十八大报告

发表时间:2014-09-09 14:13  责任编辑:广西民语委  点击:次  来源:未知


GIENDINGH MBOUJ BIENQ RIENGZ DIUZ ROEN
SEVEICUJYI MIZ CUNGGUEK DAEGSAEK BYAIJ BAENAJ
VIH CIENZMIENH HWNQBAENZ AEN BIENGZ SIUJGANGH BAE BUEKGUH 
                                                                                    
    ——Aen Baugau Youq Gwnz Cunghgoz Gungcanjdangj Daih Cibbet Baez Daengx Guek Daibyauj Daihhoih
                      ( 2012 nienz 11 nyied 8 hauh)
                           Huz Ginjdauh
 
Gak boux dungzci:
Seizneix, gou daibyauj Daih Cibcaet Gaiq Cunghyangh Veijyenzvei yiengq daihhoih guh baugau.
    Cunghgoz Gungcanjdangj Daih Cibbet Baez Daengx Guek Daibyauj Daihhoih, dwg baez daihhoih cibfaen youqgaenj ndeu, de youq guek raeuz haeuj daengz cienzmienh hwnqbaenz aen biengz siujgangh mboengq miz gietdingh singqcaet neix ciuhai. Aen cawjdaez daihhoih dwg: Yaengxsang mbaw geiz hungmbwk yiengh seveicujyi miz Cungguek daegsaek, aeu Dwng Siujbingz Lijlun、“Sam Aen Daibyauj” Cung’yau Swhsiengj、Gohyoz Fazcanjgvanh daeuj ceijyinx, gaijfang swhsiengj, gaijgwz hailangh, gietcomz ligliengh, gungroengz hojnanz, giendingh mbouj bienq riengz diuz roen seveicujyi miz Cungguek daegsaek byaij baenaj, vih cienzmienh hwnqbaenz aen biengz siujgangh bae buekguh.
    Seizneix mwhneix, raeuz miz cungj roxnyinh doxdoengz ndeu: Ginggvaq goujcib lai bi ganhoj buekguh, aen dangj raeuz comzgiet daiqlingx daengx guek gak cuz beksingq, dawz aen Cungguek gaeuq gungzhoj doeklaeng ndeu, bienqbaenz aen Cungguek moq ngoenz doek ngoenz byaij coh mwnhoengh fouqak ndeu, Cunghvaz Minzcuz daih fukhwng yienh ok gij gingjsaek baihnaj ronghsagsag. Raeuz doiq gij niebcik hungmbwk gwnz lizsij dangj caeuq beksingq cauhok haenx engqgya roxnyinh miznaj, doiq gij lijsiengj saenqniemh dangj caeuq Beksingq dinghlaeb haenx engqgya giendingh, doiq gij lizsij cwzyin dangj raeuz rapdawz haenx engqgya cingsingj.
Seizneix, biengzcingz、 guekcingz、 dangjcingz laebdaeb fatseng bienqvaq laegdaeuq, raeuz dangqnaj roebdaengz gij hwngfat seizgei caeuq wngqdoiq fungyiemj nanzdaez haenx doenghbaez caengz miz gvaq. Daengx dangj itdingh aeu geiqmaenh gij saenqnyaemh caeuq daknaek beksingq, engqgya haenqrengz guh ok cingzcik、 nyinhcaen fucwz bae guhhong, laebdaeb doidoengh gohyoz hwngfat、 coicaenh aen biengz huzndei, laebdaeb gaijndei gij gwndaenj beksingq、 demcaenh gij vuenyungz beksingq, guhbaenz gij yinvu miznaj youh gannanz seizdaih gyauhawj haenx.
 
1. Gij Hong Haj Bi Gvaqbae Caeuq Gij Gihbwnj Cungjgez Cib Bi Daeuj
 
    Cibcaet Daih doxdaeuj haj bi neix, dwg haj bi raeuz youq gwnz roen seveicujyi miz Cungguek daegsaek haenqrengz roemx baenaj, dwg haj bi raeuz dingjsouh ndaej gak cungj hojnanz caeuq fungyiemj gaujniemh、 duedaeu cienzmienh hwnqguh aen biengz siujgangh caiq ndaej hingz.
    Cibcaet Daih doiq doicaenh gaijgwz hailangh caeuq hwnqguh seveicujyi yendaiva、 saedyienh aen muzbyauh hungmbwk cienzmienh hwnqguh aen biengz siujgangh guh ok cienzmienh baijbouh. Vih gvancez gij cingsaenz Cibcaet Daih, cunghyangh gonqlaeng ciuhai caet baez cienzhoih, faenbied couh gyalaeg gaijgwz hingzcwng guenjleix dijci、doicaenh lajmbanj gaijgwz hwngfat、gyagiengz caeuq gaijndei hingzseiq moq hwnqguh aen dangj、ceiqdingh “cibngeih-haj” gveihva、doicaenh vwnzva gaijgwz hwngfat daengj vwndiz hungnaek gvanhaeh daengz daengxbuenz neix, guh ok gietdingh caeuq baijbouh. Haj bi daeuj, raeuz ciuq yawhdingh muzdiz guhbaenz “cib’it-haj” gveihva, swnhleih hengzguh “cibngeih-haj” gveihva, gak fuengmienh hong cungj aeundaej cwngzciu hungnaek moq.
    Ginghci hwngfat ndaej bingzonj haemq vaiq. Gyoebhab gueklig daih fukdoh daezswng, 2011 nienz ndaw guek swnghcanj cungjciz dabdaengz 47.3 fanh ik maenz. Caizcwng souhaeuj daih fukdoh demgya. Gij gyoebhab swnghcanj naengzlig nungzyez ndaej daezsang, haeuxgwn bi dem bi demcanj. Diuzcingj canjnieb gezgou caiq ndaej hwngfat baenaj, giekdaej sezsih cienzmienh gyagiengz. Hawsingzvaq suijbingz daezsang yienhda, singz mbanj gak dieg doxdaengh hwngfat ndaej demgiengz. Hwnqguh aen guekgya ak cauhmoq haenx cingzyauq yienhda, dap vunz mbin mbwn、 aen gunghcwngz damqcaz ronghndwen、 dap vunz ndaem raemx laeg、 cauhgiz gisongih、gauhsuz dietloh daengj saedyienh cungbyoengq hungnaek. Hwnqguh swnghdai vwnzmingz ndaej netsaed mbehai guh, mbaetyungh swhyenz caeuq baujhoh vanzging ndaej cienzmienh doi baenaj.
    Gaijgwz hailangh ndaej hwngfat baenaj gig daih. Gij gyoebhab gaijgwz lajmbanj、gaijgwz cizdij linzgenz cidu、gaijgwz guekmiz giyez ndaej mboujduenh gyalaeg, gij ginghci mbouj dwg gunghyoujci ndaej cangqvuengh hwngfat. Gij hawciengz dijhi yienhdaih caeuq hungzgvanh diuzgung dijhi ndaej mboujduenh laeb caezcienz, caizsui、 ginhyungz、 gyagwz、 gohgi、 gyauyuz、 ndawbiengz baujcang、 yihyoz veiswngh、 saehnieb danhvei daengj gaijgwz yamqonj doi baenaj. Yiengh ginghci hailangh dabdaengz suijbingz moq, cingouj cuzgouj cungjngeg yat daengz seiqgyaiq vih daihngeih.
    Gij gwndaenj suijbingz beksingq daezsang yienhda. Gij rengz gaijndei saedceij beksingq ndaej mboujduenh gyadaih, singz mbanj couhnieb laebdaeb gyadaih, gihminz souhaeuj demlai haemq vaiq, gyahdingz caizcanj onjdingh demgya, gij diuzgen gwn、 daenj、 youq、 byaij、 yungh ndaej gaijndei yienhda,  aen byauhcunj baujcang ceiq daemq gwndaenj singz mbanj caeuq aen byauhcunj banggungz lajmbanj ndaej daih fukdoh daezswng, gij cienz gihbwnj ciengxlaux gyoengq vunz duiyouh ndaw giyez ndaej lienzdaemh daezsang.
    Hwnqguh minzcuj fazci byaij ok yamq moq. Cwngci dijci gaijgwz laebdaeb doi baenaj. Saedhengz singz mbanj ciuq vunzsoq beijlaeh doxdoengz bae senjgij yinzda daibyauj. Gihcwngz minzcuj mboujduenh hwngfat. Yiengh faplwd dijhi seveicujyi miz Cungguek daegsaek ndaej cauxbaenz, hwnqguh seveicujyi fapceih guekgya cingzcik yienhda. Gyaezguek doengjit cansen ndaej gyamaenh hungcoek. Hingzcwng dijci gaijgwz ndaej gyalaeg, gaijgwz swhfaz dijci caeuq gunghcoz gihci caiq ndaej hwngfat baenaj.
    Hwnqguh vwnzva yamq hwnj mbaek moq. Hwnqguh aen haedsim gyaciz dijhi seveicujyi ndaej guh haeujlaeg bae, vwnzva dijci gaijgwz cienzmienh doi baenaj, hwnqguh goenggungh vwnzva fugsaeh dijhi  ndaej hwngfat baenaj gig daih, vwnzva canjnieb hwngfat riengjvaiq, vwnzva dajcauh cozbinj swnghcanj engqgya mwnhoengh, beksingq cingsaenz vwnzva swnghhoz engqgya lai cungj lai yiengh. Daengxcungq beksingq lienhndang caeuq dijyuz doxdax aeundaej cingzcik moq.
    Hwnqguh aen biengz caiq lai ndaej cinbu. Gihbwnj goenggungh fugsaeh suijbingz caeuq bingzdaengj cingzdoh daezsang yienhda. Gyauyuz saehnieb hwngfat riengjvaiq, singz mbanj cienzmienh saedyienh yivu gyauyuz mienxcienz. Cauhlaeb ndawbiengz baujcang dijhi cingzyauq yienhda, singz mbanj gihbwnj ciengxlaux baujyiemj cidu cienzmienh laebhwnj, yiengh ndawbiengz gouqbang dijhi moq daihdaej cauxbaenz. Gihbwnj saedyienh daengxcungq beksingq camgya yihbauj, cobouh laebhwnj singz mbanj gihbwnj yihliuz veiswngh cidu. Hwnq gij ranzyouq dwg baujcang singqcaet de ndaej gyavaiq doi baenaj. Gyagiengz caeuq cauhmoq ndawbiengz guenjleix, gwnzbiengz baujciz huzndei onjdingh.
    Hwnqguh gozfangz caeuq ginhdui ndaej cauh ok gizmen moq. Gij ginhsw bengwz miz Cungguek daegsaek haenx aeundaej cwngzciu hungnaek, hwnqguh ginhdui gwzmingva yendaiva cwnggveihva ndaej doxdaengh doi baenaj、 cienzmienh gyagiengz, caepcawq guh ginhsw doucwngh ndaej mboujduenh gyalaeg, gij naengzlig hengzguh yiengh lizsij sawjmingh sigij moq duenh seizgeiz moq demgiengz gig yienhda, gig ndei bae guhbaenz baenzroix yinvu gaenj、 hoj、 yiemj、 naek.
    Gij hong Gangj Au Daiz caiq ndaej gyagiengz. Yanghgangj、 Aumwnz baujciz mwnhoengh onjdingh, caeuq diegndaw gyaulouz gapguh daezsang daengz suijbingz moq. Doidoengh song hamq gvanhaeh saedyienh cienjbienq hungnaek, saedyienh song hamq cienzmienh cigsoh song yiengq “sam doeng”,  ciemdingh saedhengz  aen gvaengxgyaq hezyi  song hamq ginghci gapguh, cauxbaenz aen gwzgiz song hamq gak fuengmienh cungj miz baedauq, haicauh aen gizmen moq song hamq gvanhaeh hozbingz hwngfat.
    Gij hong vaigyauh aeundaej cwngzciu moq. Giendingh henhoh gij leihik guekgya  caeuq gij gienzik habfap gunghminz、 fazyinz guek raeuz youq rog guek haenx,  gyagiengz caeuq seiqgyaiq gak guek gyaulouz gapguh, doidoengh bengwz aen ceihleix gihci cienz seiqgyaiq, gaenxmaenx coicaenh seiqgyaiq hozbingz caeuq hwngfat, youq ndaw hongsaeh guek caeuq guek gij daibyaujsing caeuq gij gienz gangjvah ndaej caiq demgiengz, vih gaijgwz hwngfat ceng ndaej le aen gozci vanzging mizleih.
    Hwnqguh aen dangj ndaej cienzmienh gyagiengz. Hwnqguh gij naengzlig  gaemgienz caeuq  gij senhcinsing aen dangj ndaej laebdaeb doi baenaj, hwnqguh swhsiengj lijlun miz cingzyauq yienhda, aen hozdung hagsib saedhengz Gohyoz Fazcanjgvanh aeundaej cwngzgoj youqgaenj, dangj raeuz hwnqguh gaijgwz cauhmoq yamq ok yamqdin youqgaenj. Ndaw dangj minzcuj ndaej caiq gyadaih. Hwnqguh ganbu duivuj ndaej hwngfat baenaj youqgaenj, gij hong vunzcaiz haicauh le gizmen moq. Aen hozdung cauhlaeb senhcin ciengj guh youhsiu、caeuq hwnqguh aen dangj cujciz gaenx hagsib haenx ndaej guh haeuj laeg bae, gihcwngz dangj cujciz mboujduenh gyagiengz. Hwnqguh gij dangjfungh ndei cwngci cingliemz caeuq fanj nduknaeuh doucwngh aeundaej cingzyauq moq.
    Doengzseiz, bietdingh aeu singjsak yawj daengz, ndaw hong raeuz lij miz haujlai guh ndaej mbouj gaeuq ndei, gwnz roen baenaj lij miz mbouj noix hojnanz caeuq vwndiz. Cujyau dwg: Ndaw hwngfat gij vwndiz mbouj bingzyaenx、mbouj doxdaengh doxhuz、mbouj ndaej lienzdaemh de vanzlij doedyienh, gohgi cauhmoq naengzlig mbouj ak, canjnieb gezgou mbouj hableix, gij giekdaej nungzyez vanzlij buegnyieg, swhyienz vanzging hanhhaed gyahaenq, gij dijci gihci gitgaz hanhhaed gohyoz hwngfat de haemq lai, aen yinvu gyalaeg gaijgwz hailangh caeuq cienjbienq ginghci hwngfat fuengsik gannanz naekcaem; singz mbanj gak dieg hwngfat cengca caeuq gihminz souhaeuj faenboiq cengca vanzlij haemq lai; gij mauzdun gwnzbiengz demlai yienhda, gyauyuz、 couhnieb、 ndawbiengz baujcang、 yihliuz、 ranzyouq、 swnghdai vanzging、  gijgwn gijyw ancienz、 ancienz swnghcanj、gwnzbiengz cianh、 hengzfap dawzfap daengj doengh gij vwndiz gvanhaeh daengz leih’ik nemndang cungqvunz neix haemq lai, mbangj cungqvunz gwndaenj haemq hojnanz; mbangj lingjyiz miz gij yienhsiengq famhboih daudwz gveihfan、  mbouj souj saenqyungh; mbangj ganbu gij naengzlig lingjdauj gohyoz hwngfat haenx mbouj giengz, mbangj gihcwngz dangj cujciz unqnyieg lanxsanj, siujsoq dangjyenz ganbu lijsiengj saenqniemh mbouj giendingh、gij yisiz fugsaeh beksingq haenx damhbueg, hingzsizcujyi、 gvanhliuzcujyi vwndiz doedyienh, gij yienhsiengq daihsai daihsaengq youqgaenj; mbangj lingjyiz gij yienhsiengq siuhgiz nduknaeuh yungzheih fat、lai fat, aen hingzseiq fanj nduknaeuh doucwngh vanzlij yiemzhaenq. Doiq doengh gij gunnanz caeuq vwndiz neix, raeuz bietdingh aeu gig yawjnaek, caiq nyinhcaen bae gaijgez.
    Gij hong haj bi gvaqbae neix, dwg Cibroek Daih doxdaeuj cib bi saedhengz cienzmienh hwnqguh aen biengz siujgangh aen gapbaenz bouhfaenh youqgaenj ndeu.
    Cib bi neix, raeuz gaem ndaet caeuq yungh ndei mboengq canloz seizgei youqgaenj guek raeuz hwngfat, gungroengz baenzroix nanzdaez hungnaek, haenqrengz dawz aen seveicujyi miz Cungguek daegsaek doi haeuj duenh hwngfat  moq bae. Haeuj daengz sigij moq duenh seizgeiz moq, gozci hingzseiq lumj rumzfwj boekbienq, gyoebhab gueklig gingcwngh coengzlaiz mbouj baenzneix haenqrem gvaq, raeuz gyalaeg gaijgwz hailangh, gyavaiq yamqdin hwngfat, swnh aen seizgei ndei gyahaeuj Seiqgyaiq Mouyiz Cujciz, dawz atlig bienqbaenz doenghlig, dawz wngqdoiq nanzdaez bienqbaenz seizgei ndei, giendingh mbouj bienq dwk doicaenh cienzmienh hwnqguh aen biengz siujgangh hwngfat baenaj. Youq gwnz roen baenaj, raeuz dwkhingz gij binghraq feihdenj sawqmwh fatseng haenx, nyinhcaen cungjgez gij hwngfat saedguh guek raeuz, cinjdeng gaemdawz guek raeuz hwngfat gij daegdiemj miz baenz duenh seizgan singqcaet haenx, gibseiz daezok caeuq cienzmienh gvancez Gohyoz Fazcanjgvanh daengj canloz swhsiengj hungnaek, vih ginghci ndawbiengz hwngfat haiok le diendeih gvangqlangh. 2008 nienz doxdaeuj, gozci ginhyungz veizgih sawj guek raeuz hwngfat roeb daengz hojnanz gig youqgaenj, raeuz gohyoz duenqdingh、byoengqbyat gietdingh wngqdoiq banhfap, yungh baenzroix guhfap hungnaek, youq gwnz seiqgyaiq sien saedyienh ginghci ndwnmaenh hoizswng gonq, cwkrom le gij gingniemh youqgaenj mizyauq wngqdoiq baihrog ginghci fungyiemj cungdongj、 baujciz ginghci hwngfat bingzonj haemq vaiq. Raeuz gig ndei banh baenz Bwzgingh Auyinvei、Canzauvei caeuq Sanghaij Sibozvei,haenqrengz hoenxhingz ciengz deihdoengh daegdaih Vwnconh daengj swyenz caihaih youqgaenj、 caeuq haenqrengz guhbaenz deng cai gvaqlaeng dauqcungz hwnqguh, cawqleix ndei baenzroix saehgienh hungnaek sawqmwh fatseng. Youq yiengh hingzseiq ndaw guek rog guek cibfaen fukcab neix,dangj caeuq beksingq dingj ndaej gvaq gaujniemh yiemzhaenq,gyamaenh caeuq hwngfat le aen daengxbuenz gaijgwz hailangh caeuq hwnqguh seveicujyi yendaiva,daezsang le aen gozci diegvih guek raeuz,sienmingz yienhok yiengh seveicujyi miz Cungguek daegsaek raeuz gijndei gig daih caeuq rengzlig sengmingh giengzdaih,sawj Cungguek beksingq caeuq Cunghvaz Minzcuz ndaej lai roxnyinh miznaj, engq gietcomz hwnjdaeuj.
    Cib bi daeuj,raeuz aeu ndaej baenzroix cwngzciu moq hab geiq haeuj lizsij bae,vih cienzmienh hwnqbaenz aen biengz siujgangh roengzmaenh le giekdaej. Gij ginghci cungjliengh guek raeuz daj seiqgyaiq vih daihroek  yat daengz vih daihngeih,gij swnghcanjliz ndawbiengz、 ginghci saedlig、 gohgi saedlig  yamq hwnj mbaek hung ndeu,beksingq gwndaenj suijbingz、 gihminz souhaeuj suijbingz、 ndawbiengz baujcang suijbingz yamq hwnj mbaek hung  ndeu,gyoebhab gueklig、 gozci gingcwngh naengzlig、 gozci yingjyangj naengzlig  yamq hwnj mbaek hung ndeu,guekgya yienghsiengq fatseng cungj bienqvaq moq daiqmiz lizsij singqcaet. Vunzlai goengnyinh,neix dwg aen seizgeiz guek raeuz ginghci lienzdaemh hwngfat、minzcuj mboujduenh laeb caezcienz、vwnzva ngoenz beij ngoenz mwnhoengh、ndawbiengz baujciz onjdingh ndeu,dwg aen seizgeiz roengzrengz baujcang caeuq gaijndei gij gwndaenj beksingq、beksingq ndaej saedcaih ndeicawq engq lai ndeu. Raeuz aeu ndaej yiengh cwngzciu miz lizsij singqcaet neix,dwg baengh gij gihbwnj lijlun、gihbwnj lohsienq、gihbwnj ganghlingj、gihbwnj gingniemh dangj raeuz daeuj cingqdeng ceijyinx,dwg baengh aen giekdaej laegna Cungguek moq laebbaenz doxdaeuj daegbied dwg gaijgwz hailangh doxdaeuj roengzmaenh haenx,dwg baengh daengx dangj daengx guek gak cuz beksingq doxgiet buekguh. 
    Youq gizneix,gou daibyauj Cunghgung Cunghyangh,yiengq daengx guek gak cuz beksingq,yiengq gak minzcuj dangjbai、 gak beksingq donzdij caeuq gyoengq vunz gyaez guek gak gyaiq,yiengq gyoengq beixnuengx Yanghgangj Daegbied Hingzcwnggih、gyoengq beixnuengx Aumwnz Daegbied Hingzcwnggih caeuq gyoengq beixnuengx Daizvanh dem guengjdaih beixnuengx youq guekrog,yiengq sojmiz gak guek baengzyoux gvansim caeuq haeujcoengh hwnqguh Cungguek yendaiva haenx,byaujsi caensim docih! 
     Cungjgez cib bi buekguh ginglig,gij ceiq youqgaenj couh dwg raeuz itcig cungj aeu Majgwzswh-Lezningzcujyi、 Mauz Cwzdungh Swhsiengj、 Dwng Siujbingz Lijlun、“Sam Aen Daibyauj” Cung’yau Swhsiengj daeuj ceijyinx,gamj youq gwnz giekdaej saedguh bae doicaenh lijlun cauhmoq,hopheux itcig cungj guh caeuq hwngfat yiengh seveicujyi miz Cungguek daegsaek daezok baenzroix swhsiengj moq、 gvanhdenj moq、 lwnhduenh moq gaenjmaed doxlienz、 doxronz doxdoeng haenx, cauxbaenz caeuq gvancez le Gohyoz Fazcanjgvanh. Gohyoz Fazcanjgvanh dwg Majgwzswhcujyi caeuq dangdaih Cungguek saedsaeh dem seizdaih daegdiemj dox giethab cij miz okdaeuj,gyoebgyonj daejyienh le Majgwzswhcujyi gij sigaigvanh caeuq fanghfazlun gvendaengz hwngfat neix,doiq youq hingzseiq moq saedyienh yiengh hwngfat lawz、 baenzlawz hwngfat daengj vwndiz hungnaek guh ok le  gohyoz hoizdap moq,dawz raeuz nyinhrox gij gvilwd yiengh seveicujyi miz Cungguek daegsaek neix daezsang daengz suijbingz moq,hai ok le dangdaih Cungguek Majgwzswhcujyi hwngfat ginggai moq. Gohyoz Fazcanjgvanh, dwg gij cwngzgoj ceiq moq aen lijlun dijhi yiengh seveicujyi miz Cungguek daegsaek,dwg gij dungxcaiz gyoengq vunz Cunghgoz Gungcanjdangj gietbaenz,dwg aen swhsiengj vujgi maenhak ndaej ceijyinx dangj caeuq guekgya gak yiengh hong. Gohyoz Fazcanjgvanh caeuq Majgwzswh-Lezningzcujyi、 Mauz Cwzdungh Swhsiengj、 Dwng Siujbingz Lijlun、 “Sam Aen Daibyauj” Cung’yau Swhsiengj itheij,dwg gij cijdauj swhsiengj aen dangj bietdingh aeu ciengzgeiz cungj aeu ciuq guh. 
    Najyiengq daengzcog,haeujlaeg gvancez lozsiz Gohyoz Fazcanjgvanh,doiq itcig cungj guh caeuq hwngfat yiengh seveicujyi miz Cungguek daegsaek miz yienhsaed yiyi hungnaek caeuq lizsij yiyi gyaeraez,bietdingh aeu dawz Gohyoz Fazcanjgvanh gvancez daengz guek raeuz hwnqguh yendaiva daengxaen gocwngz、daejyienh daengz hwnqguh aen dangj gak aen fuengmienh bae. Daengx dangj bietdingh aeu engqgya gagrox dawz doidoengh ginghci ndawbiengz hwngfat, dangguh gij neiyungz ceiq youqgaenj bae haeujlaeg gvancez lozsiz Gohyoz Fazcanjgvanh, niujdawz maenh hwnqguh ginghci aen cungsim neix,itcig cungj aeu gyonjcomz cingsaenz bae hwnqguh、 itsim iteiq maeuz hwngfat,roengzrengz gaemdawz hwngfat gvilwd、 cauhmoq hwngfat leixniemh、 buqgej hwngfat nanzdaez,haeujlaeg saedhengz aen canloz baengh gohgyau hwng guek、 aen  canloz baengh vunzcaiz sawj guek ak、 aen canloz ndaej lienzdaemh hwngfat,gyavaiq cauxbaenz gij hwngfat fuengsik caeuq dijci gihci hab gohyoz hwngfat iugouz haenx,mboujduenh gaijfang caeuq hwngfat ndawbiengz swnghcanjliz,mboujduenh saedyienh gohyoz hwngfat、 huzndei hwngfat、 hozbingz hwngfat,vih itcig cungj guh caeuq hwngfat yiengh seveicujyi miz Cungguek daegsaek roengzmaenh giekdaej. Bietdingh aeu engqgya gagrox dawz aeu vunz guh gaenbonj, dangguh gij haedsim lizcangz haeujlaeg gvancez lozsiz Gohyoz Fazcanjgvanh,itcig cungj dawz saedyienh ndei、henhoh ndei、hwngfat ndei gij gaenbonj leih’ik ceiq guengjdaih beksingq, dangguh gizhwnjdin caeuq gizroengzdin sojmiz gij hong dangj caeuq guekgya,gingqcungh beksingq cungj cingsaenz ceiq caeux cauhguh haenx,baujcang beksingq gak hangh gienzik,mboujduenh youq saedyienh hwngfat cwngzgoj youz beksingq caez yiengjsouh、 coicaenh bouxvunz cienzmienh hwngfat fuengmienh neix aeundaej cingzyauq moq. Bietdingh aeu engqgya gagrox dawz cienzmienh doxdaengh doxhuz ndaej lienzdaemh hwngfat, dangguh gij gihbwnj iugouz haeujlaeg gvancez lozsiz Gohyoz Fazcanjgvanh,cienzmienh lozsiz aen cungjdaej baijbouh hwnqguh ginghci、hwnqguh cwngci、 hwnqguh vwnzva、hwnqguh ndawbiengz、hwnqguh swnghdai vwnzmingz haj yiengh gapbaenz cingjdaej neix,coicaenh  hwnqguh yendaiva gak fuengmienh doxdaengh doxhuz,coicaenh swnghcanj gvanhaeh caeuq swnghcanjliz、sangcwngz gencuz caeuq ginghci giekdaej doxdaengh doxhuz,mboujduenh haigvangq diuz roen vwnzmingz hwngfat, sawj swnghcanj hwngfat、 saedceij fouqmiz、 swnghdai ndeindei. Bietdingh aeu engqgya gagrox dawz dungjcouz giemgoq dangguh aen gaenbonj fuengfap haeujlaeg gvancez lozsiz Gohyoz Fazcanjgvanh,itcig cungj ciuq yienghyiengh daj saedsaeh hwnjdin,cingqdeng nyinhrox caeuq cawqleix ndei gij gvanhaeh hungnaek ndaw saehnieb seveicujyi miz Cungguek daegsaek,doengjit suenqveh gaijgwz hwngfat onjdingh、 neicwng vaigyauh gozfangz、 guenj dangj guenj guek guenj bing gak fuengmienh hong,doengjit suenqveh singz mbanj hwngfat、 gihyiz hwngfat、 ginghci ndawbiengz hwngfat、 vunz caeuq swyenz huzndei hwngfat、 ndaw guek hwngfat caeuq doiq rog hailangh,doengjit suenqveh gak fuengmienh leih’ik gvanhaeh,cungfaen diuhdoengh gak fuengmienh cizgizsing,roengzrengz cauxbaenz aen gizmen daengxcungq beksingq moix boux cungj caenh naengzlig guh、moix boux ndaej anbaiz habdangq youh huzndei caemhyouq haenx. 
    Gaijfang swhsiengj、saedsaeh gouz dwg、gaen hwnj seizdaih、gouzcaen guhsaed,dwg gij cingsaenz saedcaet ceiq sienmingz Gohyoz Fazcanjgvanh. Saedguh hwngfat ciengzlwenx mbouj rox caenh,nyinhrox caenleix ciengzlwenx mbouj rox caenh, lijlun cauhmoq ciengzlwenx mbouj rox caenh. Daengx dangj itdingh aeu gamj bae saedguh、 gamj guh bengwz、 gamj guh cauhmoq,gaemdawz seizdaih hwngfat iugouz,swnh’wngq gij simmuengh doengzcaez beksingq,mbouj soengheiq bae damqra caeuq gaemdawz gij gvilwd yiengh seveicujyi miz Cungguek daegsaek,ciengzlwenx baujciz aen dangj rengzrwd hoenghhwd,ciengzlwenx baujciz gij hwngfat doenghlig guekgya,youq mwh dangj caeuq beksingq cauhmoq bae saedguh haenx, haenqrengz hai ok gij hwngfat gingjsaek baihnaj engqgya gvangqlangh yiengh seveicujyi miz Cungguek daegsaek.
 
