当前位置: > 民族语文翻译 > 在线阅读 >

壮语文广播学校系列:越南特色美食米粉

发表时间:2016-12-06 10:09  责任编辑:广西民语委  点击:次  来源:未知
Faenj Miz Daegsaek Yeznanz
越南特色美食米粉
 
      Bouxyouz guekrog bae daengz Yeznanz, cungj roxnyinh Yeznanz dauqcawq miz faenj gai. Mboujlwnh dwg gai hung gai iq, roxnaeuz ndaw singz lajmbanj, gizgiz raen miz diemq faenj dan faenj. Seuq mbouj seuq mbouj gamj naeuz, hoeng feihdauh cix haemq ndei, gij vunz laihnaeuz dan faenj lawz ceiq ndei gwn, dan faenj haenx couh ciengz dwg baizdui raez lumj duzlungz nei.
      Faenj miz faenj nohvaiz, faenj nohgaeq, faenj haijsenh daengj haujlai cungj, bouxhek caemh ndaej ciuq swhgeij yienghlawz habbak, senj gya ciengqbya, ciengqvan, ciengqmanh roxnaeuz raemxsuenq lauz roengz faenj bae, lij boiq miz duhngaz, byaekhom, yangzcungh caeuq lwgmanh iq doengh gij byaek neix dem. Seizneix Yeznanz gak aen diemqfaenj cungj miz vanj hung vanj iq caeuq nohvaizndip nohviazcug hawj bouxhek gag senj aeu. Ciuq vanj faenj hung iq, noh lai noix caeuq boiq byaek, goj ndaej dawz faenj faen baenz bingzciengz, haemq ndei, gig ndei sam cungj. Gak dieg miz gak dieg fungsug, Yeznanz gak dieg gij faenj feihdauh caeuq guhfap hix mbouj doengz. Lumjnaeuz youq baihnamz, miz di dieg gyaez youq ndaw faenj coq di byaekyiemzsih caeuq byaekhaeu. Youq Hoznei, gwn faenj seiz lij gyaez gya deb youzdiuz ndeu. Danghnaeuz ciuq dieg daeuj faen, faenj faen miz sam bai: Faenjbaihbaek, Faenjswnva, Faenjsihgung. Ndawde, Faenjbaihbaek hamz di, Faenjsihgung diemz di, caemhcaiq boiq byaek engq lai, linghvaih Faenjsihgung beij Faenjbaihbaek diuz iq di.
      Faenj ndei mbouj ndei gwn couh yawj raemxdang lo, Raemxdang dwg aeu ndok gahengh duzvaiz daeuj ngaeuz baenz, ngaeuz gaxgonq aeu dawz gij noh dik seuq bae. Ngaeuz seiz coq gij hing, caujdougou, byaeklauxceiz, dinghyangh doengh gij yanghliu neix roengzbae caemh ngaeuz. Ndaw raemxdang miz gai、diet doengh gij yensu neix. Aenvih Yeznanz youq rangh dieg ndat, seizhah aeng, youq rog nanz le ok han lai vunz baeg. Gwn vanj faenj nohvaiz ndeu couh ndaej gibseiz bouj yingzyangj lo.
      Faenj dwg seizlawz miz caeuq goek de youq gizlawz, seizneix Yeznanz lij caengz duenhdingh cingcuj. Miz cungj gangjfap ndeu nyinhnaeuz, faenj dwg daj Nanzding Swngj Baihbaek Yeznanz daeuj. Lingh cungj gangjfap naeuz, faenj dwg daj Yeznanz cunghbu daeuj. Daihsam cungj gangjfap naeuz , faenj dwg daj Cungguek Gvangjdungh gij faenj nohvaiz bienq gvaqdaeuj. Dingzlai vunz nyinhnaeuz daihgaiq 20 sigij co couhmiz faenj lo.
      1954 nienz, Yeznanz gungcanjdangj lingjdauj  vunzlai dwkbaih Fazgoz cizminzcej. Giuq gij swhliu Yeznanz geiqnaeuz, Dangseiz  miz mbangj beksingq daj baihbaek senj daengz baihnamz daeuj seiz, hix dawz faenj daiq daengz baihnamz daeuj. Ceiq co’nduj, faenj cijmiz faenj nohvaizcug cungj ndeu, doeklang daegsaek gijgwn gak dieg hix gya haeujdaeuj,  caiqlij yungh gij guhfap oemq nohvaiz Fazgoz. Seizneix faenj gaenq cienz daengz seiqgaiq, lumjnaeuz, Yeznanz bonjdieg faenj mizmingz lenzsoj binjbaiz 24 faenj, youq Genjbujsai, Sinhgyahboh, Yinniz, Hanzgoz, Yizbwnj caeuq Audaliya daengj guek cungj hai miz faendiemh.



越南特色美食米粉
 
   对于外国游客来说,到越南就仿佛到了米粉的海洋。越南大街小巷、城镇乡村随处可见米粉店、米粉摊。虽然卫生条件不敢恭维,但味道都很不错,人们为某家特别好吃的米粉排长队,很常见。
   牛肉粉、鸡肉粉、海鲜粉种类非常多,食客可以根据自己口味放入鱼露、甜酱、辣酱或蒜汁等,配菜包括豆芽、香茅、洋葱和小辣椒等。现在越南各个米粉店都向顾客提供大小碗、生熟牛肉等选择。根据米粉配菜、肉量和碗大小,可将米粉分为普通、豪华和超豪华三种。十里不同天,百里不同俗。沿着越南狭长的领土一路南下,米粉的口味和做法也不同。比如在南方一些地方会向米粉中加入一些芫荽和香花苣。在河内,吃粉的同时,还会再上一碟油条。如果以地域划分,米粉有三大流派:北方粉、顺化粉和西贡粉。其中,北方粉偏咸。西贡粉偏甜,且所配青菜种类更多,另外西贡粉的个头较北方粉小。
  米粉好吃与否关键在汤上,汤是用大铁锅熬制的牛骨汤。要选用牛的小腿骨,并且剔干净肉。撒入姜、草豆蔻、茴香、丁香等香料熬制。汤内富含钙、铁等微量元素。由于越南地处热带地区,夏季炎热,长时间置身室外会因出汗消耗大量体力。来上一碗牛肉粉可以及时补充所需营养。
  对于米粉的产生时间和源头,目前越南学术界还存在争议。有一种观点认为,米粉起源于越南北方的南定省。另一种观点认为,米粉产生于越南中部。第三种观点认为米粉是从中国广东的牛肉粉发展演变而来。大多数观点倾向于米粉产生的时间大约在20世纪初。
1954年,越南共产党领导军民击败法国殖民者。据越南资料记载,当时一部分从北方迁居南方的百姓将米粉带到了南方。最开始,米粉只有熟牛肉粉一种,后来各地特色饮食文化加入进来,甚至还融入了法国焖牛肉的作法。如今米粉已走向世界,比如,越南本地著名的米粉连锁品牌24粉,在柬埔寨、新加坡、印尼、韩国、日本和澳大利亚等国都开设了分店。