minzcuz vwnzva ndaej mwnhoengh caeuq gak minzcuz yijyenz vwnzsw doxhuz caemhyouq doengzcaez fazcanj, baenzlawz bae fazveih gij cozyung cizgiz Sawcuengh, dauq bienq baenz aen youqgaenj mbe’gvangq gij lingjyiz swnghcunzfazcanj Sawcuengh ndeu.     

Bineix dwg 60 hopbi Gozvuyen baecinj aen Fueng’an Sawcuengh, vih gou dwg boux hagseng ciennieb Vahcuengh caeuq Sawcuengh youq ndaw Minzcuz Yijvwnz Sam Hi Cunghyangh Minzcuz Yozyen, gou daj gyaeuj daengz rieng cungj siengsaenq Sawcuengh lahdingh cihmeh miz gij rengz seng hungmaj akdangqmaz, caemh muengh ndaej daj gij gigaiq banlaux mbouj lau cien nanz fanh hojgamj bae guh hix rox baenzlawz cij guh ndaej baenz seiz dajcauh Sawcuengh haenx gaepsou yingzyangj cingsaenz, dawz gij hulenzvangj seizdaih saenqsik bauqcaq seiz neix guh lizcuzdenj, gemj gij doxgaiq gwnz ndang hawj lai mbaeu di, mbouj lau naet, ciuz aen fuengyiengq saehnieb byaijbaenaj,youq hingzseiq moq baihlaj laebdaeb vih guh ndei hong Sawcuengh lai roengzrengz.