    2. Duedaeu Yiengh Seveicujyi Miz Cungguek Daegsaek Caiq Ndaej Hingz
 
    Nyeuxyawj gaenhdaih doxdaeuj Cungguek gij  lizsij singseiq hungmbwk haenx,langhyawj  Cunghvaz Minzcuz gij daengzcog gig miz maqmuengh haenx,raeuz ndaej ok aen gietlwnh giendingh ndeu:Yaek cienzmienh hwnqbaenz aen biengz siujgangh,gyavaiq doicaenh seveicujyi yendaiva,saedyienh Cunghvaz Minzcuz daih fukhwng,bietdingh aeu giendingh mbouj bienq bae byaij diuz roen seveicujyi miz Cungguek daegsaek. 
    Roenloh gvendaengz diuz minghmeg aen dangj raeuz,gvendaengz gij cenzduz  guekgya、  diuz  minghyinh minzcuz、 gij vuenyungz gyoengq beksingq. Youq Cungguek aen guekgya ginghci vwnzva cibfaen doeklaeng baenzneix, damqra diuz roen minzcuz fukhwng,dwg aen yinvu gig gannanz hungnaek ndeu. Goujcib lai bi daeuj, aen dangj raeuz gaenjndaet baenghgauq beksingq,dawz Majgwzswhcujyi gihbwnj yienzleix caeuq Cungguek saedsaeh、 seizdaih daegdiemj giethab hwnjdaeuj,doglaeb gag guhcawj byaij diuz roen bonjfaenh,ginglig cien nanz fanh hoj,cei ok gak cungj daigya,sawj gwzming hwnqguh gaijgwz ndaej hingz hungmbwk,haicauh caeuq hwngfat le yiengh seveicujyi miz Cungguek daegsaek,daj goekgaen bae gaijbienq le gij cenzduz minghyinh Cungguek beksingq caeuq Cunghvaz Minzcuz. 
    Aen dangj raeuz daih daih’it cunghyangh lingjdauj cizdij aeu Mauz Cwzdungh dungzci guh haedsim haenx, daiqlingx daengx dangj daengx guek gak cuz beksingq guhbaenz le sinhminzcujcujyi gwzming,guh le seveicujyi gaijcauh,dinghlaeb le seveicujyi gihbwnj cidu,ndaej gig ndei saedyienh le gwnz lizsij Cungguek ciengz ndawbiengz bengwz ceiq laegdaeuq ceiq hungmbwk neix,vih dangdaih Cungguek sojmiz hwngfat cinbu roengzmaenh le gaenbonj cwngci cenzdiz caeuq gij giekdaej cidu. Youq ndaw damqra,yienznaeuz ginglig gvaq ngutngeuj gig youqgaenj,hoeng dangj youq ndaw hwnqguh seveicujyi  aeundaej gij lijlun cwngzgoj daegbied gagcauh caeuq cwngzciu hungloet haenx,vih lizsij seizgeiz moq haicauh yiengh seveicujyi miz Cungguek daegsaek daezhawj le gingniemh dijbauj、 lijlun caepcawq、 vuzciz giekdaej.  
   Aen dangj raeuz daih daihngeih cunghyangh lingjdauj cizdij aeu Dwng Siujbingz dungzci guh haedsim haenx, daiqlingx daengx dangj daengx guek gak cuz beksingq haeujlaeg cungjgez guek raeuz hwnqguh seveicujyi cingq fanj song fuengmienh gingniemh,hagaeu gij lizsij gingniemh seiqgyaiq seveicujyi,guhok gij gezcwz daiqmiz lizsij singqcaet dawz gij cungsim gunghcoz aen dangj caeuq guekgya cienj daengz hwnqguh ginghci fuengmienh daeuj、saedhengz gaijgwz hailangh,laegdaeuq diemj ok gij bonjcaet seveicujyi,laebdingh diuz gihbwnj lohsienq duenh cogaep seveicujyi,mingzbeg daezok byaij diuz roen bonjfaenh、 hwnqguh yiengh seveicujyi miz Cungguek daegsaek,gohyoz hoizdap le baenzroix gihbwnj vwndiz mizgven gensez yiengh seveicujyi miz Cungguek daegsaek,gig ndei haicauh baenz yiengh seveicujyi miz Cungguek daegsaek.
    Aen dangj raeuz daih daihsam cunghyangh lingjdauj cizdij aeu Gyangh Cwzminz dungzci guh haedsim haenx, daiqlingx daengx dangj daengx guek gak cuz beksingq itcig cungj saedhengz gij gihbwnj lijlun、 gihbwnj lohsienq dangj raeuz,mienhdoiq cungj gaujniemh yiemzhaenq  ndaw guek rog guek hingzseiq cibfaen fukcab、 seiqgyaiq seveicujyi okyienh daemdengj gig youqgaenj,ndaej hen maenh le yiengh seveicujyi miz Cungguek daegsaek,gaengawq gij saedguh moq laebdingh le gij gihbwnj ganghlingj、 gihbwnj gingniemh  dangj raeuz,laebdingh le gij gaijgwz muzbyauh caeuq gihbwnj gvaengxgyaq seveicujyi hawciengz ginghci dijci,laebdingh le gij gihbwnj ginghci cidu caeuq faenboiq cidu duenh cogaep seveicujyi,haicauh aen gizmen moq cienzmienh gaijgwz hailangh,doicaenh hwnqguh aen gunghcwngz hungmbwk moq dangj raeuz, gig ndei dwk dawz yiengh seveicujyi miz Cungguek daegsaek doiyiengq 21 sigij. 
    Sigij moq duenh seizgeiz moq,dangj cunghyangh cadawz mboengq  miz canloz seizgei youqgaenj,youq ndaw cienzmienh hwnqguh aen biengz siujgangh doicaenh saedguh cauhmoq、 lijlun cauhmoq、 cidu cauhmoq,giengzdiuh itcig cungj aeu vunz guh gaenbonj、 cienzmienh doxdaengh doxhuz ndaej lienzdaemh hwngfat,daezok cauhlaeb aen biengz huzndei seveicujyi、gyavaiq hwnqguh swnghdai vwnzmingz,cauxbaenz aen cungjdaej baijbouh yiengh saehnieb seveicujyi miz Cungguek daegsaek,roengzrengz baujcang caeuq gaijndei gij gwndaenj beksingq,coicaenh ndawbiengz goengbingz leixcingq,doidoengh hwnqguh aen seiqgyaiq huzndei,doicaenh   hwnqguh gij naengzlig gaemgienz caeuq hwnqguh gij senhcinsing aen dangj,youq gizhaidin lizsij  moq,  gig ndei dwk itcig cungj guh caeuq hwngfat le yiengh seveicujyi miz Cungguek daegsaek. 
    Youq ndaw gaijgwz hailangh samcib lai bi yiengh doxswnj damqra gonqlaeng doxlienz neix,raeuz giendingh mbouj bienq dwk yaengxsang mbaw geiz hungmbwk yiengh seveicujyi miz Cungguek daegsaek,gawq mbouj byaij diuz roengaeuq  fungsaek gyaengjgyat、 hix mbouj byaij diuz roenloeng gaijvuenh geizhauh. Diuz roen seveicujyi miz Cungguek daegsaek,aen lijlun dijhi  seveicujyi miz Cungguek daegsaek,gij cidu seveicujyi miz Cungguek daegsaek,dwg gij gaenbonj cwngzciu youz dangj caeuq beksingq goujcib lai bi buekguh、 dajcauh、 cwkrom,bietdingh aeu gya boix insik、 itcig cungj ciuq hengz、 mboujduenh hwngfat. 
    Diuz roen seveicujyi miz Cungguek daegsaek, couh dwg youz Cunghgoz Gungcanjdangj lingjdauj, coengz gihbwnj guekcingz bae naemj, aeu hwnqguh ginghci guh cungsim, itcig cungj ciuq hengz seiq hangh gihbwnj yenzcwz, itcig cungj guh gaijgwz hailangh, gaijfang caeuq hwngfat gij swnghcanjliz ndawbiengz, hwnqguh seveicujyi hawciengz ginghci、 seveicujyi minzcuj cwngci、 seveicujyi senhcin vwnzva、aen biengz huzndei seveicujyi、 seveicujyi swnghdai vwnzmingz, coicaenh bouxvunz cienzmienh hwngfat, cugbouh guhdaengz daengxcungq beksingq doengzcaez fouqmiz, hwnqguh aen seveicujyi yendaiva guekgya fouqgiengz minzcuj vwnzmingz huzndei ndeu. Aen lijlun dijhi seveicujyi miz Cungguek daegsaek, couh dwg aen gohyoz lijlun dijhi baudaengz Dwng Siujbingz Lijlun、“Sam Aen Daibyauj”Cung’yau Swhsiengj、Gohyoz Fazcanjgvanh, dwg itcig cungj ciuq hengz caeuq hwngfat le Majgwzswh-Lezningzcujyi、 Mauz Cwzdungh Swhsiengj. Aen cidu seveicujyi miz Cungguek daegsaek, couh dwg gij gaenbonj cwngci cidu yinzminz daibyauj daihhoih cidu, gij cidu lai dangj doxgap  caeuq cwngci doxyaeng  youz Cunghgoz Gungcanjdangj lingjdauj、 gij cidu gagguenj dieg siujsoq minzcuz dem gij cidu gagguenj gyoengq beksingq gihcwngz daengj  gihbwnj cwngci cidu, gij faplwd dijhi seveicujyi miz Cungguek daegsaek, gij gihbwnj ginghci cidu aeu gunghyoujci guh cawjdaej、 lai cungj sojyoujci ginghci doengzcaez hwngfat, dem gij  ginghci dijci、 cwngci dijci、 vwnzva dijci、 ndawbiengz dijci daengj gak hangh gidij cidu youq gwnz giekdaej doengh gij cidu neix laeb hwnjdaeuj haenx. Diuz roen seveicujyi miz Cungguek daegsaek dwg diuz roen bae saedyienh de, aen lijlun dijhi seveicujyi miz Cungguek daegsaek dwg hengzdoengh ceijnamz, aen cidu  seveicujyi miz Cungguek daegsaek dwg gij baujcang goekgaen, sam yiengh neix youq ndaw  saedguh hungmbwk yiengh seveicujyi miz Cungguek daegsaek doengjit hwnjdaeuj,  neix dwg  gij daegsaek ceiq sienmingz youz dangj lingjdauj beksingq youq ndaw hwnqguh seveicujyi ciengzgeiz saedguh cij cauxbaenz.
    Hwnqguh yiengh seveicujyi miz Cungguek daegsaek, cungjdaej baengzgawq dwg duenh cogaep seveicujyi, daengxbuenz baijbouh dwg haj yiengh gyoebbaenz aen cingjdaej ndeu, daengxbuenz yinvu dwg saedyienh seveicujyi yendaiva caeuq Cunghvaz Minzcuz daih fukhwng. Yiengh seveicujyi miz Cungguek daegsaek, gawq itcig cungj ciuq hengz le gij gihbwnj yenzcwz gohyoz seveicujyi, youh gaengawq seizdaih diuzgen hawj de miz Cungguek daegsaek sienmingz, yungh lwgda moqsak gyalaeg nyinhrox gij gvilwd gungcanjdangj gaemgienz、 gij gvilwd hwnqguh seveicujyi、gij gvilwd vunzloih ndawbiengz hwngfat, coengz lijlun caeuq saedguh dox giethab fuengmienh,  miz diuzleix baenz cingjdaej bae hoizdap le gij gaenbonj vwndiz neix —— youq Cungguek aen guek hung baihdoeng  vunz  lai daej mbang baenzneix, yaek hwnqguh yiengh seveicujyi lawz、 baenzlawz hwnqguh seveicujyi, sawj guekgya raeuz riengjvaiq hwngfat hwnjdaeuj, sawj gij gwndaenj suijbingz gyoengq beksingq guek raeuz riengjvaiq daezsang hwnjdaeuj. Saedguh cungfaen cwngmingz,  yiengh seveicujyi miz Cungguek daegsaek, dwg aen gaenbonj fueng’yiengq dangdaih Cungguek hwngfat baenaj, cijmiz yiengh seveicujyi miz Cungguek daegsaek cijndaej hwngfat Cungguek.
    Hwngfat yiengh seveicujyi miz Cungguek daegsaek, dwg hangh lizsij yinvu ciengzgeiz youh gannanz hungnaek ndeu, bietdingh aeu caepcawq guh yiengh doucwngh hungmbwk miz haujlai lizsij daegdiemj moq haenx. Raeuz itdingh aeu hauz mbouj doenghngauz dwk itcig cungj guh、  gaen hwnj seizdaih bae hwngfat yiengh seveicujyi miz Cungguek daegsaek, mboujduenh gyalai gij saedguh daegsaek、 lijlun daegsaek、 minzcuz daegsaek、 seizdaih daegsaek yiengh seveicujyi miz Cungguek daegsaek raeuz.
    Youq lizsij diuzgen moq yaek duedaeu yiengh seveicujyi miz Cungguek daegsaek caiq ndaej hingz, bietdingh aeu gaemmaenh gij gihbwnj iugouz lajneix, caemhcaiq sawj de bienqbaenz gij saenqniemh doengzcaez daengx dangj daengx guek gak cuz beksingq.
    —— Bietdingh aeu itcig cungj henhoh aen cawjdaej diegvih beksingq. Aen seveicujyi miz Cungguek daegsaek dwg gij saehnieb ik fanh beksingq bonjfaenh. Aeu fatok gij cingsaenz beksingq dangguh bouxcawj, itcig cungj ciuq fap guenj guek aen gihbwnj fanghloz dangj lingjdauj beksingq ceihleix guekgya neix, ceiq gvangqlangh dwk dungyenz caeuq cujciz beksingq ciuqfap guenjleix hongsaeh guekgya caeuq hongsaeh ndawbiengz、guenjleix ginghci caeuq vwnzva saehnieb、gaenxmaenx caeuqfaenh hwnqguh seveicujyi yendaiva, engq ndei bae baujcang gij gienzik beksingq, engq ndei bae baujcwng hawj beksingq danggya guhcawj.
    —— Bietdingh aeu itcig cungj gaijfang caeuq hwngfat gij swnghcanjliz ndawbiengz. Gaijfang caeuq hwngfat gij swnghcanjliz ndawbiengz, dwg gij gaenbonj yinvu yiengh seveicujyi miz Cungguek daegsaek. Yaek itcig cungj aeu hwnqguh ginghci guh cungsim, aeu gohyoz hwngfat guh cawjdaez, cienzmienh doicaenh hwnqguh ginghci、hwnqguh cwngci、hwnqguh vwnzva、hwnqguh aen biengz、 hwnqguh swnghdai vwnzmingz, saedyienh cungj gohyoz hwngfat aeu vunz guh gaenbonj、 cienzmienh doxdaengh doxhuz youh ndaej lienzdaemh guh roengzbae.
    —— Bietdingh aeu itcig cungj doicaenh gaijgwz hailangh. Gaijgwz hailangh dwg diuz roen itcig cungj byaij caeuq hwngfat yiengh seveicujyi miz Cungguek daegsaek bietdingh aeu byaij. Aeu itloh cungj dawz gaijgwz cauhmoq cingsaenz gvancez daengz ceihleix guekgya guenjleix cwngci gak aen hothoh bae, itcig cungj dawzcinj aen gaijgwz fueng’yiengq seveicujyi hawciengz ginghci, itcig cungj gaemndei hangh gihbwnj gozcwz doiq rog hailangh, mboujduenh doicaenh lijlun cauhmoq、 cidu cauhmoq、  gohgi cauhmoq、  vwnzva cauhmoq caeuq gizyawz gak fuengmienh cauhmoq, mboujduenh doicaenh seveicujyi cidu guek raeuz gag laeb caezcienz caeuq hwngfat baenaj.
   —— Bietdingh aeu itcig cungj henhoh ndawbiengz goengbingz leixcingq. Goengbingz leixcingq,  dwg yiengh seveicujyi miz Cungguek daegsaek gij iugouz gyaeuhmiz de. Aeu youq gwnz giekdaej daengxcungq beksingq doengzcaez buekguh、 ginghci ndawbiengz hwngfat,gyagaenj laeb ndei gij cidu doiq baujcang ndawbiengz goengbingz leixcingq miz yunghcawq hungnaek de,cugbouh laebhwnj aen dijhi baujcang ndawbiengz goengbingz aeu gienzleih goengbingz、 gihvei goengbingz、 gveihcwz goengbingz guh cujyau neiyungz haenx,roengzrengz cauh ok ndawbiengz vanzging goengbingz daeuj,baujcwng hawj beksingq miz gienzleih bingzdaengj camgya、bingzdaengj hwngfat.
   —— Bietdingh aeu itcig cungj byaij diuz roen doengzcaez fouqmiz. Doengzcaez fouqmiz dwg gij gaenbonj yenzcwz yiengh seveicujyi miz Cungguek daegsaek. Aeu itcig cungj hengz gij gihbwnj ginghci cidu caeuq faenboiq cidu seveicujyi,diuzcingj gozminz souhaeuj faenboiq gwzgiz,gyarengz diuzcez caiq faenboiq,roengzrengz gaijgez aen vwndiz souhaeuj faenboiq cengca hamq lai neix,sawj gij cwngzgoj hwngfat ndaej engq lai engq goengbingz dwk hawj daengxcungq beksingq ndaej ndeicawq, coh aen fueng’yiengq doengzcaez fouqmiz yamq onj baenaj.
    —— Bietdingh aeu coicaenh ndawbiengz huzndei. Ndawbiengz huzndei dwg gij bonjcaet sugsingq yiengh seveicujyi miz Cungguek daegsaek. Aeu dawz baujcang caeuq gaijndei beksingq gwndaenj cuengq youq aen diegvih engqgya doedyienh bae,gyagiengz caeuq cauhmoq  guenjleix ndawbiengz,cingqdeng cawqleix gij gvanhaeh gaijgwz hwngfat onjdingh,comzgiet  sojmiz gij ligliengh ndaej comzgiet haenx,ceiq daih hanhdoh dwk demgya gij yinhsu huzndei,demgiengz gij rengzvuengh cauhmoq gwnzbiengz,saedbauj  beksingq ndaej youq onj gyaez hong、 gwnzbiengz andingh mbouj luenh、 guekgya ciengzgeiz andingh.
   —— Bietdingh aeu itcig cungj guh hozbingz hwngfat.  Yiengh seveicujyi miz Cungguek daegsaek bietyienz genj aeu hozbingz hwngfat. Aeu itcig cungj guh yiengh hwngfat dwg hailangh、 yiengh hwngfat dwg gapguh、 yiengh hwngfat dwg caezhingz,doenggvaq cengaeu aen gozci vanzging hozbingz daeuj hwngfat bonjfaenh,youh doenggvaq bonjndang  hwngfat bae henhoh caeuq coicaenh seiqgyaiq hozbingz,gyagvangq diemj  caeuq gak fueng leih’ik doxgap,doidoengh hwnqguh aen seiqgyaiq huzndei、 ciengzgeiz hozbingz、doengzcaez mwnhoengh.
    —— Bietdingh aeu itcig cungj baengh aen dangj lingjdauj. Cunghgoz Gungcanjdangj dwg aen lingjdauj haedsim yiengh saehnieb seveicujyi miz Cungguek daegsaek. Aeu itcig cungj guh daengz  laeb dangj vih goenggya、gaemgienz vih beksingq, gyagiengz caeuq gaijndei aen dangj  lingjdauj, itcig cungj baujciz yiengh lingjdauj haedsim cozyung youz dangj doengjlamx daengxbuenz、 sawj gak fueng boiqhab habdangq,baujciz aen dangj ndaej senhcin caeuq cinghseuq,demgiengz gij ligliengh dajcauh、 gij ligliengh gietcomz、 gij ligliengh dingjhoenx aen dangj raeuz,daezsang gij suijbingz gohyoz gaemgienz、 minzcuj gaemgienz、 ciuqfap gaemgienz aen dangj raeuz.
    Raeuz bietdingh aeu singjsak roxdaengz,guek raeuz vanzlij cawqyouq caemhcaiq yaek ciengzgeiz cawqyouq duenh cogaep seveicujyi yiengh gihbwnj guekcingz neix mbouj caengz bienq,beksingq aeu yungh vuzciz vwnzva ngoenz beij ngoenz gyalai hoeng ndawbiengz swnghcanj cix doeklaeng aen ndawbiengz cujyau mauzdun neix mbouj caengz bienq, guek raeuz dwg gwnz seiqgyaiq aen guekgya cingqcaih hwngfat youh ceiq hung ndeu yiengh gozci diegvih neix mbouj caengz bienq. Mboujlwnh youq yiengh cingzgvang lawz, cungj aeu gaemmaenh duenh cogaep seveicujyi aen guekcingz ceiq hung neix,doicaenh fuengmienh lawz gaijgwz hwngfat cungj aeu giendingh dwk coengz duenh cogaep seveicujyi  aen saedsaeh ceiq daih neix bae naemj. Diuz gihbwnj lohsienq dangj raeuz dwg diuz sengminghsienq dangj caeuq guekgya,youq ndaw saedguh hungmbwk yiengh seveicujyi miz Cungguek daegsaek, bietdingh aeu itcig cungj dawz aeu hwnqguh ginghci  guh cungsim caeuq seiq hangh gihbwnj yenzcwz、 gaijgwz hailangh song aen gihbwnjdenj neix doengjit hwnjdaeuj,gawq mbouj yawjsiuj bonjfaenh,hix mbouj ndaengndiengq dasang,maenhmaenh-saedsaed bae duedaeu yiengh seveicujyi miz Cungguek daegsaek caiq ndaej hingz.
    Cijaeu raeuz sim miz lijsiengj、giendingh saenqniemh,mbouj doenghngauz、 mbouj gikgyang、 mbouj foekfan,goenqcaej buekguh、  mbouj lau sinhoj buekguh、  cagaenj buekguh,couh itdingh ndaej youq mwh Cunghgoz Gungcanjdangj laebbaenz it bak hopbi cienzmienh hwnqbaenz aen biengz siujgangh,couh itdingh ndaej youq mwh Cungguek moq laebbaenz it bak hopbi hwnqbaenz aen seveicujyi yendaiva guekgya fouqgiengz minzcuj vwnzmingz huzndei ndeu. Daengx dangj aeu giendingh gij roenloh gagsaenq、 lijlun gagsaenq、 cidu gagsaenq yienghneix!
 
    3. Aen Muzbyauh Cienzmienh Hwnqbaenz Aen Biengz SiujganghCaeuq Cienzmienh Gyalaeg  Gaijgwz Hailangh
 
    Langhyawj daengx aen hingzseiq ndaw guek rog guek,gij hwngfat guek raeuz vanzlij cawqyouq mboengq canloz seizgei youqgaenj daih miz guhdaeuz haenx. Raeuz aeu cinjdeng duenqdingh gij neihanz caeuq diuzgen mboengq canloz seizgei youqgaenj neix  miz maz bienqvaq,cienzmienh gaemdawz seizgei ndei,simdingh wngqdoiq hojnanz,hingz ndaej cawjdoengh,hingz ndaej gijndei gijak,hingz ndaej daengzcog,saedbauj daengz 2020 nienz saedyienh aen muzbyauh hungmbwk  cienzmienh hwnqbaenz aen biengz siujgangh.
    Gaengawq gij saedsaeh hwngfat ndawbiengz ginghci guek raeuz,aeu youq gwnz giekdaej gij muzbyauh cienzmienh hwnqguh aen biengz siujgangh Cibroek Daih、 Cibcaet Daih doekdingh haenx, roengzrengz saedyienh iugouz moq.
    —— Ginghci laebdaeb cangqvuengh fathoengh. Cienjbienq ginghci hwngfat fuengsik ndaej hwngfat baenaj gig daih,youq gwnz giekdaej hwngfat ndaej bingzyaenx、 doxdaengh doxhuz、 ndaej lienzdaemh guh gaenq demgiengz yienhda haenx,saedyienh ndaw guek swnghcanj cungjciz caeuq gihminz singz mbanj moix vunz bingzyaenz souhaeuj beij 2010 nienz fan fan ndeu. Gohgi cinbu doiq ginghci demmaj gij gunghawj beijlwd de daih fukdoh swngsang,haeujdaengz ndaw hangzlied aen guekgya ak cauhmoq bae. Daihdaej saedyienh gunghyezva, daih fukdoh daezswng gij suijbingz saenqsikvaq,hawsingzvaq caetliengh daezsang yienhda,nungzyez yendaiva caeuq hwnqguh mbanj moq seveicujyi cingzyauq gig yienhda,aen gihci hawj gak dieg doxdaengh hwngfat daihdaej guhbaenz. Doiq rog hailangh suijbingz caiq ndaej daezsang,gozci gingcwngh naengzlig demgiengz yienhda.
   —— Beksingq minzcuj mboujduenh gyadaih. Minzcuj cidu engqgya caezcienz,minzcuj hingzsik engqgya lai cungj lai yiengh,gij cizgizsing、 cujdungsing、 cangcausing gyoengq beksingq caiq ndaej fat okdaeuj.  Cienzmienh lozsiz aen  gihbwnj fanghloz ciuqfap guenj guek, daihdaej laebbaenz fapceih cwngfuj,dawzfap goengsaenqlig mboujduenh daezsang,yinzgenz ndaej daengz cietsaed gingqcungh caeuq baujcang.
    —— Gij saedlig unq vwnzva demgiengz gig yienhda. Seveicujyi haedsim gyaciz dijhi haeuj daengz sim vunz,gunghminz vwnzmingz suciz caeuq ndawbiengz vwnzmingz cingzdoh daezsang yienhda. Vwnzva canjbinj engqgya lai cungj lai yiengh,daihdaej guhbaenz goenggungh vwnzva fugsaeh dijhi,vwnzva canjnieb baenz aen canjnieb dingjdaemx gozminz ginghci, Cunghvaz vwnzva byaij okbae yamqdin engq hung, gij giekdaej hwnqguh aen seveicujyi vwnzva guek ak engqgya gaenjmaenh.
    —— Beksingq gwndaenj suijbingz cienzmienh daezsang. Cungjdaej saedyienh gihbwnj goenggungh fugsaeh bingzyaenz doxdaengj. Daengxcungq beksingq souh gyauyuz cingzdoh caeuq aen suijbingz gungganq vunzcaiz cauhmoq daezsang yienhda, haeuj daengz aen hangzlied vunzcaiz guekak caeuq vunzlig swhyenz guekak, daihdaej saedyienh gyauyuz yendaiva. Couhnieb engqgya cungfaen. Souhaeuj faenboiq cengca sukiq, gyoengqvunz souhaeuj cungdaengj de laebdaeb gyalai, doengh boux yaek aeu banggungz de daih fukdoh gemjnoix. Ndawbiengz baujcang guenj daengz daengxcungq beksingq, bouxboux ndaej miz gihbwnj yihliuz veiswngh fugsaeh, daihdaej guhbaenz aen dijhi baujcang ranzyouq, ndawbiengz huzndei onjdingh.
    —— Hwnqguh aen biengz mbaetyungh swhyenz、 vanzging huzndei haenx ndaej hwngfat baenaj gig daih. Daihdaej guhbaenz cawjdaej gunghnwngzgih baijbouh, cobouh laebhwnj aen dijhi sinzvanz leihyungh swhyenz. Moix danhvei ndaw guek swnghcanj cungjciz siuhauq nwngzyenz caeuq baizcuengq wyangjvadan daih fukdoh gyangqdaemq, gij doxgaiq uqlah youqgaenj haenx baizcuengq cungjliengh gemjnoix yienhda. Ndoengfaex cwgoemq cingzsoq daezsang, swnghdai hidungj yied daeuj yied onjdingh, diegyouq bouxvunz gaijndei yienhda.
    Yaek cienzmienh hwnqbaenz aen biengz siujgangh, bietdingh aeu miz gij cwngci damjliengh caeuq dungxcaiz engq daih, mbouj saet seizgei bae gyalaeg gaijgwz lingzyiz youqgaenj, giengiet buqcawz sojmiz gij swhsiengj gvanhnen caeuq dijci gihci mbouj ndei gazngaih gohyoz hwngfat haenx, cauhlaeb aen cidu dijhi hidungj caezcienz、 gohyoz gveihfan、 yinhhengz mizyauq haenx, sawj gak fuengmienh cidu engqgya cingzsug engqgya dinghhingz. Aeu gyavaiq laeb caezcienz seveicujyi hawciengz ginghci dijci, laeb caezcienz aen gihbwnj ginghci cidu aeu gunghyoujci guh cawjdaej、 lai cungj sojyoujci ginghci doengzcaez hwngfat haenx, laeb caezcienz aen faenboiq cidu aeu ciuq hong faenboiq guh cawjdaej、 lai cungj faenboiq fuengsik caezyouq haenx, cingzdoh engq daih gvaengxlaengx engq gvangq dwk  fatok hawciengz yiengh giekdaej  cozyung youq ndaw faenbaij swhyenz de,  laeb caezcienz hungzgvanh diuzgung dijhi,  laeb caezcienz cungj ginghci dijhi hailangh haenx, doidoengh ginghci engqgya miz yauliz、  engqgya goengbingz、 engqgya ndaej lienzdaemh  hwngfat. Gyavaiq doicaenh seveicujyi minzcuj cwngci guhbaenz cidu、 guhbaenz gveihfan、 guhbaenz banjloh bae, daj gak caengz gak aen lingjyiz  gyadaih hawj gunghminz miz bouhloh bae camgya cwngci,  sawj guekgya gak hangh hong ciuq fap bae guh. Gyavaiq laeb caezcienz vwnzva guenjleix dijci caeuq vwnzva swnghcanj ginghyingz gihci, daihdaej laebbaenz yienhdaih vwnzva hawciengz dijhi, laeb caezcienz guekmiz vwnzva swhcanj guenjleix dijci, cauhbaenz aen vwnzva hwngfat vanzging ikleih  cauhmoq cauhguh haenx. Gyavaiq guhbaenz aen ndawbiengz guenjleix dijci gohyoz mizyauq de, laeb caezcienz ndawbiengz baujcang dijhi, laeb caezcienz gihcwngz goenggungh fugsaeh caeuq gij guenjleix vangjloz ndawbiengz, laebhwnj gij dijci gihci saedbauj gwnzbiengz gawq gig miz rengzhoengh youh huzndei miz bouhloh haenx. Gyavaiq laebhwnj aen cidu swnghdai vwnzmingz, laeb caezcienz aen dijci gihci  haifat hoenggan diegguek、 mbaetyungh swhyenz、 baujhoh swnghdai vanzging, doidoengh guhbaenz aen gwzgiz moq hwnqguh yendaiva hawj bouxvunz caeuq swyenz doxhuz hwngfat.
    Aen yinvu ciuqgeiz cienzmienh hwnqbaenz aen biengz siujgangh gig gannanz naekcaem, daengx dangj dungzci itdingh aeu ngaemgyaeuj haenqguh、  goenqcaej buekguh. Guekgya aeu gyadaih ligliengh bangfuz lajmbanj caeuq Diegcungqgyang Diegbaihsae, bangcoengh doengh giz dieg neix gyavaiq gaijgwz hailangh、 gyaak gij  naengzlig hwngfat、 gaijndei gij gwndaenj beksingq. Gujli giz miz diuzgen de youq mwh hwnqguh yendaiva laebdaeb byaij youq baihnaj, vih daengx guek gaijgwz hwngfat guh ok gunghawj engq daih.
 
    4. Gyavaiq Laeb Caezcienz Seveicujyi Hawciengz Ginghci Dijci Caeuq Gyavaiq Cienjbienq Ginghci hwngfat Fuengsik
 
    Aeu hwnqguh ginghci guh cungsim dwg gij yinvu ceiq youqgaenj saenqhwng guekgya, hwngfat vanzlij dwg bouh ceiq youqgaenj gaijgez sojmiz vwndiz guek raeuz. Cijmiz doidoengh ginghci lienzdaemh cangqvuengh hwngfat, cijndaej cukmaenh aen vuzciz giekdaej sawj guekgya mwnhoengh fouqak、 beksingq vuenyungz an’onj、 ndawbiengz huzndei onjdingh. Bietdingh aeu itcig cungj hengz aen canloz swhsiengj hwngfat dwg dauhleix geng, baenzbaenz mbouj ndaej doenghngauz saek di.
    Youq aen Cungguek dangdaih, itcig cungj guh hwngfat dwg dauhleix geng gij bonjcaet iugouz de couh dwg itcig cungj hwngfat gohyoz. Aeu hwngfat gohyoz guh cawjdaez, aeu gyavaiq cienjbienq ginghci hwngfat fuengsik guh cawjsienq, dwg gij canloz genjleh gvanhaeh daengz guek raeuz hwngfat daengxbuenz. Aeu hab’wngq gij ginghci hingzseiq bienqvaq moq ndaw guek rog guek, gyavaiq guhbaenz ginghci hwngfat fuengsik moq, dawz doidoengh hwngfat giz laebdin de cienj daengz daezsang caetliengh caeuq yauyiz daeuj, roengzrengz gikfat gak cungj hawciengz cawjdaej hwngfat rengzhoengh moq, roengzrengz demgiengz gij rengzdoengh moq ndaej yungh cauhmoq doidoengh hwngfat haenx, roengzrengz laebhwnj aen dijhi moq hwngfat canjnieb yienhdaih, roengzrengz ganqok yiengh ginghci hwngfat hailangh miz youhsi moq, hawj ginghci hwngfat engq lai bae ingbaengh ndaw guek aeuyungh daegbied dwg gij siuhfei aeuyungh ndaej ragdoengh haenx, engq lai bae ingbaengh gij fugsaeh hangznieb yienhdaih caeuq gij canjnieb ngamqhwng miz canloz singqcaet haenx daeuj daiqdoengh, engq lai bae ingbaengh gohgi cinbu、daezsang gij suciz bouxguhhong、guenjleix cauhmoq daeuj doidoengh, engq lai bae ingbaengh mbaetyungh swhyenz caeuq sinzvanz ginghci daeuj doidoengh, engq lai bae ingbaengh singz mbanj gak dieg hwngfat doxngamj doxdaz, mboujduenh gyaak gij rengzlaeng ciengzgeiz hwngfat.
    Itcig cungj byaij diuz roen  gunghyezva、 sinsizva、 hawsingzvaq、 nungzyez yendaiva  yienghmoq youh miz Cungguek daegsaek, doidoengh  sinsizva caeuq gunghyezva ndaej yiengq cingzdoh laeg yungzhab、 gunghyezva caeuq hawsingzvaq ndaej ndeindei doxdaz、 hawsingzvaq caeuq  nungzyez yendaiva ndaej doxhab doxngamj, coicaenh  gunghyezva、 sinsizva、 hawsingzvaq、 nungzyez yendaiva doengzbouh hwngfat.
    (1) Cienzmienh gyalaeg  gaijgwz ginghci dijci. Gyalaeg gaijgwz dwg bouh ceiq youqgaenj gyavaiq cienjbienq ginghci hwngfat fuengsik. Gij haedsim vwndiz ginghci dijci gaijgwz dwg cawqleix ndei gij gvanhaeh cwngfuj caeuq hawciengz, bietdingh aeu engqgya aeueiq hawciengz gvilwd, engq ndei bae fatok gij yunghcawq cwngfuj. Aeu mbouj doenghngauz saek di bae gyamaenh caeuq hwngfat gunghyoujci ginghci, doihengz gunghyoujci lai cungj saedyienh hingzsik, gyalaeg gaijgwz gij giyez guekmiz, laebndei gak loih guekmiz swhcanj guenjleix dijci, doidoengh guekmiz swhbwnj engq lai cuengq haeuj gij hangznieb youqgaenj dem gij lingjyiz gig youqgaenj gvanhaeh daengz guekgya ancienz caeuq gozminz ginghci minghmeg haenx, mboujduenh gyaak gij rengzhoengh、 rengz gaemhanh、 rengz yingjyangj guekmiz ginghci.  Mbouj doenghngauz saek di bae gujli、 haeujcoengh、 dazyinx gij ginghci mbouj dwg gunghyoujci haenx hwngfat, baujcwng gak cungj sojyoujci ginghci ciuq fap bingzdaengj bae sawjyungh swnghcanj yausu、 goengbingz camgya hawciengz gingcwngh、 doengzdaengj ndaej daengz faplwd baujhoh. Laeb caezcienz aen hawciengz dijhi yienhdaih, gyagiengz hwnqguh gij gihci hungzgvanh diuzgung muzbyauh caeuq cwngcwz soujduenh. Gyavaiq gaijgwz caizsui dijci, laeb caezcienz aen dijci hawj cienzcaiz cunghyangh dem deihfueng caeuq saehgienz doxboiq ndei haenx,  laebndei aen goenggungh caizcwng dijhi ndaej coicaenh gihbwnj goenggungh fugsaeh bingzyaenz doxdaengj caeuq hwnqguh cawjdaej gunghnwngzgih, cauhlaeb deihfueng caizsuiq dijhi, guhbaenz aen cidu sou cienzgvaeh ndaej doiq gaijndei gezgou、 ndawbiengz goengbingz mizik haenx. Laebhwnj aen gihci caez yiengjsouh gij souik hableix dwg cienjnyiengh swhyenz goenggungh aeu ndaej haenx. Gyalaeg gaijgwz ginhyungz dijci, laeb caezcienz aen  ginhyungz dijhi yienhdaih ndaej coicaenh hungzgvanh ginghci onjdingh、  haeujcoengh saeddaej ginghci hwngfat haenx, gyavaiq hwngfat gij swhbwnj hawciengz lai caengz, onjbouh doicaenh gaijgwz liliz caeuq veiliz  bienqbaenz hawciengz hingzsik haenx, cugbouh saedyienh yinzminzbi swhbwnj hanghmoeg ndaej caujvuenh. Gyavaiq hwngfat gij ginhyungz gihgou beksingq ginghyingz haenx.  Laeb caezcienz ginhyungz gamguenj, doidoengh ginhyungz cauhmoq, hawj gij hangznieb ngaenzhangz、 cwnggen、 baujyiemj daengj lai ak bae gingcwngh, henhoh ginhyungz onjdingh.
    (2) Saedhengz aen canloz aeu cauhmoq doidoengh hwngfat. Gohgi cauhmoq dwg gij canloz cengjdaemx daezsan, g gij swnghcanjliz ndawbiengz caeuq gyoebhab gueklig, bietdingh aeu baij youq aen dieg haedsim  guekgya hwngfat daengxbuenz. Aeu itcig cungj byaij diuz roen gag guhcawj cauhmoq miz Cungguek daegsaek, aeu coengz yawj doh lajmbwn daeuj maeuzveh caeuq doidoengh cauhmoq, daezsang gij naengzlig codaeuz cauhmoq、 caebcomz cauhmoq caeuq yinxhaeuj siuvaq supsou caiq cauhmoq, engqgya yawjnaek doxbang cauhmoq. Gyalaeg gaijgwz gohgi dijci, doidoengh gohgi caeuq ginghci gaenjmaed giethab, gyavaiq laebguh guekgya cauhmoq dijhi, roengzrengz cauhlaeb aen gisuz cauhmoq dijhi aeu giyez guh cawjdaej、 hawciengz guh dazyinx、 swnghcanj hagsib  yenzgiu dox giethab haenx. Laebndei aen dijhi cihsiz cauhmoq, hawj giekdaej yenzgiu、  gisuz ceiq sang ceiq moq yenzgiu、 gwnzbiengz goeng’ik  gisuz yenzgiu ndaej gyagiengz, daezsang gij suijbingz gohyoz yenzgiu caeuq gij naengzlig cwngzgoj cienjvaq, ciengjciemq giz ceiq sang gaemhanh gohgi hwngfat canloz. Saedhengz gij  gohgi cienhangh hungnaek guekgya, cungbyoengq giz gazngaih gisuz hungnaek. Gyavaiq yenzgiu haifat sawjyungh gisuz moq canjbinj moq gunghyi moq, gyagiengz gisuz caebcomz caeuq sanghyez vunqsik cauhmoq. Laebndei gohgi cauhmoq bingzgya byauhcunj、 gikcoi gihci、 cienjvaq gihci. Saedhengz gij canloz cihsiz canjgenz, gyagiengz baujhoh cihsiz canjgenz. Coicaenh cauhmoq swhyenz boiqbaij yauliz sang caeuq gyonjhab caebcomz, dawz gij coengmingz caeuq goengrengz daengx biengz comz daengz cauhmoq hwngfat gizneix daeuj.
       (3) Doicaenh ginghci gezgou guh canloz diuzcwngj. Neix dwg gyavaiq cienjbienq ginghci hwngfat fuengsik aen cawjgung fueng’yiengq de. Bietdingh aeu dawz gaijndei aen gezgou aeuyungh、 sawj canjnieb gezgou bienq ndei、 coicaenh gak dieg doxngamj hwngfat、 doicaenh hawsingzvaq guh cungdenj, roengzrengz gaijgez gij vwndiz hungnaek dwg gezgou cughaed ginghci lienzdaemh cangqvuengh hwngfat haenx. Aeu dawzmaenh aen canloz gihdenj gyalai ndaw guek aeuyungh neix, gyavaiq laebhwnj aen gihci ciengzgeiz mizyauq gyalai siuhfei aeuyungh haenx, gejcuengq gij rengzndumj gihminz siuhfei, baujciz douzswh hableix demlai, gyahung aen hawciengz gveihmoz ndaw guek. Dawzmaenh hwngfat saeddaej ginghci aen giekdaej gaenjmaenh neix, saedhengz gij cwngcwz cosih doiq  hwngfat saeddaej ginghci engqgya mizik haenx, gyagiengz dazyinx gij fueng’yiengq aeuyungh, doidoengh gij canjnieb ngamqhwng miz canloz singqcaet、gij hangznieb cauhguh senhcin de cangqvuengh hwngfat, gyavaiq conzdungj canjnieb cienjhingz swnggaep, doidoengh fugsaeh hangznieb daegbied dwg fugsaeh hangznieb yienhdaih hwngfat hungcoek, hableix baijbouh hwnqguh giekdaej sezsih caeuq giekdaej canjnieb. Hwnqguh gij saenqsik giekdaej sezsih daihlaeng, hwngfat aen canjnieb dijhi saenqsik gisuz yienhdaih, laeb caezcienz gij dijhi baujcang saenqsik ancienz, doicaenh  gvangqlangh yinhyungh saenqsik vangjloz gisuz. Daezsang gij haedsim gingcwngh naengzlig giyez hung rauh, haeujcoengh giyez iq dem giyez iqet daegbied dwg gij giyez iq dem giyez iqet  gohgihingz haenx hwngfat. Laebdaeb saedhengz gihyiz hwngfat cungjdaej canloz, cungfaen fatok gij haemq miz youhsi  gak dieg, sien doicaenh Baihsae daih haifat, cienzmienh saenqhwng dieg Doengbaek  daengj gunghyez gihdi laux, daihlig doicaenh dieg Cungqgyang hwnghwnj, gaenxmaenx haeujcoengh dieg Baihdoeng daiqdaeuz hwngfat gonq. Yungh giz bang giz daengj lai cungj hingzsik, gyarengz bangfuz dieg gwzming laujgih、 dieg siujsoq minzcuz、 dieg henz guek、 dieg gungzhoj. Gohyoz gveihva gij gveihmoz caeuq baijbouh  hawsingz baenz gyoengq, gyaak  hawsingz rauh iq caeuq haw iq gij goengnaengz hwngfat canjnieb、 goenggungh fugsaeh、 ciepsou couhnieb、 gyonjcomz vunz lai neix. Gyavaiq gaijgwz huciz cidu, miz bouhloh bae doicaenh boux guh nungzyez cienjbaenz boux gihminz hawsingz, roengzrengz saedyienh cwngzcin gihbwnj goenggungh fugsaeh cungj guenj daengz gyoengq vunz ciengzseiz youq haenx.
    (4) Doidoengh singz mbanj baenz aen cingjdaej ndeu hwngfat. Gaijgez ndei gij vwndiz nungzyez nungzcunh nungzminz, dwg daengx dangj  gunghcoz youqgaenj ndawde yiengh ceiq youqgaenj haenx, singz mbanj baenz cingjdaej hwngfat dwg diuz roen daj goekgaen bae gaijgez gij vwndiz “sam nungz”. Aeu gyarengz doengjit maeuzveh singz mbanj hwngfat, gyaak gij rengzhoengh lajmbanj hwngfat, cugbouh bae suksiuj gij cengca singz mbanj, coicaenh singz mbanj doengzcaez mwnhoengh. Itcig cungj hengz gij fuengcim gunghyez dauq bang nungzyez、 hawsingz  haeujcoengh lajmbanj caeuq lai hawj noix aeu cuengqvued, gyarengz hengz gij cwngcwz hawj “sam nungz” bienq ak、 ndaej leih、 fouqmiz, hawj guengjdaih nungzminz bingzdaengj camgya guh yendaiva、 doengzcaez faenyiengj gij cwngzgoj yendaiva. Gyavaiq hwngfat gij nungzyez yienhdaih, gyagiengz gij naengzlig nungzyez gyoebhab swnghcanj haenx, saedbauj guekgya haeuxgwn ancienz caeuq gij nungzcanjbinj youqgaenj ndaej mizyauq gunghawj. Itcig cungj dawz hwnqguh guekgya giekdaej sezsih caeuq  hwngfat  saehnieb ndawbiengz cungdenj cuengq youq lajmbanj, haeujlaeg doicaenh hwnqguh lajmbanj moq caeuq banggungz haifat,  cienzmienh gaijndei gij swnghcanj swnghhoz diuzgen  lajmbanj. Roengzrengz coicaenh nungzminz demsou, baujciz nungzminz souhaeuj lienzdaemh haemq vaiq demlai. Itcig cungj ciuq hengz caeuq laebndei gij gihbwnj ginghyingz cidu lajmbanj, ciuq fap henhoh nungzminz gij gienz cingzbau ginghyingz diegdeih、gij gienz sawjyungh diegranz、 gij gienz faenboiq cizdij souik, gyahung gij saedlig cizdij ginghci, hwngfat nungzminz ciennieb gapguh caeuq gujfaenh gapguh, gungganq  ginghyingz cawjdaej moq, hwngfat lai cungj hingzsik gveihmoz ginghyingz, cauhlaeb aen nungzyez ginghyingz dijhi moq aeu cizyozva、 conhyezva、 cujcizva、 seveiva dox giethab haenx. Gaijgwz gij cidu cwng dieg, youq gij souik diegdeih gyaciz demlai ndawde,  hawj nungzminz daezsang  faenboiq beijlaeh. Gyavaiq laebndei aen dijci gihci singz mbanj baenz cingjdaej hwngfat, roengzrengz youq singz  mbanj gveihva、 giekdaej sezsih、 goenggungh fugsaeh daengj fuengmienh doicaenh baenz cingjdaej bae guh, coicaenh singz mbanj yausu bingzdaengj doxvuenh caeuq goenggungh swhyenz bingzyaenz doxdaengj boiqbaij, cauhbaenz aen gungh nungz、singz mbanj gvanhaeh moq aeu gunghyez coicaenh nungzyez、 aeu hawsingz daiqdoengh lajmbanj、 gunghyez nungzyez doxleih、 hawsingz lajmbanj habbaenz aen cingjdaej ndeu.
    (5) Cienzmienh daezsang gij suijbingz yiengh ginghci hailangh. Yaek hab’wngq gij hingzseiq moq ginghci youq cienz seiqgyaiq hwngfat, couh bietdingh aeu saedhengz aen hailangh canloz engqgya remcieng cawjdoengh, laebndei yiengh ginghci dijhi hailangh、 doxleih caez hingz、 lai yiengh doxdaengh、 ancienz yauqlwd sang haenx. Aeu gyavaiq cienjbienq gij fuengsik doiq rog  hwngfat ginghci. Doidoengh hailangh coh aen fueng’yiengq gaijndei gezgou、  haivat dohlaeg、 daezsang yauqik haenx cienjbienq. Cauhmoq aen vunqsik hailangh, coicaenh henzhaij diegndaw henzgyaiq hailangh gijndei gijak doxbouj, cauhbaenz aen hailangh gihyiz dazyinx gozci ginghci doxgap caeuq gingcwngh neix, gungganq giz dieg hailangh remak bae daiqdoengh gihyiz hwngfat. Itcig cungj caez yawjnaek cuzgouj caeuq cingouj, gyagiengz mouyiz cwngcwz caeuq canjnieb cwngcwz doxdaengh doxhuz, cauxbaenz gij youhsi moq cuzgouj gingcwngh aeu gisuz、 binjbaiz、 caetliengh、 fugsaeh guh haedsim haenx, coicaenh gyagoeng mouyiz cienjhingz swnggaep, hwngfat fugsaeh mouyiz, doidoengh doiq rog mouyiz doxdaengh hwngfat. Daezsang leihyungh vaiswh gyoebhab youhsi caeuq cungjdaej yauqik, doidoengh yinxhaeuj swhbwnj、  yinxhaeuj gisuz、  yinxhaeuj dungxcaiz ndeindei giethab. Gyavaiq yamqdin byaij okbae, gyaak gij naengzlig giyez youq gwnz seiqgyaiq ginghyingz, gungganq buek  gunghswh hamj guek youh miz seiqgyaiq suijbingz ndeu. Doengjit suenqveh song mbiengj、 lai mbiengj、 gihyiz dem gihyiz haemq iq  hailangh doxgap, gyavaiq hengzguh aen canloz swyouz mouyizgih, doidoengh caeuq seiqhenz guekgya dox lienzhab doxdoeng. Daezsang gij naengzlig dingjdangj gozci ginghci fungyiemj.
    Raeuz itdingh aeu giendingh saenqsim, dwkhingz ciengz ciengq sinhoj haenqrem cienzmienh gyalaeg gaijgwz ginghci dijci  caeuq gyavaiq cienjbienq gij fuengsik hwngfat ginghci, dawz gij ginghci hwngfat rengzhoengh  caeuq gingcwngh naengzlig guek raeuz daezsang daengz aen suijbingz moq bae.
 
    5.  Itcig Cungj Byaij Diuz Roen hwngfat Cwngci  Yiengh Seveicujyi  Miz Cungguek Daegsaek Caeuq Doicaenh Gaijgwz Cwngci Dijci
 
    Beksingq minzcuj dwg mbaw geizhauh ronghsak dangj raeuz itcig cungj yaengxsang haenx. Gaijgwz hailangh doxdaeuj, raeuz cungjgez hwngfat seveicujyi minzcuj cingq fanj song mbiengj gingniemh, giengzdiuh beksingq minzcuj  dwg diuz mingh seveicujyi, itcig cungj dawz guekgya sojmiz gienzlig gvi beksingq, mboujduenh doicaenh   gaijgwz cwngci dijci, hwnqguh seveicujyi minzcuj cwngci ndaej hwngfat baenaj gig daih, guhbaenz haiok caeuq itcig cungj byaij diuz roen cwngci hwngfat yiengh seveicujyi miz Cungguek daegsaek, vih saedyienh yiengh beksingq minzcuj ceiq gvangqlangh neix doekdingh le fueng’yiengq cingqdeng.
    Cwngci dijci gaijgwz dwg guek raeuz cienzmienh gaijgwz gij gapbaenz bouhfaenh youqgaenj de. Bietdingh aeu laebdaeb remcieng onjdangq doicaenh cwngci dijci gaijgwz, hwngfat yiengh beksingq minzcuj engqgya gvangqlangh、 engqgya cungfaen、 engqgya laebcienz. Bietdingh aeu itcig cungj dawz aen dangj lingjdauj、 beksingq danggya guhcawj、ciuq fap ceihleix guekgya ndeindei doengjit hwnjdaeuj, aeu baujcwng beksingq danggya guhcawj guh goekgaen, aeu demgiengz gij rengzhoengh dangj caeuq guekgya、 diuhdoengh beksingq cizgizsing guh muzbyauh, gyadaih seveicujyi minzcuj, gyavaiq hwnqguh seveicujyi fapceih guekgya, hwngfat seveicujyi cwngci vwnzmingz. Aeu engqgya yawjnaek gaijndei gij  lingjdauj fuengsik caeuq gaemgienz fuengsik aen dangj, baujcwng dangj ndaej lingjdauj beksingq mizyauq ceihleix guekgya; engqgya yawjnaek laebcienz minzcuj cidu、 demlai minzcuj hingzsik, baujcwng beksingq ciuq fap hengzguh minzcuj senjgij、 minzcuj gezcwz、 minzcuj guenjleix、 minzcuj gamduk; engqgya yawjnaek fatok fapceih youq ndaw guekgya ceihleix caeuq ndawbiengz guenjleix gij yunghcawq youqgaenj de, henhoh guekgya fapceiq doengjit、 cunhyenz、gienzvi, baujcwng beksingq ciuq fap yiengj miz gvangqlangh gienzleih caeuq swyouz. Aeu dawz cauhlaeb cidu cuengq youq aen vih doedyienh, cungfaen fatok gijndei seveicujyi cwngci cidu guek raeuz, gaenxmaenx hagaeu gij cwngzgoj miz ik vunzloih cwngci vwnzmingz, baenzbaenz mbouj ciuqbuen aen vunqsik Sihfangh cwngci cidu.
    (1) Haeujcoengh caeuq baujcwng beksingq doenggvaq yinzminz daibyauj daihhoih hengzsawj guekgya gienzlig. Yinzminz daibyauj daihhoih cidu dwg aen cwngci cidu  goekgaen baujcwng beksingq danggya guhcawj. Aeu lai rox sawj gij cawjcieng aen dangj doenggvaq fapdingh bouhloh bienqbaenz gij eiqceiq guekgya, haeujcoengh yinzda dem aen cangzveijvei de cungfaen fatok gij yunghcawq guekgya gienzlig gihgvanh, ciuq fap hengzsawj gij  cizgenz laebfap、 gamduk、 gietdingh、 nyaemhmienx daengj, gyagiengz laebfap gunghcoz cujciz boiqhab ndei, gyagiengz gamduk “cwngfuj caeuq fazyen、 genjcazyen”, gyagiengz saemjcaz caeuq gamduk cwngfuj sojmiz yawhsuenq gietsuenq. Daezsang gij beijlaeh gihcwngz yinzda daibyauj daegbied dwg itsienq gunghyinz、 nungzminz、 cihsiz fwnswj daibyauj, gyangqdaemq gij beijlaeh dangj cwng lingjdauj ganbu daibyauj. Youq yinzda ndalaeb aen gihgou lenzloz daibyauj, laebndei aen cidu daibyauj lienzhaeh cungqvunz. Laebcienz guekgya gienzlig gihgvanh cujciz cidu, gaijndei cangzveijvei、 conhveijvei gapbaenz yinzyenz gij cihsiz caeuq nienzgeij gezgou de, daezsang gij beijlaeh conhciz veijyenz, demgiengz gij naengzlig ciuq fap hengzsawj cizvu.
    (2) Laebcienz gij  cidu seveicujyi hezsangh minzcuj. Seveicujyi hezsangh minzcuj dwg aen hingzsik youqgaenj beksingq minzcuj guek raeuz. Aeu laebndei hezsangh minzcuj cidu caeuq gunghcoz gihci, doicaenh hezsangh minzcuj gvangqlangh、 lai mbaek、 baenz cidu bae hwngfat. Doenggvaq guekgya cwnggenz gihgvanh、 cwnghez cujciz、 dangjbai donzdij daengj miengloh, couh gij vwndiz hungloet ginghci ndawbiengz hwngfat caeuq gij saedsaeh vwndiz nangqdaengz gij nemndang leih’ik cungqvunz haenx gvangqlangh doxyaeng, gvangqlangh ciepsou gij yigen cungqvunz、 gvangqlangh soucomz gij coengmingz beksingq, demlai gij nyinhrox doxdoengz、demgiengz rengzgap. Itcig cungj hengz caeuq laeb caezcienz aen cidu lai dangj doxgap caeuq cwngci doxyaeng aeu Cunghgoz Gungcanjdangj lingjdauj haenx, cungfaen fatok gij yunghcawq youqgaenj yinzminz cwnghez dangguh diuz miengloh doxyaeng minzcuj, hopheux doxgiet caeuq minzcuj song aen cawjdaez hung neix, doicaenh  laeb ndei gij cidu cwngci doxyaeng、 minzcuj gamduk、 canhcwng yicwng, engq ndei bae diuz ndei gvanhaeh、 gyonjcomz ligliengh、 daez genyi ok geiqmaeuz、 fugsaeh daihbuenz. Gyagiengz caeuq minzcuj dangjbai guh cwngci doxyaeng. Dawz cwngci doxyaeng nabhaeuj gezcwz bouhloh bae, itcig cungj youq mwh caengz gezcwz sien doxyaeng caeuq youq mwh cingqcaih gezcwz guh doxyaeng, sawj minzcuj doxyaeng lai miz saedyauq. Haeujlaeg guh ciendaez doxyaeng、 duigouj doxyaeng、 gyaiqbied doxyaeng、 daezanq banhleix doxyaeng. Gaenxmaenx guh gihcwngz minzcuj doxyaeng.
    (3) Laeb caezcienz gihcwngz minzcuj cidu. Youq singz mbanj segih ceihleix、gihcwngz goenggungh hongsaeh caeuq goeng’ik saehnieb ndawde, saedhengz cungqvunz gag guenjleix、gag fugsaeh、gag son’gyauq、 gag gamduk, dwg gij fuengsik youqgaenj beksingq ciuq fap cigsoh hengzsawj minzcuj gienzleih. Aeu laebcienz aen gihci gihcwngz cungqvunz gagguenj  gig miz rengzhoengh、 youz gihcwngz dangj cujciz lingjdauj haenx, aeu gyagvangq miz bouhloh camgya、 doicaenh saenqsik goenghai、 gyagiengz lwnhsaeh doxyaeng、 gyagiengz gienzlig gamduk guh cungdenj, haigvangq gvaengxlaengx caeuq miengloh, demlai neiyungz caeuq hingzsik, baujcang beksingq yiengj miz gij minzcuj gienzleih engq lai engq cietsaed. Cienzsim cienzeiq baenghgauq gunghyinz gaihgiz, laebcienz aen minzcuj guenjleix cidu giyez saehnieb danhvei aeu cizgungh daibyauj daihhoih guh gihbwnj hingzsik haenx, baujcang gij minzcuj gienzleih cizgungh camgya guenjleix caeuq gamduk neix. Fatok gij cozyung gihcwngz gak loih cujciz dox boiqhab guh haenx, saedyienh cwngfuj guenjleix caeuq gihcwngz minzcuj ndeindei giethab hwnjdaeuj.
    (4) Cienzmienh doicaenh ciuq fap ceihleix guekgya. Fapceih dwg gij gihbwnj fuengsik ceihleix guekgya guenjleix cwngci. Aeu doicaenh gohyoz laebfap、 yiemzgek caepfap、 goengcingq dawzfap、 bouxboux  soujfap, itcig cungj guh daengz baihnaj faplwd bouxboux bingzdaengj, baujcwng miz fap bietdingh aeu ciuq、caepfap bietdingh aeu yiemz、 famhfap bietdingh aeu banh. Laebndei yiengh faplwd dijhi seveicujyi miz Cungguek daegsaek, gyagiengz cungdenj lingjyiz laebfap, haigvangq diuz roenloh beksingq miz bouhloh camgya laebfap. Doicaenh ciuq fap hengzsawj guekgya gienzlig, cietsaed guh daengz yiemzgek gveihfan goengcingq vwnzmingz caepfap. Caiq gyalaeg gaijgwz swhfaz dijci, itcig cungj ciuq hengz caeuq laebndei yiengh seveicujyi swhfaz cidu miz Cungguek daegsaek, saedbauj saemjbuenq gihgvanh、 genjcaz gihgvanh ciuq fap dandog goengcingq hengzsawj gienz saemjbuenq、 gienz genjcaz. Haeujlaeg guh fazci senhconz gyauyuz, daihlig fatyiengz seveicujyi fazci cingsaenz, laebhwnj seveicujyi fapceih leixniemh, gyagiengz gij yisiz daengx biengz hag fap、 gingq fap、 souj fap、 yungh fap haenx. Daezsang lingjdauj ganbu gij naengzlig yungh fazci swhveiz caeuq fazci fuengsik bae gyalaeg gaijgwz、 doidoengh hwngfat、 hoizgej mauzdun、 henhoh onjdingh. Dangj lingjdauj beksingq ceiqdingh yenfaz caeuq faplwd, dangj bietdingh aeu youq ndaw gvaengx yenfaz caeuq faplwd hozdung. Mboujlwnh aen cujciz lawz roxnaeuz boux  lawz cungj mbouj ndaej miz daeggienz hamjgvaq yenfaz caeuq faplwd, baenzbaenz cungj mbouj hawj aeu vah dingj fap、 aeu gienz at fap、vih seileih buqvaih faplwd.
    (5) Gyalaeg gaijgwz hingzcwng dijci. Hingzcwng dijci gaijgwz, dwg doidoengh sangcwngz gencuz hab’wngq ginghci gihcuj cix bietyienz iugouz aeu baenzneix guh. Aeu ciuq aen hingzcwng dijci muzbyauh laebhwnj yiengh seveicujyi miz Cungguek daegsaek, haeujlaeg doicaenh cwngfuj caeuq giyez ginghyingz faenhai、 cwngfuj caeuq guekmiz swhbwnj ginghyingz faenhai、 cwngfuj caeuq  saehnieb danhvei ginghyingz faenhai、cwngfuj caeuq ndawbiengz cujciz faenhai,  cauhlaeb aen cwngfuj fugsaeh ciznwngz gohyoz、 gezgou bienq ndei、 cinghseuq yauqlwd sang、 beksingq habhoz. Gyalaeg gaijgwz hingzcwng saemjbae cidu, laebdaeb cinggemj cwngfuj gihgou、cuengq gienzhanh roengz baihlaj, doidoengh cwngfuj ciznwngz cienjbienq baenz cauh’ok hwngfat vanzging ndei、daezhawj goenggungh fugsaeh ndei、henhoh  gwnzbiengz goengbingz leixcingq. Onjbouh doicaenh gaijgwz bouhmonz hung cidu, laebcienz bouhmonz cizcwz dijhi. Gaijndei hingzcwng caengzgaep caeuq hingzcwng digih vehfaen ndalaeb, dieg miz diuzgen de ndaej damqra guh gij gaijgwz sengj cigsoh guenjleix yienh (si), gyalaeg gaijgwz yanghcin hingzcwng dijci. Cauxmoq hingzcwng guenjleix fuengsik, daezsang cwngfuj goengsaenqlig caeuq caephengz naengzlig. Yiemzgek gaemhanh gihgou bienceiq, gemjnoix lingjdauj cizvei soqliengh, gyangqdaemq gij cingzbonj hingzcwng. Doicaenh saehnieb danhvei faenloih gaijgwz. Laebndei aen gihci dox boiqhab guh dijci gaijgwz, doengjit maeuzveh gveihva caeuq dox boiqhab guh gij gaijgwz hungloet.
    (6) Laeb caezcienz aen dijhi hanhhaed caeuq gamduk gienzlig yinhhengz. Itcig cungj aeu cidu guenj gienz guenj saeh guenj vunz, baujcang beksingq gij gienz rox cingzgvang、 gij gienz camgya、 gij gienz gangjok、 gij gienz gamduk, dwg  gij baujcwng youqgaenj sawj gienzlig ndaej cingqdeng yinhhengz haenx. Aeu saedbauj gij gienz gezcwz、 gij gienz caephengz、 gij gienz gamduk gawq dox hanhhaed youh dox boiqhab ndei, saedbauj guekgya gihgvanh ciuq fapdingh gienzhanh caeuq bouhloh hengzsawj gienzlig. Itcig cungj guh gohyoz gezcwz、 minzcuj gezcwz、 ciuq fap gezcwz, laebcienz gezcwz gihci caeuq cwngzsi, fatok gij yunghcawq aen cang ukgyaeuj, laebhwnj caezcienz aen cidu gyaepcaz gezcwz cwzyin caeuq niujcingq loengloek. Famzdwg gij gezcwz nangqdaengz nemndang leih’ik vunzlai de cungj aeu cungfaen dingqaeu yigen vunzlai, famzdwg gij guhfap sonjhaih leih’ik vunzlai de cungj aeu giengiet fuengzre caeuq niujcingq.  Doicaenh  gienzlig yinhhengz ndaej goenghai、 gveihfan, laebndei gij cidu dangjvu goenghai、 cwngvu goenghai、 swhfaz goenghai caeuq gak aen lingjyiz banhsaeh goenghai, laebcienz gij cidu faekcam、 gyaepcaz cwzyin、 saemjgeiq ginghci cwzyin、 nyinhloek swz bae cizvu、 baqmienx daengj, gyagiengz  gamduk ndaw dangj、  gamduk minzcuj、 gamduk  faplwd、  gamduk yizlun, hawj beksingq gamduk gienzlig, hawj gienzlig youq laj ndit yinhhengz.
    (7) Gyamaenh caeuq hwngfat aen gyaez guek doengjit cansen ceiq gvangqlangh. Doengjit cansen dwg aen fapbauj youqgaenj、 ndaej comzgiet gij ligliengh gak fuengmienh, coicaenh cwngdangj、 minzcuz、 cunghgyau、  gaihcwngz、 gyoengq beixnuengx ndaw guek rog guek gij gvanhaeh de huzndei,  sawj yiengh seveicujyi miz Cungguek daegsaek caiq ndaej hingz ndeu. Aeu yaengxsang mbaw geizhauh aigozcujyi、 seveicujyi, gyamaenh aen giekdaej swhsiengj cwngci doengjit cansen, cingqdeng cawqleix gij gvanhaeh doxdoengz caeuq lai yiengh. Itcig cungj ciuq diuz fuengcim ciengzgeiz caemhyouq、 dox guh gamduk、 simsaej doxciuq、 yungznyaenq caezcaemh, bae gyagiengz caeuq minzcuj dangjbai dem doengh boux mbouj haeuj dangjbai de doxgiet caez guh, coicaenh youq mbiengj swhsiengj doengzsim doengzdaek、 youq mbiengj muzbyauh doengzsim doengzyiengq、 youq mbiengj hengzdoengh doengzsim doenghengz, gyagiengz hwnqguh aen duivuj doengh boux daibyauj rog dangj, genjaeu、 doigawj caeuq daezswng engq lai vunzmaenh rog dangj bae guh bouxdaeuz gak gaep guekgya gihgvanh. Cienzmienh cingqdeng gvancez lozsiz gij minzcuz cwngcwz aen dangj, itcig cungj saedhengz caeuq laeb ndei hangh cidu hawj dieg siujsoq minzcuz gagguenj, dawzmaenh aen cawjdaez gak minzcuz doengzcaez doxgiet buekguh、 doengzcaez  hwngfat mwnhoengh, haeujlaeg bae son vunz guh minzcuz doxgiet cinbu, gyavaiq gij dieg siujsoq minzcuz fathoengh, baujcang gij gienzik habfap siujsoq minzcuz, gyamaenh caeuq hwngfat yiengh minzcuz gvanhaeh seveicujyi bingzdaengj、 doxgiet、 doxbang、 huzndei, coicaenh gak aen minzcuz huzciz caemhyouq、 doengzsim cawz hoj、 huzndei fathoengh. Cienzmienh gvancez aen dangj diuz gihbwnj fuengcim hangh hong cunghgyau, hawj gij vunz guh hangz hong cunghgyau caeuq gyoengq vunz saenq cunghgyau haenx, youq ndaw coicaenh ginghci ndawbiengz fathoengh dawz ok gij yunghcawq gaenxmaenx de. Gujli caeuq dazyinx gyoengq vunz ndawbiengz gaihcwngz moq, engq lai ok rengz hawj aen saehnieb guh yiengh seveicujyi miz Cungguek daegsaek. Lozsiz  aen dangj gij cwngcwz hongsaeh vazgyauz, haeujcoengh gyoengq beixnuengx vazgyauz rog guek、 doengh boux vazgyauz dauqma guekcoj caeuq gij vunz ndaw ranz de, gvansim dem camgya guekcoj yendaiva caeuq aen daihnieb hozbingz doengjit.
    Diuz roen hwngfat yiengh cwngci seveicujyi miz Cungguek daegsaek, dwg diuz roen cingqdeng、 ndaej comzgiet ikfanh beksingq bae doengzcaez haenqrengz buekguh haenx. Raeuz itdingh aeu giendingh mbouj bienq dwk riengz diuz roen neix baenaj, sawj yiengh minzcuj cwngci seveicujyi guek raeuz, fat ok gij rengzlig sengmingh engqgya hoenghhwd dem.
 
    6. Netsaed Doicaenh Hwnqguh Aen Guekak Miz Yiengh Vwnzva Seveicujyi
 
    Vwnzva couh dangq gij meglwed aen minzcuz, dangq aen ranzmbanj cingsaenz gyoengq beksingq. Yaek cienzmienh hwnq baenz aen biengz siujgangh, saedyienh Cunghvaz Minzcuz daih fukhwng, couh bietdingh aeu doidoengh yiengh vwnzva seveicujyi daih hwngfat daih mwnhoengh, lengqlengq cungj hwng hwnqguh yiengh vwnzva seveicujyi, hawj guekgya gij saedlig unq vwnzva de bienq lai ak bae, hawj vwnzva aen yunghcawq dazyinx funghsang、 son gyoengq beksingq、 fugsaeh ndawbiengz、 doidoengh hwngfat de engq hoengh hwnjdaeuj.
    Yaek hwnqguh aen guekak miz yiengh vwnzva seveicujyi, couh bietdingh aeu byaij diuz roen hwngfat yiengh vwnzva seveicujyi miz Cungguek daegsaek, itcig cungj ciuq aen fueng’yiengq fugsaeh beksingq、 fugsaeh seveicujyi, itcig cungj ciuq diuz fuengcim bak va caez hai、 bak gya caez gangj, itcig cungj ciuq aen yenzcwz depgaenh saedsaeh、 depgaenh swnghhoz、 depgaenh cungqvunz, bae doidoengh gij cingsaenz vwnzmingz caeuq vuzciz vwnzmingz seveicujyi cienzmienh fathoengh, hwnqguh yiengh vwnzva seveicujyi gvihaeuj minzcuz、 gohyoz、 cungqvunz, youh najyiengq yendaiva、 najyiengq seiqgyaiq、 najyiengq daengzcog haenx.
    Yaek hwnqguh aen guekak miz yiengh vwnzva seveicujyi, bouh ceiq youqgaenj dwg aeu gyaak gij rengzhoengh dajcauh vwnzva daengx minzcuz. Aeu gyalaeg gaijgwz aen dijci vwnzva, gaijfang caeuq hwngfat gij naengzlig swnghcanj vwnzva, fatyiengz yozsuz minzcuj、 yisuz minzcuj, ok aen daizheiq vwnzva gvangqlangh ndeu hawj gyoengq beksingq, hawj sojmiz gij goekmboq dajcauh vwnzva cungj caenhliengh conhroenx okdaeuj, hai ok aen gugmienh moq baenzneix: Daengx minzcuz gij rengzhoengh dajcauh vwnzva de lienzdaemh fat okdaeuj, gij vwnzva swnghhoz ndawbiengz engqgya lai cungj lai yiengh, gij gihbwnj vwnzva gienzik gyoengq beksingq ndaej daengz engq ndei baujcang, gij swhsiengj daudwz suciz caeuq gohyoz vwnzva suciz gyoengq beksingq cienzmienh daezsang, gij vwnzva Cunghvaz yied baez yied miz rengz bae yingjyangj seiqgyaiq.
    (1) Gyagiengz hwnqguh aen haedsim gyaciz dijhi seveicujyi. Aen haedsim gyaciz dijhi seveicujyi couh dangq diuz minghhoenz hwng guek, de gietdingh aen fueng’yiengq fathoengh yiengh seveicujyi miz Cungguek daegsaek. Aeu haeujlaeg bae son’gyauq caeuq hagsib aen haedsim gyaciz dijhi seveicujyi, aeu aen haedsim gyaciz dijhi seveicujyi bae dazyinx gij swhsiengj ciuzlouz ndawbiengz、 comzgiet gij yawjfap doxdoengz ndawbiengz. Doicaenh Majgwzswhcujyi bienq hab gij guekcingz Cungguek bae、 hab gij iugouz aen seizdaih bae、 guengjdaih cungqvunz cungj roxyiuj bae, itcig mbouj cuengqsoeng dwk aeu aen lijlun dijhi guh yiengh seveicujyi miz Cungguek daegsaek, bae gyauqgvai daengx aen dangj、 son rox daengx gyoengq beksingq, haeujlaeg bae saedhengz aen gunghcwngz yenzgiu caeuq hwnqguh gij lijlun Majgwzswhcujyi, hwnqguh aen dijhi cauhmoq cezyoz ndawbiengz gohyoz, doidoengh aen lijlun dijhi guh yiengh seveicujyi miz Cungguek daegsaek sij haeuj sawsonhag bae、 gangj haeuj goqdangz bae、 guenq haeuj ukgyaeuj bae. Aeu lijsiengj saenqniemh bae dauqcawq son vunz, dawz guengjdaih beksingq comzgiet youq baihlaj mbaw geizhauh hungmbwk guh yiengh seveicujyi miz Cungguek daegsaek. Daihlig fatyiengz gij cingsaenz aen minzcuz caeuq gij cingsaenz aen seizdaih, aeu aigozcujyi、 cizdijcujyi、 seveicujyi bae haeujlaeg son vunz, fungfouq gij cingsaenz seiqgyaiq gyoengq beksingq, gyaak gij cingsaenz ligliengh gyoengq beksingq. Daiqdaeuz iu guh fouqgiengz、 minzcuj、 vwnzmingz、 huzndei, daiqdaeuz iu guh swyouz、 bingzdaengj、 goengcingq、 fapceih, daiqdaeuz iu guh gyaezguek、 gingqnieb、 lauxsaed、saenqyungh、 doxndei, gaenxmaenx gungganq caeuq saedhengz yiengh haedsim gyacizgvanh seveicujyi. Gaemndaet gij gienzlig bae lingjdauj caeuq guhcawj dazyinx hangh hong yisiz hingzdai, itcig cungj dazyinx aen fueng’yiengq cingqdeng, gyaak gij naengzlig dazyinx, sawj aen swhsiengj yizlun cawjlouz bienq lai hungcoek bae.
    (2) Cienzmienh daezsang gij daudwz suciz gyoengq goengminz. Neix dwg aen gihbwnj yinvu hwnqguh gij daudwz seveicujyi. Aeu itcig cungj dawz ciuq faplwd guenj guek dem aeu daudwz guenj guek dox giethab hwnjdaeuj, gyagiengz aeu gij daudwz goenggungh ndawbiengz、 gij daudwz guh ciknieb、 gij daudwz ndei gyahdingz、 gij binjdwz ndei goyinz bae son vunz, daihlig fatyiengz gij cienzdoengj daudwz ndei Cungguek, daihlig fatyiengz gij fungsug sibgvenq moq aen seizdaih. Doicaenh hangh gunghcwngz hwnqguh gij daudwz gyoengq goengminz, daihlig fatyiengz caen sienh ndei、 hongz gyaj yak couj, dazyinx gyoengqvunz gagrox bae hengzguh gij yivu fapdingh、 gij cwzyin ndawbiengz、 gij cwzyin gyahdingz, cauh gij heiqfaenh hawj vunzbiengz caez rox guhhong dwg miznaj、 dajcauh dwg hungmbwk, gungganq ok gij funghsang ndei rox yungznyaenq、 gangj cingqheiq、 lai ok rengz、 coicaenh huzndei. Doiq doengh gij vwndiz youqgaenj ndaw lingjyiz daudwz, haeujlaeg bae guh cienhangh son’gyauq caeuq ceihleix, gyagiengz son vunz lauxsaed saenqyungh bae guh cwngci、 lauxsaed saenqyungh bae guh seng’eiq、  lauxsaed saenqyungh bae guh ndawbiengz baedauq, guh swhfaz saenqyungh. Gyagiengz caeuq gaijcaenh gij hong swhsiengj cwngci, yawjnaek guh  yinzvwnz gvanhvaiz caeuq simleix dazyinx, gungganq yiengh simleix ndawbiengz gag aeueiq bonjfaenh、 gag siengsaenq bonjfaenh、 leixsingq bingzhuz、 gaenxmaenx doxhwnj haenx. Gyalaeg gij vueddoengh cungqvunz cauhlaeb cingsaenz vwnzmingz, gvangqlangh bae guh ceiqnyienh fugsaeh, doidoengh gij vueddoengh hag Leiz Fungh、 hag doengh boux ndaej guh buengjyiengh daudwz haenx, caiq ciengzseiz bae senhconz de.
    (3) Fungfouq gij cingsaenz vwnzva swnghhoz gyoengq beksingq. Hawj beksingq yiengjmiz gij cingsaenz vwnzva swnghhoz cangqheiq youh fungfouq, dwg cienzmienh hwnq baenz aen biengz siujgangh ndawde hangh neiyungz youqgaenj ndeu. Aeu itcig cungj dawz beksingq dangguh cungsim, bae dazyinx aen fueng’yiengq dajcauh cozbinj, daezsang gij caetliengh vwnzva canjbinj, ok gij huq ciengx cingsaenz engq ndei engq lai hawj gyoengq beksingq. Itcig cungj najyiengq gihcwngz、 fugsaeh cungqvunz, gyavaiq doicaenh hangh gunghcwngz cungdenj vwnzva ik beksingq, gyarengz bangfuz lajmbanj caeuq doengh giz deihfueng mbouj fatdad haenx hwnqguh vwnzva, laebdaeb doidoengh gij sezsih guh goenggungh vwnzva fugsaeh haenx mienxcienz hailangh hawj vunzbiengz. Hwnqguh aen dijhi bae ciepswnj gij vwnzva maenhndei daj ciuhgonq riuzcienz roengzdaeuj haenx, daihlig fatyiengz gij cienzdoengj vwnzva maenhndei Cungguek. Doigvangq caeuq gveihfan sawjyungh gij vah caeuq cihsaw guekgya doengyungh de. Hwngfat gij saehnieb vwnzva siujsoq minzcuz,caiq sawj de mwnhoengh bae. Guh gij vueddoengh vwnzva miz vunzlai caeuqfaenh haenx, dazyinx cungqvunz youq hwnqguh vwnzva ndawde bonjfaenh gag biujyienh、 gag son’gyauq、 gag fugsaeh. Guh gij vueddoengh daengxcungq beksingq caez doegsaw. Gyagiengz caeuq gaijcaenh gij neiyungz gwnz vangjloz, youq gwnz vangjloz lai giengzdiuh gij cingsaenz youqgaenj aen seizdaih. Gyagiengz doiq vangjloz guh ndawbiengz guenjleix, doicaenh vangjloz yinhhengz ndaej gveihfan mbouj luenh. Guh gij hong “baetcawz saekcingz ndauqndiet、 dwkceih doengh gij doxgaiq feihfap okbanj”, daeqceih gij yienhsiengq yahlaeuz yungzsug. Bujben doigvangq gij cihsiz hab gohyoz, daihlig fatyiengz gohyoz cingsaenz, daezsang gij gohyoz suyangj daengxcungq beksingq. Gvangqlangh bae guh aen yinhdoengh daengxcungq beksingq caez lienhndang, coicaenh gij dijyuz cungqvunz caeuq gij dijyuz doxdax cienzmienh hwngfat.
    (4) Gyaak vwnzva gij cingjdaej saedlig caeuq rengzlig gingcwngh de. Vwnzva miz saedlig dem miz rengzlig caeuq vunz gingcwngh, ndaej hauh ok guekgya fouqgiengz、 minzcuz saenqhwng youqgaenj. Aeu itcig cungj dawz gij yauqik ndawbiengz cuengq youq vih daih’it、 gij yauqik ndawbiengz caeuq yauqik ginghci dox doengjit, doidoengh gij saehnieb vwnzva cienzmienh mwnhoengh、 gij canjnieb vwnzva riengjvaiq hwngfat. Hwngfat gij saehnieb cezyoz ndawbiengz gohyoz、 sinhvwnz okbanj、 gvangjbo denyingj densi、 vwnzyoz yisuz. Gyagiengz hwnqguh doengh gij gunghcwngz goenggungh vwnzva caeuq hanghmoeg vwnzva hungnaek, laeb ndei aen dijhi guh goenggungh vwnzva fugsaeh, daezsang gij yauqnaengz fugsaeh. Coicaenh vwnzva caeuq gohgi dox yungzhab, hwngfat gij vwnzva niebdaiq yienghmoq, sawj gij canjnieb vwnzva bienq ndaej engq lai baenz gveihmoz、 lai cizyoz、 lai ciennieb bae. Cauhlaeb caeuq fathoengh aen cienzboq dijhi yienhdaih, daezsang gij naengzlig cienzboq. Gyagiengz gij rengzhoengh doengh aen vwnzva danhvei goeng’ik guekmiz, laeb caezcienz gij fazyinz ceihleix gezgou doengh aen vwnzva danhvei guh ginghyingz haenx, sawj  vwnzva  hawciengz mwnhoengh bae. Gyadaih vwnzva lingjyiz doiq rog hailangh, gaenxmaenx hagsib gaepsou gij vwnzva cingzgoj maenhndei rog guek. Cauh ok yiengh vanzging ndei hawj gyoengq vunzcaiz vwnzva suciz sang de ndaej daihliengh fat ok、 cangqheiq hungmaj haenx, ganq baenz buek daihsae lauxcangh okmingz caeuq gij vunz ndaej daibyauj minzcuz vwnzva ndeu, biujcangh doengh boux guh hong vwnzva、 gung’yen hungloet gvaq vunz haenx.
    Raeuz itdingh aeu seizseiz cungj ciuq aen fueng’yiengq baenaj guh yiengh vwnzva senhcin seveicujyi, gig miz vwnzva gagrox caeuq vwnzva gagsaenq, yamq hung byaij yiengq muzbyauh hungmbwk, hwnqguh aen guekak miz seveicujyi vwnzva ndeu.
 
    7.  Youq Ndaw Gaijndei Beksingq Swnghhoz Caeuq Cauhmoq Guenjleix Bae Gyagiengz Hwnqguh Aen Biengz
 
    Gyagiengz hwnqguh aen biengz, ndaej hawj aen biengz huzndei onjdingh miz baujcwngq youqgaenj. Bietdingh aeu coengz henhoh gij leih’ik goekgaen guengjdaih beksingq, bae gyavaiq laeb ndei aen dijhi gihbwnj goenggungh fugsaeh, gyagiengz caeuq cauhmoq aen biengz guenjleix, doidoengh hwnqguh aen biengz huzndei seveicujyi.
    Gyagiengz hwnqguh aen biengz, bietdingh aeu dawz baujcang caeuq gaijndei beksingq swnghhoz dangguh cungdenj. Guh gaijgwz hailangh caeuq hwnqguh yiengh yendaiva seveicujyi, aen muzdiz goekgaen de couh dwg vihliux hawj beksingq yiengjmiz gij vuzciz vwnzva swnghhoz engq ndei. Aeu lai maeuzaeu gij leih’ik beksingq swnghhoz, lai gej gij youheiq beksingq swnghhoz, gaijgez ndei doengh gij vwndiz gvendaengz leih’ik、 beksingq ceiq gvansim ceiq cigciep ceiq yienhsaed haenx, youq mbiengj hag miz vunz son、 guh miz cienz ndaej、 bingh miz vunz yw、 laux miz vunz ciengx、 vunz miz ranz youq laebdaeb lai ndaej hwnj mbaek, roengzrengz hawj beksingq gvaq gij saedceij engq ndei dem.
    Gyagiengz hwnqguh ndawbiengz, bietdingh aeu gyavaiq doicaenh gaijgwz gij dijci ndawbiengz. Aeu hopheux cauhlaeb aen dijhi guenjleix yiengh biengz seveicujyi miz Cungguek daegsaek, gyavaiq cauxbaenz aen dijci guenjleix ndawbiengz youz dangjveij lingjdauj、 cwngfuj fucwz、 ndawbiengz gapdoengz、 cungqvunz caeuqfaenh、 miz faplwd bae baujcang, gyavaiq cauxbaenz aen dijhi guh gihbwnj goenggungh fugsaeh youz cwngfuj guhcawj dazyinx、 guenj doh singz mbanj、 ndaej lienzdaemh guh roengzbae, gyavaiq cauxbaenz aen dijci laeb yiengh cujciz ndawbiengz yienhdaih、 cwngfuj caeuq ndawbiengz faenhai、 gienzleih caeuq cwzyin mingzbeg doekdingh、 ciuqei faplwd bae gagguenj, gyavaiq cauxbaenz aen gihci guenjleix ndawbiengz dawz daj goekdaeuz bae ceihleix、 youq ndaw hwngfat bienqvaq bae guenjleix、 miz saehgaenj couh guh wngqgip cawqceq dox giethab hwnjdaeuj.
    (1) Roengzrengz banh ndei gij gyauyuz beksingq hab’eiq. Gyauyuz couh dangq ndaek ringiek hawj minzcuz saenqhwng caeuq ndawbiengz cinbu. Aeu itcig cungj sien hwngfat gyauyuz gonq, cienzmienh gvancez diuz gyauyuz fuengcim aen dangj, itcig cungj aeu gyauyuz bae fugsaeh gij hong hwnqguh yiengh yendaiva seveicujyi、  fugsaeh beksingq, dawz laebhwnj daudwz caeuq gungganq boux vunz, dangguh aen yinvu goekgaen gyauyuz, ganq ok gyoengq bouxhwnqguh caeuq bouxciepban seveicujyi、 binjdwz dungxcaiz ndangdaej meijyuz cienzmienh fathoengh haenx. Cienzmienh bae guh suciz gyauyuz, gyalaeg gij gyoebhab gaijgwz ndaw lingjyiz gyauyuz, roengzrengz daezsang gij caetliengh gyauyuz, gungganq gij cwzyinganj ndawbiengz、 gij cingsaenz cauhmoq、 gij naengzlig saedguh gyoengq hagseng. Banh ndei gij gyauyuz mwh lwgnyez caengz haeuj hag, bingzyaenx hwngfat gouj bi yivu gyauyuz, daihdaej bujben doigvangq gij gyauyuz duenh gauhcungh, gyavaiq hwngfat gij ciknieb gyauyuz yienhdaih, doidoengh gauhdwngj gyauyuz ciuq coicaenh goengbingz daezsang caetliengh bae hwngfat, roengzrengz hwngfat gij saehnieb hawj vunz laebdaeb souh gyauyuz, laeb ndei aen dijhi daengx ciuhvunz cungj ndaej souh gyauyuz, hwnqguh aen biengz bouxboux cungj maij hagsib. Haenqrengz coicaenh gyauyuz goengbingz, hableix boiqbaij gij swhyenz gyauyuz, cungdenj boiqbaij roengz lajmbanj、 dieg biengyae、 dieg gungzhoj、 dieg siujsoq minzcuz bae, haeujcoengh doiq gyoengqvunz daegbied guh gyauyuz, lai ok cienz bang doengh boux hagseng ndaw ranz hojnanz de, gaenxmaenx doidoengh gyoengq lwg nungzminzgungh bingzdaengj ciepsouh gyauyuz, hawj moix boux lwgnyez cungj baenz boux vunzcaiz mizyungh. Gujli dazyinx gij ligliengh ndawbiengz bae hwngbanh gyauyuz.  Gyagiengz hwnqguh aen duivuj lauxsae, hawj gyoengq lauxsae binjdwz engq ndei son saw engq ak,  engq roxnyinh son saw ganq vunz dwg miznaj youh cwzyin mbouj mbaeu.
    (2) Doidoengh saedyienh yiengh couhnieb caetliengh engq sang. Couhnieb dwg aen goek beksingq swnghhoz. Aeu gvancez diuz fuengcim bouxguhhong gag guhcawj couhnieb、 hawciengz diuzcez couhnieb、 cwngfuj coicaenh couhnieb caeuq gujli cauhnieb, saedhengz aen canloz couhnieb yousien caeuq hangh cwngcwz couhnieb engqgya cizgiz dem.  Dazyinx bouxguhhong cienjbienq gij gvanhnen couhnieb, gujli lai roenloh、 lai hingzsik bae couhnieb, coicaenh aeu cauhnieb bae daiqdoengh couhnieb, guh ndei hangh hong bouxcoz couhnieb aeu gyoengq hagseng daihhag bizyez guh cungdenj, caeuq hangh hong couhnieb gyoengq vunz gaijhangz lajmbanj、 gyoengq vunz hojnanz hawsingz、 doengh bouxbing fuzyenz cienjnieb haenx. Gyagiengz song’yauq ciknieb ginwngz, hawj bouxguhhong lai miz naengzlig bae couhnieb dem cauhnieb, sawj couhnieb engqgya onjdingh. Laeb caezcienz aen hawciengz swhyenz vunzlig, laeb ndei aen dijhi fugsaeh couhnieb, sawj saetnieb baujyiemj lai ak coicaenh couhnieb. Laeb caezcienz aen dijhi lauzdung biucinj caeuq aen gihci hezdiuz gij gvanhaeh lauzdung, gyagiengz guh lauzdung baujcang gamcaz caeuq diuzgaij cungqcaiz doxceng, cauhlaeb yiengh gvanhaeh lauzdung huzndei.
    (3)  Siengj caenh banhfap gyalai gihminz souhaeuj. Yaek guh daengz hawj beksingq doengzcaez yiengjsouh gij cingzgoj hwngfat, couh bietdingh aeu gyalaeg gaijgwz gij cidu souhaeuj faenboiq, roengzrengz saedyienh gihminz souhaeuj demlai caeuq ginghci hwngfat doengzbouh、 lauzdung baucouz demlai caeuq lauzdung swnghcanj yauqliz daezsang doengzbouh, daezsang gij bijcung gihminz souhaeuj youq ndaw gozminz souhaeuj faenboiq, daezsang gij bijcung lauzdung baucouz youq ndaw baez faenboiq daih’it. Baez faenboiq daih’it caeuq baez faenboiq daihngeih cungj aeu giemgoq yauqliz caeuq goengbingz, baez faenboiq daihngeih engqgya yawjnaek goengbingz. Laeb ndei aen gihci hawj lauzdung、 swhbwnj、 gisuz、 guenjleix daengj yausu ciuq gung’yen bae caeuqfaenh baez faenboiq daih’it, gyavaiq laeb caezcienz aen gihci aeu suiqsou、 ndawbiengz baujcang、 senjdieg ceihawj guh soujduenh youqgaenj bae diuzcez baez faenboiq daihngeih. Gyalaeg gaijgwz gij gunghswh cidu giyez caeuq gihgvanh saehnieb danhvei, doihengz hangh cidu hawj giyez cizdij siengliengz fat gunghswh, baujhoh guhhong soj ndaej. Lai roenloh bae gyadaih gihminz gij souhaeuj ok laeng caizcanj de. Gveihfan gij cizsi souhaeuj faenboiq, baujhoh gij souhaeuj habfap, gyalai gij souhaeuj boux souhaeuj noix, diuzcez gij souhaeuj lai gvaqbouh, gimqcawz gij souhaeuj mbouj habfap.
    (4) Dungjcouz doicaenh hwnqguh aen dijhi ndawbiengz baujcang singz mbanj. Ndawbiengz baujcang dwg hangh gihbwnj cidu baujcang beksingq swnghhoz、 diuzcez ndawbiengz faenboiq ndeu. Aeu itcig cungj ciuq diuz fuengcim guenj doh daengx biengz、 baujcang gihbwnj swnghhoz、miz lai caengz、 ndaej lienzdaemh guh, aeu gyalai goengbingz、 hab’wngq riuzdoengh、 baujcwngq ndaej lienzdaemh guh cungdenj, cienzmienh laebbaenz aen dijhi ndawbiengz baujcang ndaej guenj doh sojmiz gihminz singz mbanj haenx. Gaijgwz caeuq laeb ndei gij cidu ndawbiengz baujyiemj ndaw giyez dem gihgvanh saehnieb danhvei, cingjhab gij cidu gihbwnj ciengxlaux baujyiemj caeuq gihbwnj ywbingh baujyiemj gyoengq gihminz singz mbanj, cugbouh cungsaed gij goyinz cangqhoh ciengxlaux baujyiemj, saedyienh gij cienz giekdaej ciengxlaux daengx guek dungjcouz, laebbaenz aen gihci bae doekdingh caeuq cingqciengz diuzcingj gij daiyi ndawbiengz baujcang giemgoq daengz gak cungj vunz haenx. Gyadaih gij roenloh soucomz cienzgoek ndawbiengz baujcang, laebhwnj aen cidu douzswh yinhyingz cienzgoek ndawbiengz baujyiemj, saedbauj cienzgoek ancienz, baujlouz caemhcaiq gyalai gij gyaciz de. Laeb ndei aen dijhi ndawbiengz banggouq, laeb caezcienz gij cidu ndawbiengz fukleih, haeujcoengh hwngfat gij saehnieb swnzsienh, guh ndei gij hong youhfuj anceiq. Laebbaenz hangh cidu ranzyouq youz hawciengz boiqbaij caeuq cwngfuj baujcang dox giethab haenx, gyagiengz hwnqguh caeuq guenjleix doengh gij ranzyouq aeu bae guh baujcang, muenxcuk gij gihbwnj aeuyungh doengh aen gyahdingz hojnanz. Itcig cungj saedhengz sai mbwk bingzdaengj hangh cwngcwz goekdaej guekgya neix, baujcang gih gienzik habfap gyoengq mehmbwk lwgnyez. Remcieng wngqdoiq ndawbiengz bouxvunz lauxgeq bienq lai, daihlig hwngfat gij saehnieb caeuq canjnieb fugsaeh vunzlaux. Laeb caezcienz aen dijhi guh ndawbiengz baujcang caeuq fugsaeh boux ndangcanz, cietsaed baujcang gij gienzik vunz ndangcanz. Laeb caezcienz aen dijci gvaqfwngz banhleix ndawbiengz baujcang, laebbaenz aen dijhi fugsaeh engqgya riengjvaiq caeuq fuengbienh beksingq dem.
    (5) Hawj gyoengq beksingq engqgya ndangcangq. Yaek coicaenh boux vunz cienzmienh fathoengh, couh bietyienz iugouz sien miz ndangcangq. Aeu itcig cungj ciuq aen fueng’yiengq fugsaeh hawj beksingq ndangcangq, itcig cungj dawz yawhfuengz cuengq youq vih daih’it、 aeu lajmbanj guh cungdenj、 cunghyih caeuq sihyih doengzcaez yawjnaek, ciuq aen iugouz bauj gihbwnj、 giengz gihcwngz、 laeb gihci, cungdenj doicaenh gij gyoebhab gaijgwz mbiengj ywbingh baujcang、 ywbingh fugsaeh、 goenggungh veiswngh、 gijyw gung’wngq、 dijci gamguenj, laeb ndei gij cwngcwz bauj guekminz ndangcangq, ok gij goenggungh veiswngh caeuq gihbwnj ywbingh fugsaeh dwg ancienz、 mizyauq、 fuengbienh、 bienzngeiz haenx hawj cungqvunz. Laeb caezcienz aen dijhi ywbingh baujyiemj goq doh daengxcungq beksingq, laebbaenz aen gihci baujcang caeuq bang gouq bang yw gij bingh hungnaek caeuq daegbied hungnaek, laeb ndei aen gihci bae wngqgip cawqceq gij goenggungh veiswngh saehgienh sawqmwh fatseng de caeuq yawhfuengz gaemhanh gij bingh hungnaek. Gyamaenh hangh cidu vehdingh gijyw gihbwnj. Laeb caezcienz aen vangjloz sam gaep ywbingh veiswngh fugsaeh lajmbanj caeuq aen dijhi veiswngh fugsaeh segih hawsingz, gyalaeg gaijgwz doengh gij yihyen goenggya soj laeb, gujli gij ligliengh ndawbiengz banh yihyen. Bangfuz hwngfat gij saehnieb cunghyih cunghyoz caeuq gij saehnieb yihyoz siujsoq mizcuz. Hawj gyoengq canghyw gij naengzlig fugsaeh de bienq lai ak bae, gyagiengz hwnqguh gij daudwz canghyw caeuq gij cozfungh canghyw. Gaijgwz caeuq laeb ndei gij dijci gihci gamguenj gijgwn gijyw ancienz haenx. Guh gij yinhdoengh veiswngh gyaezguek, coicaenh beksingq ndangdaej caeuq simleix cangqheiq. Laebdaeb saedhengz giva senglwg hangh cwngcwz goekdaej guekgya neix, sawj boux ngamq okseng de suciz bienq lai sang bae, cugbouh laeb ndei  cwngcwz, coicaenh yinzgouj ciengzgeiz bingzyaenx hwngfat.
   (6) Gyagiengz caeuq cauhmoq ndawbiengz guenjleix. Yaek sawj ndawbiengz guenjleix bienq ndaej engq hab gohyoz bae, couh bietdingh aeu gyagiengz hwnqguh doengh gij faplwd、 dijci gihci、 naengzlig、 aen duivuj vunzcaiz、 sinsizva gvendaengz ndawbiengz guenjleix haenx. Gaijcaenh cwngfuj gij fuengsik ok hawj goenggungh fugsaeh de, gyagiengz hwnqguh gij ndawbiengz guenjleix caeuq dijhi fugsaeh laj gihcwngz, gyagiengz gij goengnaengz fugsaeh segih singz mbanj, youq mbiengj ndawbiengz guenjleix caeuq fugsaeh, sawj giyez dem saehnieb danhvei、 beksingq donzdij gij cizcwz de bienq lai giengz bae, dazyinx gij cujciz ndawbiengz cangqheiq youh miz bouhloh dwk hwngfat, hawj cungqvunz lailai coengz giekdaej bae caeuqfaenh guh ndawbiengz guenjleix.  Guh ndei caeuq cauhmoq gij hong guenjleix caeuq fugsaeh  gyoengq vunz riuzdoengh dem gyoengq vunz daegbied.  Cingqdeng cawqleix gij mauzdun baihndaw beksingq, laebhwnj dem laeb caezcienz aen gihci henhoh gij gienzik cungqvunz、 youz aen dangj caeuq cwngfuj guhdaeuz dazyinx haenx, laeb ndei hangh cidu vunzlai sij saenq roxnaeuz daeuj cunz, laeb ndei aen dijhi saedyienh beksingq diuzgaij、 hingzcwng diuzgaij、 swhfaz diuzgaij lienzdoengh guhhong, haidoeng caeuq gveihfan gij roenloh hawj cungqvunz ndaej fanjyingj yigen caeuq iugouz、 hezdiuz leih’ik、 baujcang gienzik haenx. Laebhwnj dem laeb caezcienz aen gihci youq mwh yaek guh gezcwz hungnaek sien bingzguj gij fungyiemj ndawbiengz onjdingh. Gyagiengz hwnqguh gij giekdaej aen dijhi goenggungh ancienz caeuq giyez ancienz swnghcanj, naenxhaed fatseng doengh gij saehhux hungnaek caeuq daegbied hungnaek. Gyagiengz caeuq gaijcaenh aen dangj  lingjdauj doengh monz hong cwngci caeuq faplwd, gyagiengz hwnqguh aen duivuj cwngci caeuq faplwd, cietsaed rap hwnj aen cizcwz sawjmingh guh bouxhwnqguh、 bouxhendawz yiengh saehnieb seveicujyi miz Cungguek daegsaek. Gyalaeg hwnqguh ndawbiengz bingzan, laeb ndei aen dijhi daj sojmiz fuengmienh bae yawhfuengz caeuq gaemhanh gij cianh ndawbiengz, sawj swhfaz lai miz gihbwnj baujcang, ciuqfap fuengzre caeuq fadceih doengh gij vueddoengh famhfap famhcoih, baujcang beksingq sengmingh caizcanj ancienz. Laeb ndei aen canloz bauj guekgya ancienz caeuq gij gihci guhhong, cibfaen singjgaeh caeuq giengiet fuengzre doengh aen seiqlig digdoiq haenx gij vueddoengh faenmbek、 iemqhaeuj、 boekfan de, saedbauj guekgya ancienz.
    Daengx dangj caeuq daengx guek beksingq caezcaez hengzdoengh hwnjdaeuj, couh itdingh ndaej cauh ok aen gugmienh sengdoengh ndeu, guh daengz ndawbiengz huzndei bouxboux miz cwzyin、 aen biengz huzndei bouxboux ndaej yiengjsouh.
 
    8. Daihlig Doicaenh Hwnqguh Swnghdai Vwnzmingz
 
    Hwnqguh swnghdai vwnzmingz, dwg gienh daihsaeh gvanhaeh daengz beksingq vuenyungz、 minzcuz baenaj ndeu. Youq mwh roeb swhyenz hanhhaed bienq ndaet、 vanzging uqlah yiemzcungh、 swnghdai hidungj bienq rwix yiengh hingzseiq yiemzhaenq neix daengjnaj, bietdingh aeu laeb aen leixniemh swnghdai vwnzmingz, aeueiq swhyienz、 swnh’wngq swhyienz、 baujhoh swhyienz, dawz hwnqguh swnghdai vwnzmingz dangguh hangh hong gig youqgaenj, yungzhab haeuj hwnqguh ginghci、 hwnqguh cwngci、 hwnqguh vwnzva、 hwnqguh ndawbiengz gak fuengmienh caeuq daengx aen goqcingz bae, roengzrengz hwnqguh aen Cungguek gyaeundei, saedyienh Cunghvaz Minzcuz ciengzlwenx lienzdaemh hwngfat.
   Itcig cungj saedhengz mbaetyungh swhyenz caeuq baujhoh vanzging hangh cwngcwz goekdaej guekgya neix, itcig cungj ciuq diuz fuengcim mbaetyungh cuengq gonq、 baujhoh cuengq gonq、 cujyau baengh swhyienz gag hoizfuk, roengzrengz doicaenh yiengh hwngfat baengh saekloeg、 baengh sinzvanz、 baengh dihdan, cauxbaenz yiengh hoengqgan gwzgiz、 canjnieb gezgou、 swnghcanj fuengsik、 swnghhoz fuengsik mbaetyungh swhyenz caeuq baujhoh vanzging haenx, daj giz goek  bae niujcienj aen seiqdaeuz swnghdai vanzging bienq rwix, cauh aen swnghcanj swnghhoz vanzging ndei ndeu hawj beksingq, lai ok goengrengz hawj gij swnghdai ancienz daengx seiqgyaiq.
    (1) Hawj aen gwzgiz haifat diegguek bienq lai ndei bae. Swnghdai vwnzmingz aeu youq gwnz diegguek bae hwnqguh, bietdingh aeu insik moix conq diegguek. Aeu ciuq diuz yenzcwz yinzgouj swhyenz vanzging cingqngamj doxdaengh、 ginghci ndawbiengz caeuq swnghdai yauqik dox doengjit, bae gaemhanh gij giengzdoh haifat, diuzcingj gij gezgou diegdeih, coicaenh gij dieg swnghcanj yungh ndaej cizyoz youh yauqliz sang、 gij dieg swnghhoz anbaiz ndaej habdoh ndeiyouq、 gij dieg swnghdai bya heu raemx saw, louz engq lai dieghoengq hawj swhyienz hoizfuk, louz engq lai reih ndei naz biz hawj nungzyez, louz aen ranzmbanj gyaeundei mbwn gvengq、 dieg heu、 raemx seuq ndeu hawj lwglan. Gyavaiq saedhengz aen canloz vehfaen gij dieg gak miz cawjdaej goengnaengz, doidoengh gak dieg yiemzgek ciuq aen cawjdaej goengnaengz dinghvih de bae hwngfat, cauhlaeb gij gwzgiz dieg bienq hawsingz、 gij gwzgiz hwngfat nungzyez、 gij gwzgiz bauj swnghdai ancienz gawq gohyoz youh hableix. Hawj gij naengzlig haifat swhyenz ndaw haij bienq lai ak bae, hwngfat gij ginghci aen haij, baujhoh gij swnghdai vanzging aen haij, giengiet henhoh gij gienzik aen haij guekgya, hwnqguh yiengh guekgya aen haij giengzak.
    (2) Cienzmienh coicaenh mbaetyungh swhyenz. Baujhoh swnghdai vanzging, aen banhfap gaenbonj de dwg mbaetyungh swhyenz. Aeu mbaetyungh caeuq cizyoz leihyungh swhyenz, doidoengh daj goekgaen bae cienjbienq gij fuengsik leihyungh swhyenz, gyagiengz coengz daengx aen gocwngz bae guenjleix mbaetyungh, daihdaih roengzdaemq nwngzyenz、 raemx、 diegdeih siedhauq, sawj gij yauqliz caeuq yauqik leihyungh de bienq lai sang bae. Doidoengh coengz gaenbonj bae gaijbienq gij fuengsik swnghcanj caeuq siufeiq nwngzyenz, gaemhanh aen cungjliengh nwngzyenz siuhauq, gyagiengz mbaetyungh nwngzyenz gemjnoix siuhauq, haeujcoengh hwngfat gij canjnieb dihdan、 mbaetyungh nwngzyenz caeuq gij canjnieb nwngzyenz moq、 nwngzyenz ndaej caiqseng, saedbauj guekgya nwngzyenz ancienz. Gyagiengz baujhoh gij dieg goekraemx caeuq daj cungjliengh bae guenjleix yungh raemx, doicaenh sinzvanz leihyungh raemx, hwnqguh aen biengz mbaetyungh raemx. Yiemzyiemz soujmaenh  diuz fuengzsienq baujhoh reihnaz, yiemzgek gaemhanh gij yunghcawq diegdeih. Gyagiengz damqcaz、 baujhoh、 hableix haifat gij swhyenz gvangcanj.  Hwngfat yiengh ginghci dox sinzvanz, coicaenh youq aen goqcingz swnghcanj、 riuzdoeng、 siufeiq,  guh daengz swhyenz yunghliengh gemjnoix、 caiq leihyungh、 dawz huqfeiq bienqbaenz swhyenz bae.
    (3) Lai roengzrengz bae baujhoh swhyienz swnghdai hidungj caeuq vanzging. Boux vunz caeuq aen biengz aeu baengh swnghdai vanzging ndei, cij ndaej lienzdaemh hwngfat. Aeu guh doengh hangh gunghcwngz hungloet, bae cingjcoih caeuq hoizfuk gij swnghdai swhyienz, gyaak naengzlig bae swnghcanj gij canjbinj swnghdai, doicaenh gyoebhab ceihleix doengh giz diegdeih raemx namh riuzsaet、 bienq req bienq fwz, gyadaih gij menciz ndoengfaex、 daemzdingh caeuq diegmbaeq, baujhoh doenghduz doenghgo lai cungj lai yiengh. Gyavaiq hwnqguh suijli, hawj hawsingz lajmbanj lai ak fuengz raemxrongz dingj mbwnrengx byat raemxdumh. Gyagiengz hwnqguh aen dijhi yawhfuengz caeuq gemjnoix caihaih, lai ak bae fuengzre dingjdangj doengh gij caihaih mbwnheiq、 diciz、 deihdoengh. Itcig cungj dawz yawhfuengz cuengq youq vih daih’it、 guh gyoebhab ceihleix, aeu gaijgez doengh gij vwndiz vanzging sonjhaih cungqvunz ndangcangq youqgaenj haenx guh cungdenj, haenqrengz bae yawhfuengz ceihleix raemx、 daihheiq、 doemnamh daengj uqlah. Itcig cungj ciuq aen yenzcwz cwzyin doengzcaez hoeng miz cabied、 aen yenzcwz goengbingz、 aen yenzcwz gaengawq gij naengzlig mbiengj bonjfaenh, bae caeuq seiqgyaiq gak guek itheij, gaenxmaenx wngqdoiq gij mbwnheiq bienqvaq daengx aen digiuz.
    (4) Gyagiengz hwnqguh gij cidu swnghdai vwnzmingz. Bietdingh aeu baengh cidu bae baujhoh swnghdai vanzging. Aeu dawz siuhauq swhyenz、 sonjhaih vanzging、 yauqik swnghdai nabhaeuj aen dijhi bingzgya, q ginghci ndawbiengz hwngfat bae, laebbaenz aen dijhi muzbyauh、 aen banhfap gaujhaed、 aen gihci ciengjfad ndaej daejyienh gij iugouz swnghdai vwnzmingz. Laebbaenz hangh cidu haifat  baujhoh diegguek, laeb ndei doengh hangh cidu ceiq yiemzgek bae baujhoh reihnaz、 guenjleix swhyenz raemx、 baujhoh vanzging. Gyalaeg gaijgwz gij gyagwz caeuq suifei doengh cungj canjbinj cigciep ok laeng swhyenz,  laebbaenz hangh cidu miz daiqgyaq sawjyungh swhyenz caeuq hangh cidu boizbouj swnghdai ndaej fanjyingj hawciengz gunggouz dem swhyenz noixmiz cingzdoh、 daejyienh gij gyaciz swnghdai、 guh daengz it daih boizbouj it daih haenx. Gaenxmaenx guh gij sawqdiemj gaicawx gij soqliengh mbaetyungh nwngzyenz、 gij gienz byatcuengq wyangjvadan、 gij gienz byatcuengq uqlah、 gij gienz yungh raemx. Gyagiengz gamguenj vanzging, laeb caezcienz hangh cidu cazdawz gij cwzyin baujhoh swnghdai vanzging caeuq hangh cidu dienzboiz vanzging sonjhaih. Gyagiengz senhconz swnghdai vwnzmingz, son daengxcungq beksingq lai laeb gij yisiz mbaetyungh、 gij yisiz baujhoh vanzging、 gij yisiz swnghdai, cauxbaenz yiengh funghsang ndawbiengz hableix siufeiq, cauh ok gij fungheiq ndei insik caeuq baujhoh swnghdai vanzging.
    Raeuz itdingh aeu engqgya gagrox bae yawjdij swhyienz, engqgya gaenxmaenx bae baujhoh swnghdai, roengzrengz byaij yiengq aen seizdaih moq miz yiengh swnghdai vwnzmingz seveicujyi.
 
    9. Gyavaiq Doicaenh Gozfangz Caeuq Ginhdui Yendaiva
 
    Hwnqguh gij gozfangz gaenjmaenh dem aen ginhdui giengzdaih、 ndaej caeuq aen gozci diegvih guek raeuz doxdaengh、 caeuq gij leih’ik ancienz dem hwngfat guek raeuz dox hab’wngq haenx, dwg aen canloz yinvu hwnqguh yendaiva guek raeuz. Doengh gij vwndiz ancienz lixyouq caeuq ancienz hwngfat、 doengh gij haih daengz cienzdoengj ancienz caeuq mbouj dwg cienzdoengj ancienz cix cingqcaih daengjnaj guek raeuz haenx, fukcab dangqmaz, doxsan doxgeuj, ndigah iugouz gozfangz caeuq ginhdui gij hwnqguh yendaiva de miz mbat daih fathoengh ndeu. Bietdingh aeu itcig cungj aeu guekgya haedsim ancienz aeuyungh bae dazyinx, dungjcouz hwnqguh ginghci caeuq gozfangz, ciuq aen canloz gousiengj “faen sam bouh” bae hwnqguh gozfangz caeuq ginhdui yendaiva, gyagaenj guhbaenz aen lizsij yinvu doengzseiz hwnqguh gihgaiva caeuq sinsizva, caenhrengz ceng’aeu daengz 2020 nienz daihdaej saedyienh gihgaiva, sinsizva hix hwnqguh ndaej hwngfat hungnaek.
    Hwnqguh gozfangz caeuq ginhdui yendaiva, bietdingh aeu yungh gij swhsiengj bingsaeh Mauz Cwzdungh、 gij swhsiengj hwnqguh aen ginhdui seizgeiz moq Dwng Siujbingz、 gij swhsiengj hwnqguh gozfangz caeuq ginhdui Gyangh Cwzminz、 gij swhsiengj youq baihlaj hingzseiq moq hwnqguh gozfangz caeuq ginhdui aen dangj bae ceijyinx. Aeu hab’wngq gij iugouz moq aen canloz hwngfat caeuq aen canloz ancienz guekgya, coengz cienzmienh hengzguh gij lizsij sawjmingh aen ginhdui sigij moq mboengq moq bae ngeixnaemj, gvancez diuz bingsaeh canloz fuengcim youq seizgeiz moq guh remcieng fuengzhen, gaenhwnj seizdaih, gyagiengz guh bingsaeh canloz ceijyinx,  gig yawjnaek aen haij、 daigungh、 vangjloz ancienz, gaenxmaenx baijbouh yinhyungh gij ligliengh bingsaeh mwh hozbingz, mboujduenh haigvangq caeuq gyalaeg gij caepcawq guh bingsaeh doucwngh, gyaak gij naengzlig guhbaenz lai cungj lai yiengh yinvu bingsaeh、 aeu cungj naengzlig youq baihlaj diuzgienh sinsizva bae hoenx hingz gij cancwngh mbangj dieg guh haedsim haenx.
   Itcig cungj dawz doidoengh gohyoz hwngfat gij hong hwnqguh gozfangz caeuq ginhdui dangguh cawjdaez, aeu gyavaiq cienjbienq gij yienghsik sengbaenz rengzlig hoenxciengq guh cawjsienq, cienzmienh gyagiengz hwnqguh gij gwzmingva、 yendaiva、 cwnggveihva aen ginhdui. It di cungj mbouj doenghngauz, itcig cungj youz aen dangj bae cieddoiq lingjdauj ginhdui, itcig cungj mbouj cuengqsoeng dwk aeu aen lijlun dijhi guh yiengh seveicujyi miz Cungguek daegsaek bae gyauqgvai daengx aen ginhdui, lienzdaemh gungganq gij haedsim gyacizgvanh gyoengq bouxbing gwzming dangdaih, daihlig fathoengh gij vwnzva bingsaeh sinhcin, ciengzlwenx baujciz gij singqcaet、 bonjsaek、 cozfungh aen ginhdui beksingq. Giendingh mbouj bienq dwk aeu sinsizva guh fueng’yiengq bae hwnqguh gij yendaiva aen ginhdui, doidoengh gyavaiq hwnqguh sinsizva. Gyagiengz hwnqguh doengh gij vujgi canghbei hamz miz gisuz sang caeuq gisuz moq, gyavaiq cienzmienh hwnqguh gij houginz baujcang yienhdaih, gungganq daihbuek vunzcaiz bingsaeh yienghmoq suciz sang, haeujlaeg haglienh doengh gij bingsaeh baihlaj diuzgienh sinsizva, gyaak gij naengzlig yungh aen dijhi aeu saenqsik hidungj guh giekdaej bae hoenxciengq haenx. Gyarengz bae ciuqfap guenj bing、 coengzyiemz guenj bing, doidoengh hwnqguh cwnggveihva, sawj de fat daengz aen suijbingz engq sang bae.
    Gaen ndaet aen ciuzlouz seiqgyaiq bingsaeh gwzming moq gyavaiq hwngfat haenx, gaenxmaenx onjdangq bae gaijgwz gozfangz caeuq ginhdui, doidoengh yiengh bingsaeh bengwz miz Cungguek daegsaek haenx fat haeujlaeg bae. Itcig cungj aeu cauhmoq caeuq fathoengh gij lijlun bingsaeh bae daz roen, roengzrengz gyaak gij naengzlig gag cauhmoq gozfangz gohgi gunghyez, haeujlaeg doicaenh ginhdui cujciz hingzdai  bienq yendaiva bae, cauhlaeb aen dijhi ligliengh bingsaeh yienhdaih miz Cungguek daegsaek.
    Itcig cungj byaij diuz roen ginhdui caeuq beksingq dox yungzhab hwngfat youh miz Cungguek daegsaek, itcig cungj dawz guekgya fouqmiz dem ginhdui giengzak doengjit hwnjdaeuj, gyagiengz gveihva hwnqguh gij canloz、 dijci gihci、 faplwd fapgvi ndaej coicaenh ginhdui caeuq beksingq yungzhab hwngfat haenx. Gyavaiq hwnqguh gij ligliengh vujcangh gingjcaz yendaiva. Demgiengz gij gozfangz gvanhnen daengxcungq beksingq,daezsang gij caetliengh hwnqguh gozfangz dungyenz caeuq ligliengh bwhlaeng. Gyamaenh caeuq lai hawj ginhdui dem cwngfuj doxgiet、 ginhdui dem beksingq doxgiet.
  Cungguek itcig cungj saedhengz gij cwngcwz gozfangz gag henndang, gyagiengz hwnqguh gozfangz, dwg vihliux henhoh guekgya cawjgienz、 ancienz、 diegguek caezcingj, baujcang guekgya hozbingz hwngfat. Gij ginhdui Cungguek, seizseiz cungj dwg aen ligliengh giendingh bae henhoh seiqgyaiq hozbingz, baezlaeng caemh yaek lumj doenghbaez ityiengh, gyagiengz caeuq gak guek doxgaep guh bingsaeh、 gyalai gij doxsaenq mbiengj bingsaeh, caeuqfaenh guh gij hongsaeh ancienz gak dieg dem  guek caeuq guek, lai gaenxmaenx okrengz hawj gij cwngci caeuq ancienz gwnz seiqgyaiq.
 
    10. Lai Hengzguh “Aen Guekgya Ndeu Song Cungj Cidu” Caeuq Doicaenh Guekcoj Doengjit
 
Yanghgangj caeuq Aumwnz dajswh dauqma guekcoj, couh gaenq byaij hwnj diuz roen gvangqlangh caeuq ndaw guek doxbouj gij ak、 doengzcaez hwngfat haenx, daengx seiqgyaiq cungj caez nyinhnaeuz, gij hengzguh “aen guekgya ndeu song cungj cidu” guh ndaej gig baenz. Gak hangh fuengcim cwngcwz cunghyangh cwngfuj doiq Yanghgangj、 Aumwnz soj saedhengz de,  gaenbonj muzdiz dwg vihliux henhoh gij leih’ik cawjgienz、 ancienz、 hwngfat guekgya, saedbauj Yanghgangj、 Aumwnz ndaej ciengzgeiz mwnhoengh onjdingh. Yaek cienzmienh cinjdingh bae gvancez diuz fuengcim “aen guekgya ndeu song cungj cidu”、 “vunz Yanghgangj gagguenj Yanghgangj”、 “vunz Aumwnz gagguenj Aumwnz”、 gij cingzdoh gagguenj de gig sang, couh bietdingh aeu dawz itcig cungj hengz diuz yenzcwz aen guekgya dog caeuq gingqcungh gij cabied song cungj cidu、 henhoh gij gienzlig cunghyangh caeuq baujcang gij gienz gagguenj cingzdoh gig sang daegbied hingzcwnggih、 fat ok aen cozyung ndaw guek youq baihlaeng giengiengz daemxhwet caeuq hawj gij rengzlig gingcwngh bonjndang Gangj Au gaenjmaed giethab hwnjdaeuj, mboujlwnh seizlawz, cungj mbouj ndaej bien mbiengj vut mbiengj.
Cunghyangh cwngfuj yaek yiemzgek ciuq fapgiek banh saeh,  laeb ndei doengh gij cidu dem gihci caeuq saedhengz fapgiek dox gvanlienz haenx, giendingh haeujcoengh boux hingzcwng cangjgvanh caeuq aen cwngfuj daegbied hingzcwnggih ciuqfap bae saedhengz doengh gij cosih cwngci, daz gyoengq vunzmaenh gak gyaiq Yanghgangj、 Aumwnz, conzgyonj cinglig bae hwngfat ginghci、 cietsaed mizyauq bae gaijndei beksingq swnghhoz、 ciuq bouhloh cugciemh bae doicaenh minzcuj、 bauyungz doxbang bae coicaenh huzndei,  gyalaeg gij gvanhaeh ginghci mouyiz ndaw guek caeuq Yanghgangj、 Aumwnz, doicaenh gak aen lingjyiz lai dox gyaulouz caeuq doxgaep guh, coicaenh gyoengq beixnuengx Yanghgangj、 beixnuengx Aumwnz, daih comzgiet youq baihlaj mbaw geizhauh gyaez guek gyaez Yanghgangj、 gyaez guek gyaez Aumwnz, fuengzre caeuq mbouj hawj doengh gij seiqlig baihrog capfwngz bae gyongz gij hongsaeh Yanghgangj caeuq Aumwnz.
    Raeuz gig siengsaenq, gyoengq beixnuengx Yanghgangj、 beixnuengx Aumwnz mboujdanh miz dungxcaiz、 miz naengzlig、 miz banhfap bae guenjleix ndei、 hwnqguh ndei daegbied hingzcwnggih, hix itdingh ndaej youq ndaw hongsaeh guekgya fat ok gij cozyung mizik, caeuq gyoengq beksingq daengx guek gak minzcuz itheij, doengzcaez yiengjmiz gij cunhyenz caeuq yungzdaeuz guh vunz Cungguek.
    Gaijgez gij vwndiz Daizvanh、 saedyienh guekcoj vanzcienz doengjit, dwg diuz roen lizsij baenzbaenz aeu yienghneix byaij, bouxlawz cungj lanz mbouj ndaej. Hozbingz doengjit ceiq hab gij leih’ik goekgaen Cunghvaz Minzcuz, baudaengz gyoengq beixnuengx Daizvanh. Yaek saedyienh hozbingz doengjit, couh sien aeu saedbauj gij gvanhaeh song hamq hozbingz hwngfat. Bietdingh aeu itcig cungj hengz diuz fuengcim “hozbingz doengjit、 aen guekgya ndeu song cungj cidu”, itcig cungj ciuq bet hangh cawjcieng gvendaengz hwngfat gij gvanhaeh song hamq、 doicaenh gij yamqdin guekcoj hozbingz doengjit haenx, cienzmienh gvancez aen swhsiengj youqgaenj gvendaengz hozbingz hwngfat gij gvanhaeh song hamq, gyamaenh caeuq gyalaeg aen giekdaej cwngci、 ginghci、 vwnzva、 ndawbiengz ndaej sawj gij gvanhaeh song hamq hozbingz hwngfat haenx, cauh gij diuzgen engq cungcuk hawj hozbingz doengjit.
    Raeuz aeu itcig cungj ciuq diuz yenzcwz aen Cungguek dog bae guh saeh. Daluz caeuq Daizvanh yienznaeuz caengz ndaej doengjit, hoeng song hamq doengzcaez gvihaeuj aen Cungguek dog, hangh saehsaed neix cix coengzlaiz mboujcaengz gaijbienq gvaq, gij diegguek caeuq cawjgienz guekgya coengzlaiz mboujcaengz faengat gvaq、 hix mbouj yungzhawj faengat. Song hamq song fueng cungj wnggai yiemzgek ciuqsouj aen laebciengz caezcaemh fanjdoiq “Daizvanh doglaeb”、 nyinhdingh “aen yawjfap doxdoengz 1992 nienz”, gyalai gij roxyiuj caezcaemh henhoh ndaek gvaengxgyaq aen Cungguek dog, youq gwnz aen giekdaej neix bae gouzaeu gij doxdoengz、 louzce gij mbouj doengz. Doiq sojmiz gij cwngdangj Daizvanh, caenhaeu mbouj cawjcieng “Daizvanh doglaeb”、 nyinhdoengz aen Cungguek dog, raeuz cungj nyienh caeuq gyoengqde baedauq、 doiqvah、 doxgaep guh saeh.
    Raeuz aeu lienzdaemh doicaenh song hamq lai dox gyaulouz caeuq doxgaep guh. Gyalaeg ginghci doxgaep guh, gungganq gij leih’ik naekna caezcaemh. Gyadaih vwnzva gyaulouz, gyamaenh minzcuz nyinhdoengz. Hawj gyoengq beksingq engqgya maedcaed baedauq, hawj gij gamjcingz beixnuengx engqgya diemzvan. Coicaenh bingzdaengj dox siengliengz,  gyagiengz hwnqguh cidu. Maqmuengh song mbiengj doengzcaez roengzrengz, youq baihlaj yiengh cingzgvang daegbied guekgya caengz ndaej doengjit, bae damqra caeuq yenzgiu gij gvanhaeh cwngci song hamq, caiq guh ok doengh gij anbaiz habcingz hableix dem; siengliengz laebhwnj aen gihci song hamq bingsaeh ancienz doxsaenq, onjdingh gij gizsi Daizvanh Haijyaz; siengliengz gangj baenz aen hezyi song hamq hozbingz, cauh ok diuz roenmoq ndei gij gvanhaeh song hamq hozbingz hwngfat haenx.
    Raeuz aeu roengzrengz coicaenh gyoengq beixnuengx song hamq doxgiet buekguh. Gyoengq beixnuengx song hamq doengzcaez gvihaeuj Cunghvaz Minzcuz, dwg gyoengq vunz lwedmeg doxlienz、 minghyinh caezcaemh ndeu, ciuq dauhleix wngdang doxsaenq doxmaij, doengzcaez doicaenh gij gvanhaeh song hamq, doengzcaez yiengjmiz gij cingzgoj hwngfat. Famzdwg cungj saeh ndei gyalai gij fukfaenh caezcaemh gyoengq beixnuengx song hamq, raeuz cungj aeu caenhrengz guh baenz bae. Raeuz aeu cietsaed baujhoh gij gienzik gyoengq beixnuengx Daizvanh, comzgiet gyoengq beixnuengx Daizvanh bae henhoh ndei、 hwnqguh ndei aen ranzmbanj caezcaemh Cunghvaz Minzcuz.
    Raeuz giengiet fanjdoiq bang vunz cawjcieng “Daizvanh doglaeb” haenx gij maeuzsuenq faenmbek de. Gyoengq beksingq Cungguek baenzlawz cungj mbouj cinjhawj boux lawz、 cungj seiqlig lawz yungh yiengh fuengsik lawz, dawz Daizvanh daj guekcoj faengat okbae. Bang vunz cawjcieng “Daizvanh doglaeb” haenx gij hengzveiz faenmbek de, sonjhaih gij leih’ik caezcaemh gyoengq beixnuengx song hamq, bietyienz yaek saw dwk lauxbonj mbouj miz bae.
    Daengx gyoengq lwglanz Cunghvaz Minzcuz dox dazfwngz caez roengzrengz, couh itdingh ndaej youq gwnz roen doengzsim saedyienh Cunghvaz Minzcuz daih fukhwng, bae guhbaenz aen daihnieb guekcoj doengjit.
 
    11. Laebdaeb Doicaenh Aen Saehnieb Sangndei Hawj Vunzloih Hozbingz Caeuq Hwngfat
 
    Aen seiqgyaiq seizneix, cingqcaih bienqvaq dwk laegdaeuq fukcab dangqmaz, hozbingz caeuq hwngfat ciuqyiengh lij dwg aen cawjdaez seizdaih. Seiqgyaiq cingq haeujlaeg fat baenz lai aen cungqsim, ginghci cingq haeujlaeg fat doh daengx digiuz, vwnzva cingq lienzdaemh doicaenh lai cungj lai yiengh, ndawbiengz cingq lienzdaemh doicaenh gij gisuz saenqsik, gohgi gwzming cingq caepcawq mwh couh miz ok doengh gij fatyienh moq caeuq fatmingz moq hungnaek, daengx seiqgyaiq doxgap guh cingq fat haeuj lai caengz dem sojmiz fueng’vih bae, gij guekgya hawciengz lakhwng dem gij guekgya cingqcaih hwngfat haenx, gij saedlig cingjdaej de cingq bienq ndaej lai giengzak, guek caeuq guek gij ligliengh doiqbeij de, cingq fat gvaq mbiengj ndei henhoh seiqgyaiq hozbingz bae, baujciz seiqgyaiq hingzseiq cungjdaej onjdingh, bwhmiz gij diuzgen mizleih de engq lai.
    Doengzseiz, seiqgyaiq ciuqyiengh lij gig mbouj anningz. Gozci ginhyungz veizgih yingjyangj gig gyae gig laeg, seiqgyaiq ginghci yaek laihwnj, gij yinhsu mbouj onjdingh mbouj doekdingh de bienq lai, daengx seiqgyaiq hwngfat mbouj bingzyaenx, seiqdaeuz bienq ndaej engqgya youqgaenj, bagenzcujyi、 giengzgienz cwngci caeuq gij ganhsezcujyi moq miz di gyalai, mbangj giz deihfueng deihdeih ok luenh, haeuxgwn ancienz、 nwngzyenz swhyenz ancienz、 vangjloz ancienz  doengh gij vwndiz seiqgyaiq gak guek cungj roeb daengz neix engqgya youqgaenj.
    Vunzloih ngamq miz aen digiuz dog, gak guek caemhyouq aen seiqgyaiq ndeu. Lizsij gaenq mingzbeg naeuz raeuz nyi, duzak gwn duznyieg, mbouj dwg gij fuengfap vunzloih caemhyouq, nyaemh’eiq bae hoenx vunz, seiqgyaiq couh fouzfap gyaeundei. Ngah hozbingz mbouj ngah hoenxciengq, ngah fathoengh mbouj ngah gungzhoj, ngah doxgaep guh mbouj ngah dox doiqdingj, doidoengh hwnqguh aen seiqgyaiq huzndei、 ciengzlwenx hozbingz、 doengzcaez mwnhoengh ndeu, dwg aen nyienhmuengh caezcaemh gyoengq beksingq gak guek.
    Raeuz cawjcieng, youq ndaw gij gvanhaeh guek caeuq guek, lai fatyiengz gij cingsaenz bingzdaengj doxsaenq、 bauyungz doxhag、 doxgaep guh caez ndaej hingz, doengzcaez henhoh gij goengbingz leixcingq gwnz seiqgyaiq. Bingzdaengj doxsaenq, couh dwg aeu ciuqcoengz gij cunghcij caeuq yenzcwz aen yencangh Lenzhozgoz, itcig cungj saedhengz guekgya mbouj faen hung’iq、 giengznyieg、 gungzfouq itlwd bingzdaengj, doidoengh gij gvanhaeh guek caeuq guek bienq minzcuj bae, gingqcungh cawjgienz, caezcaemh yiengjmiz ancienz, henhoh seiqgyaiq hozbingz onjdingh. Bauyungz doxhag, couh dwg aeu gingqcungh seiqgyaiq vwnzmingz lai cungj lai yiengh、 gij roenloh hwngfat lai cungj lai yiengh, gingqcungh caeuq henhoh gij gienzleih gyoengq beksingq gak guek gag bae genjaeu cidu ndawbiengz dem roenloh hwngfat, dox beijciuq dox hagsib, aeu gij ndei bouj gij yaez, doidoengh vunzloih vwnzmingz cinbu. Doxgaep guh caez ndaej hingz, couh dwg aeu cangdauj cungj yisiz vunzloih dwg gyoengq vunz minghyinh caezcaemh ndeu, youq mwh gouzaeu gij leih’ik bonj guek, hix giemgoq doengh gij saehcingz guek wnq soj hableix  gvansim haenx, youq mwh maeuzaeu bonj guek hwngfat, bae coicaenh gak guek doengzcaez hwngfat, laebbaenz yiengh gvanhaeh moq daengx seiqgyaiq guhdoih hwngfat、 engqgya bingzdaengj bingzyaenx haenx, caemh ruz gvaq dah, caez rap gienzleih caeuq cwzyin, gyalai gij leih’ik caezcaemh vunzloih.
    Cungguek yaek laebdaeb yaengxsang mbaw geiz hozbingz、 hwngfat、 doxgaep guh、 caez ndaej hingz, giendingh mbouj bienq dwk roengzrengz bae henhoh seiqgyaiq hozbingz、 coicaenh doengzcaez hwngfat.
    Cungguek yaek itcig mbouj bienq dwk byaij diuz roen hozbingz hwngfat, giendingh bae hengz yiengh cwngcwz hozbingz vaigyauh doglaeb gag guhcawj haenx. Raeuz giengiet henhoh gij leih’ik cawjgienz、 ancienz、 hwngfat guekgya, baenzlawz cungj mbouj roengzhoq hawj sojmiz doengh gij atlig daj baihrog daeuj. Raeuz gaengawq gij deng loeng goz soh bonjndang saehcingz, bae gietdingh gij laebciengz caeuq cwngcwz bonjfaenh, gaemguenj goengdauh, mbetmbe cwngyi. Cungguek cawjcieng hozbingz gaijgez doengh gij doxceng guek caeuq guek, caeuqlienz doengh gij vwndiz cungqvunz gvansim lai haenx, fanjdoiq doengh mbouj doengh couh aeu fouxlig bae hoenx vunz roxnaeuz aeu fouxlig bae haephangz vunz, fanjdoiq byoekfan gij cwnggenz habfap guekwnq, fanjdoiq doengh gij gungjbucujyi sojmiz hingzsik. Cungguek fanjdoiq doengh gij bagenzcujyi caeuq giengzgienz cwngci gak cungj hingzsik, mbouj capfwngz guenj gij neicwng guek wnq, ciengzlwenx mbouj guhvuengz, ciengzlwenx mbouj bae ciemq dieg guek wnq. Cungguek yaek itcig cungj dawz gij leih’ik gyoengq beksingq Cungguek caeuq gij leih’ik caezcaemh gyoengq beksingq gak guek giethab hwnjdaeuj, aeu aen yienghndang engqgya gaenxmaenx bae caeuqfaenh guh gij hongsaeh gwnz seiqgyaiq, dawz ok gij cozyung aen daihguek gangjvah suenqsoq ndeu, doengzcaez bae wngqdoiq gij fungyiemj caeuq nanzdaez daengx seiqgyaiq.
    Cungguek yaek itcig mbouj bienq dwk saedhengz aen canloz hailangh、 doxik、 caezhingz, doenggvaq gyalaeg doxgaep guh, bae coicaenh gij ginghci gwnz seiqgyaiq rengzrwd、 ndaej lienzdaemh、 bingzyaenx dwk laihwnj. Cungguek roengzrengz bae suksiuj gij cengca namz baek, haeujcoengh doengh aen guekgya cingqcaih hwngfat haenx gyaak gij naengzlig gag hwngfat bonjfaenh. Cungguek yaek gyagiengz caeuq doengh aen ginghcidij youqgaenj de hezdiuz gij cwngcwz hungzgvanh ginghci, doenggvaq doxyaeng bae gaijgez ndei ginghci mouyiz doxdawz. Cungguek itcig cungj giengzdiuh gienzleih caeuq yivu doxdaengh, gaenxmaenx bae caeuqfaenh ceihleix gij ginghci daengx seiqgyaiq, doidoengh mouyiz caeuq douzswh bienq swyouz bienhleih bae, fanjdoiq gak cungj hingzsik baujhucujyi.
    Cungguek itcig cungj youq gwnz  giekdaej haj hangh yenzcwz hozbingz caemhyouq, cienzmienh bae caeuq gak guek hwngfat gij gvanhaeh doxndei dem doxgaep guh. Raeuz yaek gaijndei caeuq hwngfat gij gvanhaeh dem doengh aen guekgya fatdad haenx, haigvangq lingjyiz doxgaep guh, dojdangq cawqleix doengh gij yigen mbouj doengz, doidoengh laebbaenz yiengh gvanhaeh moq ciengzgeiz onjdingh、 cangqheiq fathoengh ndawgyang daihguek. Raeuz yaek itcig cungj simsienh bae doiqdaih gueknden、 caeuq gueknden guhdoih, lai caeuq gueknden doxndei huzciz, gyalaeg doengh cungj doxgaep guh doengzcaez ndaej leih, roengzrengz sawj gij hwngfat bonjfaenh, ik daengz doengh aen guekgya seiqhenz. Raeuz yaek gyagiengz caeuq guengjdaih guekgya cingqcaih hwngfat haenx doxgiet caeuq doxgaep guh, doengzcaez henhoh gij gienzik cingqdangq doengh aen guekgya cingqcaih hwngfat haenx, haeujcoengh doengh aen guekgya cingqcaih hwngfat haenx youq ndaw gij hongsaeh seiqgyaiq lai miz faenh daibyauj caeuq lai miz gienz gangjvah, ciengzlwenx guh boux baengzyoux saenq ndaej gvaq、 boux doengzdoih lauxsaed doengh aen guekgya cingqcaih hwngfat haenx. Raeuz yaek remcieng bae caeuqfaenh guh doengh gij hongsaeh lai mbiengj, haeujcoengh Lenzhozgoz、 Aen Cizdonz Ngeihcib Guek、 Sanghaij Hozcoz Cujciz、 doengh aen guekgya gimcien daengj dawz ok gij cozyung cizgiz de, doidoengh gij cizsi caeuq dijhi gwnz seiqgyaiq fat gvaq mbiengj goengcingq hableix bae. Raeuz yaek netsaed doicaenh goenggungh vaigyauh caeuq yinzvwnz gyaulouz, henhoh gij gienzik habfap youq rog guek raeuz. Raeuz yaek caeuq doengh gij cwngdangj dem cwngci cujciz gak guek lai doxndei baedauq, hawj yinzda、 cwnghez、 deihfueng、 donzdij ndawbiengz lai guh doiq rog gyaulouz, cuknet aen giekdaej ndawbiengz hawj guekgya gvanhaeh ndaej hwngfat haenx.
    Gyoengq beksingq Cungguek gig maij hozbingz、 gig muengh hwngfat, nyienh caeuq gyoengq beksingq gak guek itheij, vih aen saehnieb sangndei hawj vunzloih hozbingz caeuq hwngfat haenx bae mboujduenh roengzrengz.
 
    12. Cienzmienh Daezsang Gij Suijbingz Gohyozva Hwnqguh Aen Dangj
 
    Aen dangj raeuz cingq dawz diuz rapnaek comzgiet caeuq daz beksingq bae cienzmienh hwnqbaenz aen biengz siujgangh、 doicaenh gij yendaiva seveicujyi、 saedyienh Cunghvaz Minzcuz daih fukhwng. Aen dangj giengiengz daeklig, aen dangj caeuq beksingq baujciz lienzhaeh gaenjmaed, guekgya couh mwnhoengh onjdingh, beksingq couh vuenyungz an’onj. Hingzseiq fathoengh、 saehnieb gyadaih、 beksingq deqmuengh, cungj iugouz raeuz aeu gij cingsaenz gaijgwz cauhmoq, bae cienzmienh doicaenh hangh gunghcwngz hungmbwk moq hwnqguh aen dangj, cienzmienh daezsang gij suijbingz gohyozva hwnqguh aen dangj.
    Daengx dangj bietdingh aeu geiqmaenh, cijmiz roengzrag youq luengq beksingq、 cauhfuk hawj beksingq, aen dangj cij ndaej itcig mbouj doekbaih; cijmiz youq mwh an’onj lai ngeix daengz yungyiemj、 gamj bae dajcauh niebcik moq, aen dangj cij ndaej itcig byaij youq dangqnaj aen seizdaih. Youq hingzseiq moq, doengh gij gaujniemh gaemgienz、 gij gaujniemh gaijgwz hailangh、 gij gaujniemh hawciengz ginghci、 gij gaujniemh raebrog vanzging daengjnaj aen dangj raeuz, cungj dwg ciengzgeiz、 fukcab、 yiemzhaenq dangqmaz, doengh gij yungyiemj cingsaenz soengse lanxsanj、 gij yungyiemj naengzlig mbouj gaeuq、 gij yungyiemj duetliz cungqvunz、 gij yungyiemj siuhgiz nduknaeuh, cungj engqgya coegda dwk baij youq baihnaj daengx dangj. Baenzlawz mboujduenh sawj gij suijbingz lingjdauj caeuq suijbingz gaemgienz aen dangj bienq lai sang bae、 sawj gij naengzlig dingj nduknaeuh fuengz bienqcaet caeuq gij naengzlig dingjdangj fungyiemj bienq lai ak bae, dwg aen dangj youq mwh gyamaenh gij diegvih gaemgienz、 saedyienh gij sawjmingh gaemgienz haenx diuz goqdaez hungnaek youh bietdingh aeu gaijgez ndei de. Daengx dangj aeu lai roxnyinh gaenjbik caeuq cwzyin naek, gaemndaet diuz cawjsienq gyagiengz hwnqguh gij naengzlig gaemgienz、 hwnqguh gij singqcaet senhcin caeuq singqcaet seuqcengh aen dangj, itcig cungj gaijfang swhsiengj、 gaijgwz cauhmoq, itcig cungj giengzdiuh dangj aeu guenj dangj、 coengzyiemz guenj dangj, cienzmienh gyagiengz hwnqguh gij swhsiengj、 cujciz、 cozfungh、 cidu、 fanjdoiq nduknaeuh dizcang seuqcengh aen dangj, sawj gij naengzlig gag bienq seuq、 gag laeb ndei、 gag daezsang、 gag cawz gaeuq rieg moq bonjfaenh haenx bienq lai ak bae, hwnqguh yiengh cwngdangj rox gaemgienz、 gaenx hagsib、 ak fugsaeh、 ak cauhmoq Majgwzswhcujyi, saedbauj aen dangj itcig cungj baenz aen haedsim giengiengz lingjdauj gij saehnieb seveicujyi miz Cungguek daegsaek.
    (1) Giendingh lijsiengj saenqniemh, giensouj gij cingsaenz gyaepgouz gyoengq vunz gungcanjdangj. Saenqyiengj Majgwzswhcujyi, siengsaenq seveicujyi caeuq gungcanjcujyi dwg ndei youh itdingh guh ndaej hingz, couh dangq aen lingzhoenz cwngci gyoengq vunz gungcanjdangj, couh dangq ndaek donghcawx cingsaenz sawj gyoengq vunz gungcanjdangj souh ndaej sojmiz gaujniemh haenx. Aeu dawz ndei aen goekgaen hwnqguh swhsiengj lijlun, bae hag Majgwzswh-Lezningzcujyi、 Mauz Cwzdungh Swhsiengj、 aen lijlun dijhi guh yiengh seveicujyi miz Cungguek daegsaek, haeujlaeg bae hagsib caeuq saedhengz gohyoz fazcanjgvanh, doicaenh cauhlaeb gij dangj cujciz gaenx hagsib, son daz gyoengq dangjyenz、 ganbu netsim laebceiq, vih aen lijsiengj caezcaemh guh yiengh seveicujyi miz Cungguek daegsaek bae buekguh. Dawz ndei aen haedsim son dangjyenz laebmaenh dangjsing, hag gij lizsij aen dangj, laegdaeuq roxyiuj doengh gij gingniemh gyauyin youq ndaw song aen gezyi gvendaengz lizsij vwndiz aen dangj soj gvigyonj okdaeuj haenx, daihlig fatyiengz gij cienzdoengj caeuq cozfungh ndei aen dangj, son daz gyoengq dangjyenz、 ganbu laebmaenh gij sigaigvanh、 genzlizgvanh、 swyezgvanh cingqdeng, giendingh aen laebciengz cwngci, faen cingcuj doengh gij daih deng daih loeng mbiengj yenzcwz. Dawz ndei aen giekdaej hwnqguh daudwz, son daz gyoengq dangjyenz、 ganbu, daiqdaeuz bae saedhengz yiengh yungzyuzgvanh seveicujyi, gangj dangjsing、 siujsim doengh gij hengzveiz mizgven daudwz、 guh yienghndei hawj vunz gaen hag, guh boux buengjyiengh hengz gij daudwz seveicujyi、 boux dazyinx gij cozfungh dem sibgvenq lauxsaed saenqyungh、 boux henhoh goengbingz leixcingq, aeu saedsaeh hengzdoengh  bae mingzbeg baij ok gij ligliengh yinzgwz gyoengq vunz gungcanjdangj.
    (2) Itcig cungj dawz boux vunz dangguh gaenbonj、 vih beksingq gaemgienz, seizseiz cungj baujciz aen dangj caeuq beksingq cungqvunz gaenjmaed lienzhaeh. Gij muzdiz caeuq eiqdoz goekgaen aen dangj, dwg fugsaeh beksingq, dawz boux vunz dangguh gaenbonj、 vih beksingq gaemgienz, dwg aen biucinj ceiq sang bae gienjniemh sojmiz gij vueddoengh gaemgienz aen dangj. Mboujlwnh seizlawz, cungj aeu dawz gij leih’ik beksingq baij youq vih daih’it, seizseiz cungj caeuq beksingq sim lienz sim、 caez diemheiq、 doengz minghyinh, seizseiz cungj baengh beksingq nyoengx lizsij baenaj. Hopheux baujciz gij singqcaet senhcin caeuq gij seuqcengh aen dangj, youq daengx dangj haeujlaeg bae guh aen vueddoengh sonhag caeuq saedhengz diuz lohsienq cungqvunz aen dangj、 aeu seuqcengh guhsaed vih beksingq guh neiyungz youqgaenj haenx, roengzrengz gaijgez doengh gij vwndiz youqgaenj、 beksingq cungqvunz fanjyingj haenqrem de, gyaak gij naengzlig youq hingzseiq moq bae guh ndei gij hong cungqvunz. Laeb ndei hangh cidu dangjyenz ganbu cigciep lienzhaeh cungqvunz. Itcig cungj cam beksingq cwngci guh ndaej baenzlawz yiengh、 cam beksingq siengj aeu gijmaz、 cam beksingq aeu geiqmaeuz caeuq banhfap, daj ndaw gij saedguh hungmbwk gyoengq beksingq ndoet aeu dungxcaiz caeuq ligliengh. Itcig cungj saedcaih bae guh hawj beksingq fouqmiz、 saedcaih bae guh hawj guekgya hwngfat, gamj hai loh baenaj, gamj rapdawz cwzyin, lai guh saeh ndei saeh saedcaih hawj beksingq hab’eiq. Itcig cungj mbouj lau ganhoj、 haenqrengz buekguh、 gaenxgiemh mbaetyungh, roengz gietsim gaijcaenh gij cozfungh faenzcieng caeuq gij cozfungh haihoih, roengzrengz cingjceih doengh gij fungheiq mbouj ndei soemzcaiz、 lanxsanj、 baizciengz、 saisaengq, giengiet haekfug hingzsizcujyi、 gvanhliuzcujyi, aeu gij cozfungh ndei aen dangj bae comzgiet gij swhsiengj gamjcingz dangjyenz caeuq beksingq、 daiqdoengh gij cozfungh cwngci caeuq gij cozfungh beksingq. Haeujcoengh gunghvei、 gungcinghdonz、 fulenz daengj beksingq donzdij lailai fat ok gij yunghcawq lienzhaeh cungqvunz, engq ndei bae fanjyingj gij yigen caeuq iugouz cungqvunz, henhoh gij gienzik habfap cungqvunz.
    (3) Cizgiz hwngfat gij minzcuj ndaw dangj, gyagiengz gij rengzhoengh dajcauh aen dangj. Gij minzcuj ndaw dangj couh dangq diuz sengmingh aen dangj. Aeu itcig cungj saedhengz hangh cidu minzcuj cizcungh, laeb caezcienz aen cidu dijhi gvendaengz gij minzcuj ndaw dangj, aeu gij minzcuj ndaw dangj bae daiqdoengh gij minzcuj ndaw beksingq. baujcang dangjyenz cawqyouq aen diegvih cawjdaej, laeb caezcienz hangh cidu bae baujcang aen gienzleih minzcuj dangjyenz, bae guh bihbingz caeuq gag bihbingz, cauh ok yiengh dungzci gvanhaeh youq ndaw dangj minzcuj bingzdaengj、 yiengh heiqfaenh cwngci ndaej guh minzcuj yaenglwnh、 yiengh vanzging miz cidu bae guh minzcuj gamduk, lozsiz gij gienz rox cingzgvang、 gij gienz caeuqfaenh guh、 gij gienz senjgij、 gij gienz gamduk hawj gyoengq dangjyenz. Laeb ndei hangh cidu hai daibyauj daihhoih aen dangj, hawj gij daibyauj gunghyinz、 nungzminz beijlaeh bienq lai sang bae, lozsiz caeuq laeb ndei hangh cidu daibyauj  nyaemhgeiz ndaw daibyauj daihhoih aen dangj, sawqhengz hangh cidu yanghcin dangjdaivei hai nienzhoih, gyalaeg sawqdiemj hangh cidu hawj yienh (si、 gih) dangjdaivei ciengznyaemh, saedhengz hangh cidu hawj gyoengq daibyauj  dangjdaivei ok daezanq. Laeb ndei hangh cidu senjgij ndaw dangj, gveihfan ca’ngeg daezmingz、 ca’ngeg senjgij, cauxbaenz gij cwngzsi caeuq vanzging ndaej cukgaeuq daejyienh gij eiqceiq bouxsienjgij. Hawj aen cenzveijvei gij cozyung gezcwz caeuq gamduk de bienq lai giengz bae, laeb ndei cangzveijvei gij gveihcwz lwnhsaeh caeuq gij cwngzsi guh gezcwz de, laeb ndei hangh cidu hawj deihfueng dangjveij doenggvaq douzbiuq, bae yaenglwnh gietdingh doengh gij vwndiz hungnaek caeuq nyaemhyungh doengh boux ganbu youqgaenj. Gyadaih gij gihcwngz minzcuj ndaw dangj, laeb ndei doengh hangh cidu hawj dangjyenz bae dinghgeiz bingzlwnh aen lingjdauj banhswj gihcwngz dangj cujciz, doihengz doengh aen guhfap hawj dangjyenz bae bangxdingq gij hoih gihcwngz dangjveij、 hawj boux daibyauj  dangjdaivei bae lezsiz gij hoih mizgven aen dangjveij doengz gaep, sawj gij swnghhoz ndaw dangj bienq lai miz yenzcwz caeuq lai ronghcingx bae.
    (4) Gyalaeg gaijgwz gij cidu vunzsaeh ganbu, hwnqguh aen duivuj dingxdaeuz gaemgienz youh suciz sang ndeu. Yaek itcig bae guh caeuq hwngfat yiengh seveicujyi miz Cungguek daegsaek, bouh ceiq youqgaenj de dwg aeu hwnqguh aen duivuj dingxdaeuz gaemgienz、 cwngci giendingh、 naengzlig caen ak、 cozfungh maenhndei、 cingsaenz caengqhwnj、 guh ndaej daihsaeh ndeu. Aeu itcig cungj ciuq aen yenzcwz youz dangj bae guenj ganbu, itcig cungj saedhengz yungh vunz gangj seiq fueng bet baih、 bouxak cij yungh, itcig cungj aeu boux binjdwz bonjsaeh caez ndei、 sien yawj binjdwz, itcig cungj yawjnaek gij niebcik saedcaih、 cungqvunz caez naeuz ak, gyalaeg gaijgwz gij cidu vunzsaeh ganbu, sawj doengh boux ganbu gak fuengmienh cungj maenhndei haenx lailai bonghmaj hwnjdaeuj、 hawj gij bonjsaeh de ndaej caenhliengh fazveih、 hawj gij dungxcaiz de caenhliengh yungh ndaej deng dieg. Cienzmienh cinjdingh bae gvancez diuz fuengcim minzcuj、 goenghai、 gingcwngh、 genjaeu bouxndei, gyadaih gij minzcuj monz hong ganbu, daezsang gij caetliengh minzcuj, laeb ndei gij fuengsik doenggvaq gingcwngh bae genjaeu ganbu, sawj genj vunz yungh vunz guh daengz cungqvunz engq saenq ndaej gvaq, mbouj hawj doengh boux lauxsaed de deng catsaij, mbouj hawj doengh boux ganvad akndonj de ndaej bienzngeiz. Laeb ndei aen gihci gaujhaed bingzgyaq ganbu, coicaenh lingjdauj ganbu cingqdeng bae doiqdaih gij niebcik cwngci. Laeb caezcienz aen dijci guenjleix ganbu, coengzyiemz guenjleix gamduk ganbu, gyagiengz gungganq genjleh daezswng doengh bouxdaeuz naenghcingq aen dangj caeuq cwngfuj、 doengh boux ganbu aen ganghvei youqgaenj, laeb ndei hangh cidu gunghvuyenz. Dawz gaepboiq lingjdauj banhswj caeuq aen gezgou ganbu duivuj guh ndaej engq ndei bae, yawjnaek daj gihcwngz daih’it sienq gungganq genjleh daezswng ganbu, lai hai gij roenloh ciu doengh boux vunzcaiz maenhndei ndawbiengz haeuj aen duivuj dangjcwng ganbu. Doicaenh gaijgwz gij cidu vunzsaeh ndaw giyez caeuq saehnieb danhvei guekmiz. Gyagiengz caeuq gaijcaenh ganbu songyauq beizyin, daezsang gij suciz caeuq naengzlig gyoengq ganbu. Lai roengzrengz bae gungganq genjleh daezswng gij ganbu nienzoiq maenhndei, yawjnaek gungganq genjleh daezswng gij ganbu vunzmbwk caeuq gij ganbu siujsoq minzcuz, gujli gyoengq ganbu nienzoiq bae gihcwngz caeuq doengh dieg ganhoj haenx muzlienh hungmaj. Cienzmienh guh ndei gij hong gyoengq ganbu lizyouh duiyouh.
   (5) Itcig cungj ciuq diuz yenzcwz youz aen dangj bae guenj vunzcaiz, dawz gij vunzcaiz maenhndei gak fuengmienh conzgyonj haeuj ndaw saehnieb aen dangj caeuq guekgya bae. Lai hai roenloh yinxhaeuj vunzcaiz, gvangqlangh ropaeu gij vunz maenh’ak lajmbwn, dwg hangh cosih daj goekgaen bae baujcwngq hwngfat gij saehnieb aen dangj caeuq beksingq. Aeu gingqcungh lauzdung、 gingqcungh cihsiz、 gingqcungh vunzcaiz、 gingqcungh dajcauh, gyavaiq laebdingh aen canloz baijbouh sien hwngfat vunzcaiz, cauh ok aen duivuj vunzcaiz gveihmoz hungloet、 suciz maenhndei ndeu, doidoengh guek raeuz daj aen guek hung vunzcaiz yamq haeuj aen guekak vunzcaiz. Dungjcouz doicaenh hwnqguh gij duivuj gak loih vunzcaiz, saedhengz aen gunghcwngz vunzcaiz hungnaek, lai roengzrengz bae haeujcoengh gungganq gij vunzcaiz ak cauhnieb caeuq cauhmoq, yawjnaek gungganq gij vunzcaiz saedyungh, dazyinx vunzcaiz haeuj gohyenz swnghcanj daih’it sienq bae. Cungfaen haifat leihyungh gij swhyenz vunzcaiz ndaw guek rog guek, gaenxmaenx yinxhaeuj caeuq yungh ndei gij vunzcaiz rog guek. Gyavaiq gaijgwz gij dijci gihci hwngfat vunzcaiz caeuq cauhmoq gij cwngcwz de, laeb hangh cidu youz guekgya fat hawj mingzdaeuz miznaj, cauxbaenz yiengh cidu vunzcaiz youhsi ak gvaq vunz、 ndaej hawj vunzcaiz fat ok gij vuedlig dajcauh、 miz rengzlig bae guh gozci gingcwngh haenx, cauh ok aen gugmienh bouxboux cungj ndaej baenz vunzcaiz、 bouxboux cungj ndaej caenhliengh dawz ok gij bonjsaeh de.
    (6) Cauhmoq gij hong hwnqguh gihcwngz cujciz aen dangj, cuknet gij giekdaej cujciz ndei hawj aen dangj gaemgienz. Gij gihcwngz cujciz aen dangj, dwg doengh aen cujciz comzgiet caeuq daz cungqvunz bae gvancez gij lijlun dem lohsienq fuengcim cwngcwz aen dangj、 lozsiz gij yinvu aen dangj.  Aeu lozsiz gij cwzyin cidu hangh hong hwnqguh aen dangj, gyagiengz hwnqguh gij dangj cujciz ndaw segih lajmbanj dem hawsingz, lai roengzrengz bae doengh aen ginghci cujciz、 ndawbiengz cujciz mbouj dwg gunghyoujci haenx guh gij hong hwnqguh aen dangj, cienzmienh doicaenh gij hong hwnqguh gihcwngz dangj cujciz ndaw gak aen lingjyiz, sawj dangj cujciz caeuq gij hong aen dangj guenj ndaej engq gvangq bae, lailai fat ok aen cozyung doidoengh hwngfat、 fugsaeh cungqvunz、 comzgiet simvunz、 coicaenh huzndei, aeu hwnqguh gij gihcwngz cujciz aen dangj, bae daiqdoengh hwnqguh gak cungj gihcwngz cujciz gizyawz. Laeb caezcienz aen dijhi gihcwngz cujciz aen dangj, gyagiengz hwnqguh aen duivuj bouxdaiqdaeuz gihcwngz cujciz aen dangj, gyagiengz cingjhab gij swhyenz hwnqguh gihcwngz dangj cujciz hawsingz lajmbanj, laebbaenz hangh cidu onjdingh baujcang ginghfei. Dawz fugsaeh cungqvunz、 guh gij hong cungqvunz dangguh yinvu youqgaenj, gyagiengz hwnqguh yiengh dangj cujciz ak fugsaeh gihcwngz haenx. Dawz gyagiengz dangjsing、 daezsang suciz dangguh cungdenj, gyagiengz caeuq gaijcaenh gij fuengsik fuengfap son’gyauq dem guenjleix aen duivuj dangjyenz, laeb caezcienz aen gihci ndaej ciengzgeiz hawj dangjyenz youq gwnz gangjvei dajcauh senhcin ceng’aeu maenhndei, doidoengh guengjdaih dangjyenz fat ok aen cozyung guh buengjyiengh roemx bae gonq. Yiemzgek gij cujciz swnghhoz ndaw dangj, laeb caezcienz doengh hangh cidu dinghgeiz faensik、 minzcuj bingzlwnh gij dangjsing gak boux dangjyenz. Gaijcaenh gij fuengsik fuengfap son’gyauq、 guenjleix、 fugsaeh doengh boux dangjyenz riuzdoengh. Daezsang gij caetliengh gaepsou dangjyenz, yawjnaek daj ndaw gyoengq gunghyinz、 bouxguhnaz、 cihsiz fwnswj bouxcoz gaepsou dangjyenz. Laeb caezcienz aen gihci hawj dangjyenz ndaej haeuj ndaej ok, sawj aen duivuj dangjyenz gezgou bienq lai ndei bae.
    (7) Giendingh mbouj bienq bae fanjdoiq nduknaeuh, ciengzlwenx baujciz gij bonjsaek cwngci ndang cingq fwngz seuq gyoengq vunz gungcanjdangj. Fanjdoiq nduknaeuh、 hwnqguh yiengh cwngci seuqcengh, dwg aen laebciengz cwngci sienmingz、 aen dangj raeuz itcig cungj mbouj gaijbienq de, dwg aen vwndiz cwngci hungnaek、 gyoengq beksingq caez gvansim caeuq yawjnaek haenx. Aen vwnzdiz neix gaijgez mbouj ndei, couh deng haih mingh aen dangj, caiqlij yaek sawj aen dangj caeuq guekgya deng mied bae. Fanjdoiq nduknaeuh dizcang seuqcengh, bietdingh aeu ciengzseiz guh mbouj cuengqsoeng, dingj nduk fuengz bienq, bietdingh aeu ciengzseiz daezsingj. Aeu itcig cungj byaij diuz roen fanjdoiq nduknaeuh dizcang seuqcengh miz Cungguek daegsaek, itcig cungj ciuq diuz fuengcim goekbyai caez ceih、 gyoebhab ceihleix、  fuengz fad caez guh、 yawjnaek yawhfuengz, bae cienzmienh doicaenh hwnqguh aen dijhi fadceih caeuq yawhfuengz nduknaeuh, guh daengz ganbu seuq cingq、cwngfuj cingliemz、cwngci cingmingz. Gyagiengz son vunz fanjdoiq nduknaeuh dizcang seuqcengh caeuq hwnqguh yiengh vwnzva seuqcengh guh cwngci. Gak gaep lingjdauj ganbu daegbied dwg doengh boux ganbu gaepsang, bietdingh aeu gagrox ciuqhengz gij cunjcwz seuqcengh guh cwngci, yiemzgek caephengz hangh cidu hawj lingjdauj ganbu baugau doengh gij saehhangh hungnaek, gawq yiemz  haed bonjfaenh, youh gyagiengz son’gyauq、 haedhaed gyoengq caensug bonjfaenh caeuq doengh boux guenjsaeh henz ndang, baenzlawz cungj mbouj cinjhawj gauj daeggienz. Yiemzgek gveihfan gienzlig hengzsawj, gyagiengz gamduk lingjdauj ganbu daegbied dwg doengh boux lingjdauj ganbu youqgaenj haenx hengzsawj gienzlig. Gyalaeg gaijgwz doengh aen lingjyiz cungdenj dem doengh bouh youqgaenj haenx, laeb caezcienz gij faplwd cidu fanjdoiq nduknaeuh, yawhfuengz gaemhanh gij fungyiemj seuqcengh guh cwngci, fuengzre leih’ik doxdawz, engqgya gohyoz mizyauq bae fuengzceih nduknaeuh. Gyagiengz caeuq seiqgyaiq gak guek doxgaep fanjdoiq nduknaeuh. Yiemzgek caephengz hangh cwzyin cidu hwnqguh gij cozfungh aen dangj dem seuqcengh guh cwngci. Laeb caezcienz aen dijci guh gijliz genjcaz caeuq gamcaz, doengjit guenjleix ndei doengh gij gihgou baij cap youq rog, engq ndei fat ok hangh cidu guh cunzyawj haenx aen cozyung gamduk de. Seizseiz cungj baujciz gij singseiq gig rem fadceih nduknaeuh, giengiet cazbanh anq hung dem anq youqgaenj, roengzrengz gaijgez doengh gij vwndiz nduknaeuh fatseng youq henz ndang cungqvunz haenx. Mboujguenj nangqdaengz boux lawz, mboujlwnh gienzlig hung’iq、 cizvei sangdaemq, caenh’aeu famh  gijliz aen dangj caeuq faplwd guekgya, couh aeu coengzyiemz cawqfad,  di cungj mbouj nyiuzcingz.
    (8) Yiemzsuk goengcingq bae saedhengz gij gijliz aen dangj, gagrox henhoh gij cizcungh doengjit aen dangj. Guh daengz cizcungh doengjit, aen dangj cij miz ligliengh, cij ndaej daj goekgaen bae baujcwngq ginghci ndawbiengz hwngfat、 minzcuz doxgiet cinbu、 guekgya ciengzgeiz onjdingh. Gij hingzseiq daengjnaj aen dangj yied fukcab, gij yinvu gwnz mbaq yied hungnaek gannanz, couh yied aeu gyagiengz hwnqguh gij gijliz aen dangj, yied aeu henhoh gij cizcungh doengjit aen dangj. Gak gaep dangj cujciz caeuq guengjdaih dangjyenz、 ganbu daegbied dwg doengh boux lingjdauj ganbu youqgaenj, itdingh aeu gagrox ciuqsouj dangjcangh, gagrox ciuq gij cujciz yenzcwz aen dangj caeuq gij cunjcwz cwngci swnghhoz ndaw dangj bae banhsaeh, mboujlwnh boux lawz, cungj mbouj ndaej giengq youq gwnz cujciz. Aeu giengiet henhoh gij gienzvi cunghyangh, youq mbiengj swhsiengj、cwngci、hengzdoengh caeuq dangj cunghyangh baujciz gig doxdoengz, giengiet gvancez gij lijlun caeuq lohsienq fuengcim cwngcwz aen dangj, baujcwngq gij cwngci minghlingh cunghyangh youq gizgiz cungj hengz ndaej doeng, baenzlawz cungj mbouj cinjhawj “baihgwnz miz cwngcwz, baihlaj miz duicwz”, baenzlawz cungj mbouj cinjhawj miz minghlingh mbouj caephengz、 miz gimqhaed cix mbouj dingz. Gyagiengz gamduk genjcaz, yiemzsuk gij gijliz daegbied dwg gij gijliz cwngci aen dangj, bietdingh aeu nyinhcaen cawqleix doengh gij hengzveiz famh gijliz, cietsaed guh daengz dangqnaj gijliz bouxboux bingzdaengj、 ciuqsouj gijliz mbouj miz daeggienz、 caephengz gijliz mbouj miz laehvaih, daengx dangj gwnzlaj yamqdin doxdoengz、 haenqheiq aeu hingz baenaj, cauxbaenz yiengh ligliengh giengzdaih、 gijmaz cungj lanz mbouj ndaej de.
    Gak dungzci! Youq gwnz roen guh yiengh seveicujyi miz Cungguek daegsaek, bae saedyienh Cunghvaz Minzcuz daih fukhwng, dwg aen lijsiengj caeuq simnyienh fouzsoq vunzndei vunzmaenh、 gwzming senhlez soj vih de laelwed buekmingh gvaq. Youq mwh ciengzgeiz buekguh ganhoj fouzbeij, aen dangj raeuz gaenjgaenj ingbaengh beksingq, ok gvaq gij lwedhanh caeuq goengrengz ceiq daih, sij baenz gij fwensei lizsij gig gyaeundei、 mbwn rwenz deih doengh haenx, mbouj ndaej dauqlaeng dwk gietsat le gaenhdaih gvaqlaeng Cungguek diuz minghyinh siliengz baihndaw mbouj huz baihrog caeg haeuj、 cwk gungz cwk nyieg de, mbouj ndaej dauqlaeng dwk hainduj le Cunghvaz Minzcuz diuz roen lizsij mboujduenh fathoengh giengzdaih、 byaij yiengq daih fukhwng de, sawj aen Cunghvaz Minzcuz miz haj cien lai bi lizsij raeuz, aeu aen yienghceij moqsag daengjsoengz youq luengq minzcuz gwnz seiqgyaiq. Youq gwnz roen moq baenaj, gij cwzyin raeuz engq daih、 diuz rap raeuz engq naek, bietdingh aeu yungh gij saenqniemh engqgya giendingh、gij roengzrengz engqgya goenqcaej, bae laebdaeb guhbaenz  sam aen yinvu hungnaek、 lijsij dak hawj raeuz neix —— doicaenh hwnqguh yendaiva、 saedyienh guekcoj doengjit、 henhoh seiqgyaiq hozbingz dem coicaenh doengzcaez hwngfat.
    Najdoiq gij saenqnyaemh caeuq daknaek gyoengq beksingq, najdoiq gij diuzgienh lizsij caeuq gaujniemh moq, daengx dangj bietdingh aeu lai ngeix haemzhoj caeuq yungyiemj, giemhaw siujsim、 mbouj dasang mbouj simgaenj, seizseiz cungj baujciz aen uk singjsag; bietdingh aeu lai ngeix cauhmoq, dwg caenleix couh hengz, miz loengloek couh gaij, seizseiz cungj baujciz cingsaenz caengqhwnj、 maengx guh saehcingz; bietdingh aeu lai ngeix gij muzdiz dem eiqdoz youqgaenj aen dangj raeuz, siengsaenq cungqvunz, ingbaengh cungqvunz, seizseiz cungj dawz beksingq cuengq youq giz dieg ceiq sang ndaw sim; bietdingh aeu lai ngeix gij sawjmingh aen dangj raeuz, gouz caen guh saed, ganhoj  buekguh, seizseiz cungj baujciz gij bonjsaek cwngci gyoengq vunz gungcanjdangj.
    Aen saehnieb seveicujyi miz Cungguek daegsaek, dwg aen saehnieb najyiengq daengzcog, aeu gyoengq bouxcoz miz ceiqheiq、 daih ciep daih bae lienzdaemh buekguh. Daengx dangj cungj aeu yawjnaek bouxcoz、 gvansim bouxcoz、 gyaezmaij bouxcoz, dingq gij yigen caeuq iugouz bouxcoz, coi hawj bouxcoz hungmaj, haeujcoengh bouxcoz cauhnieb. Guengjdaih bouxcoz aeu haeujsim dingq coenz aen dangj, laeb gij sigaigvanh、 yinzswnghgvanh、 gyacizgvanh cingqdeng, ciengzlwenx ndiepgyaez aen guekcoj hungmbwk raeuz, ciengzlwenx ndiepgyaez gyoengq beksingq hungmbwk raeuz, ciengzlwenx ndiepgyaez aen Cunghvaz Minzcuz hungmbwk raeuz, youq mwh bae caeuqfaenh aen saednieb hungmbwk、 guh yiengh seveicujyi miz Cungguek daegsaek, hawj gij goengrengz  mwh coz raeuz, fat ok gij saekrongh engqgya gyaeundei dem.
    Aen saehnieb seveicujyi miz Cungguek daegsaek, aeu daengx gyoengq lwglan Cunghvaz fanhcungq itsim、 doxgiet buekguh. Doxgiet couh baenz daengx aen gugmienh, doxgiet couh miz rengzhung rengzak. Gyoengq dungzci daengx dangj aeu yungh gij dangjsing giengiengz bae baujcwngq doxgiet, yungh aen saehnieb caezcaemh bae coicaenh doxgiet, gagrox henhoh gij doxgiet doengjit daengx dangj, gyamaenh gyoengq beksingq daengx guek gak minzcuz daih doxgiet, gyagiengz gyoengq lwglan Cunghvaz ndaw guek rog guek daih doxgiet, coicaenh gyoengq beksingq Cungguek caeuq gyoengq beksingq seiqgyaiq gak guek daih doxgiet.
    Cingj raeuz yaengxsang mbaw geiz hungmbwk guh yiengh seveicujyi miz Cungguek daegsaek, engq gaenjmaed comzgiet youq seiqhenz dangj cunghyangh, vih cienzmienh hwnq baenz aen biengz siujgangh bae haenqrengz buekguh, mboujduenh duedaeu yiengh seveicujyi miz Cungguek daegsaek caiq lai ndaej hingz, hawj gyoengq beksingq Cungguek dem aen Cunghvaz Minzcuz, doengzcaez cauh ok ngoenz daengzcog engqgya vuenyungz gyaeundei dem! 
 
打印本页】  【关闭窗口】  【返回顶部
上一篇:没有了
下一篇:中国共产党章程